မန္တလေးတိုင်း၊ မိုးကုတ်မြို့ကို စစ်ကောင်စီတပ်က သြဂုတ်လအတွင်း ၄ ကြိမ်မြောက်အဖြစ် သြဂုတ် ၁၇ ရက် မနက် ၉ နာရီလောက်က ထပ်မံဗုံးကြဲခဲ့တာကြောင့် ကလေးတယောက် အပါအဝင် ၃ ယောက် သေဆုံးခဲ့တယ်လို့ မြို့ခံတွေဆီက သိရပါတယ်။
မိုးကုတ်မြို့အရှေ့ပိုင်း စစ်တပ်ဗျူဟာကုန်းအနီး ပတ္တမြားငမောက်တည်းခိုခန်းနဲ့ စီးပွားရေးဘဏ်အနီးကို စစ်ကောင်စီတပ်က ဂျက်ဖိုက်တာနဲ့ ဗုံးကြဲခဲ့တာဖြစ်ပြီး လမ်းသွားလမ်းလာ ကလေးငယ်တယောက်နဲ့ ပြည်သူ ၂ ယောက် ထိခိုက်သေဆုံးခဲ့ပြီး ဘယ်သူတွေ ဆိုတာတော့ မသိရသေးဘူးလို့ မြို့ခံတယောက်က ပြောပါတယ်။
“ဂျက်ဖိုက်တာနဲ့ ပထမတလုံးကြဲပြီး မကြာဘူး။ နောက်ထပ် ထပ်လာကြဲသွားတာ၊ လမ်းမှာ သွားနေသူတွေ ထိသွားတယ်။ ခုက လမ်းသွားရင် ဘယ်အချိန် ကိုယ့်ခေါင်းပေါ် လေယာဥ်လာကြဲမလဲဆိုပြီး မိုးပေါ်ကြည့်သွားနေရပြီ။”
သြဂုတ် ၁၄ ရက်ညကလည်း မိုးကုတ်မြို့ ငါးပတ်တောင်နဲ့ လင်းရောင်ခြည် ဘုန်းကြီးကျောင်းအနီးကို စစ်တပ်က ဗုံးကြဲခဲ့တာကြောင့် ပြည်သူ ၂၁ ယောက် ထိခိုက် သေဆုံးခဲ့ရပါတယ်။
စစ်ကောင်စီတပ်က မိုးကုတ်မြို့ကို သြဂုတ်လအတွင်း ဗုံး ၃ ကြိမ် ကြဲချခဲ့တာကြောင့် ပြည်သူ ၃၈ ယောက် ထိခိုက်သေဆုံးခဲ့ရပါတယ်။
