ရုရှားဗဟိုဘဏ်က နိုင်ငံခြားငွေလဲဈေးကွက်မှာ မြန်မာကျပ်ငွေကိုပါ တိုက်ရိုက်လဲလှယ်ပေးချေနိုင်ကြောင်း ကြေညာခဲ့တာဟာ စစ်အစိုးရရဲ့ နိုင်ငံခြားငွေကြေး ဒေါ်လာ အသုံးပြုမှုကို လျှော့ချဖို့ ကြိုးပမ်းချက်ဖြစ်ကြောင်း စီးပွားရေးသမားတွေနဲ့ လေ့လာသုံးသပ်သူတွေက ပြောပါတယ်။

ရုရှားဗဟိုဘဏ်ရဲ့ နိုင်ငံခြားငွေလဲဈေးကွက်မှာ “မြန်မာကျပ်ငွေ” အပါအဝင် နိုင်ငံပေါင်း ၁၂ နိုင်ငံရဲ့ ငွေကြေးတွေပါ တိုက်ရိုက်လဲလှယ်ခွင့်ပြုကြောင်း ရုရှားဗဟိုဘဏ်ရဲ့ တရားဝင်စာမျက်နှာကနေ တဆင့် ကြေညာနေဖြစ်ပါတယ်။ 

ရုရှားဗဟိုဘဏ်ကနေ အခုလို မြန်မာငွေကြေးကို တရားဝင်နိုင်ငံခြားငွေကြေးတခုအဖြစ် သတ်မှတ်လိုက်တာကြောင့် ရုရှား-မြန်မာနိုင်ငံတို့အကြား ကျပ်နဲ့ ရူဘယ်ကို တိုက်ရိုက်ပေးချေနိုင်၊ ကုန်သွယ်နိုင်တော့မှာ ဖြစ်ပါတယ်။ 

အခုလို ရုရှားဗဟိုဘဏ်က မြန်မာကျပ်ငွေ လက်ခံတာက နိုင်ငံခြားငွေအသုံးပြုမှု လျှော့ချတာဖြစ်ကြောင်း စီးပွားရေး လုပ်ငန်းရှင်တယောက်က မှတ်ချက်ပြုပါတယ်။

“တကယ်လို့ Russian Central Bank ကသာ Kyat to Ruble - Ruble to Kyat ကို Direct Exchange လုပ်လို့ရရင် အမေရိကန်ဒေါ်လာ လိုအပ်ချက်များနေတဲ့ စကစ အတွက် အတိုင်းအတာတခု အသက်ရှူချောင်သွားမယ်။ ဘာလို့လဲဆိုတော့ ရုရှားကနေ စက်သုံးဆီ၊ လက်နက်၊ ဓာတ်မြေဩဇာ၊ ဂျုံနဲ့ အခြား ရုရှားထုတ်ပစ္စည်းတွေကို ဒေါ်လာမလိုဘဲ ငွေပေးချေလို့ ရသွားမယ်။ ဘာလို့လဲဆိုတော့ အဲဒီလိုပစ္စည်းတွေ မြန်မာပြည်အတွက် တင်သွင်းတာ အရင်က USD နဲ့ပဲ သွင်းခဲ့ရတာ။ နောက် ၂ နိုင်ငံလုံးက Heavily Sanctioned မိထားတော့ အနောက်နိုင်ငံတွေက ထိန်းချုပ်ထားတဲ့ US ဒေါ်လာသုံးရတဲ့ SWIFT System ကို အသုံးမပြုဘဲ Trade လုပ်နိုင်တာပေါ့။ ဒီတော့ နှစ်နိုင်ငံလုံးအတွက် ကောင်းသွားတာပေါ့" လို့ ပြောပါတယ်။

ရုရှားဗဟိုဘဏ် ထုတ်ပြန်တဲ့ ဩဂုတ် ၁၃ ရက် ငွေလဲလှယ်နှုန်းမှာတော့ ကျပ်ငွေ ၁,၀၀၀ ကို ရုရှား ရူဘယ်ငွေ ၃၈.၀၃၄၅ ရှိတယ်လို့ ဖော်ပြထားပါတယ်။ လက်ရှိမှာ ရုရှား-မြန်မာ နှစ်နိုင်ငံ ငွေတိုက်ရိုက်ပေးချေဖို့အတွက် MIR Payment System ကို သုံးပြီး ငွေလွှဲပို့တာတွေ လုပ်နိုင်တယ်လို့ သိရပါတယ်။ 

အခုလို မြန်မာကျပ်နဲ့ ရုရှားရူဘယ် တိုက်ရိုက်လဲလှယ်ခွင့်ပြုခဲ့တာကြောင့် ရုရှားနဲ့ မိတ်ဖက်နိုင်ငံတွေမှာပါ အသုံးပြုလာနိုင်ကြောင်းလည်း သိရပါတယ်။

စီးပွားရေး ပညာရှင်တယောက်က “အဓိက ကတော့ ရုရှားဗဟိုဘဏ်ကနေ သူတို့ ဘယ်လောက်ထိ လက်ခံမှာလဲပေါ့။ ကျနော်တို့ သိထားတာကတော့ ရုရှားနဲ့ တိုက်ရိုက်ကုန်သွယ်မှုက အများကြီးတော့ သိပ်မရှိထားဘူးပေါ့။ ဒါပေမဲ့ ရုရှားရဲ့ မိတ်ဖက်ကုန်သွယ်တဲ့ နိုင်ငံတွေမှာတော့ ရုရှားကတဆင့် သွားမယ်ဆိုရင် မြန်မာငွေနဲ့ ပေးချေမယ်ဆိုရင် သူတို့ လက်ခံမလားပေါ့နော်။ ဒါပေမဲ့ လက်ခံရင်ရော မြန်မာပိုက်ဆံတွေက အင်တာနေရှင်မှာ သုံးလို့ရမယ် မထင်ဘူး။ မြန်မာငွေကြေးက ငွေဘောင်မရှိဘူးလေ။ အင်တာနေရှင်နယ်ဈေးကွက်မှာ မဖြစ်နိုင်ဘူး ထင်တယ်။ ဒါပေမဲ့ ရုရှားက တာဝန်ယူ ဆောင်ရွက်ပေးနေတာဖြစ်လို့ ရုရှားနဲ့ မိတ်ဖက်နိုင်ငံတွေ ဥပမာ တရုတ်တို့မှာတော့ အသုံးဝင်နိုင်တယ်လို့ ယူဆရတယ်။ နှစ်နိုင်ငံ ငွေကြေးတွေနဲ့ ပေးချေတဲ့အခါ ရုရှားကတော့ အရှုံးခံမယ် မထင်ဘူး၊ မြန်မာဘက်ကပဲ အရှုံးခံရမယ်လို့ ကျနော် ထင်တယ်” လို့ ပြောပါတယ်။

ရုရှားဟာ မြန်မာကျပ်ငွေအပြင် ဘင်္ဂလားဒေ့ရှ်၊ အီသီယိုးပီးယားနဲ့ ဆော်ဒီအပါအဝင် နိုင်ငံပေါင်း ၁၂ နိုင်ငံရဲ့ ငွေကြေးတွေကို ရုရှားနိုင်ငံရဲ့ တရားဝင်ငွေကြေးစနစ်ထဲ ဇူလိုင် ၈ ရက်မှာ တရားဝင် ထည့်သွင်းကြေညာခဲ့တာဖြစ်ပြီး ဇူလိုင် ၁၀ ရက်ကတည်းက တရားဝင် ငွေလဲနိုင်ပြီလို့ ရုရှားဗဟိုဘဏ်က ထုတ်ပြန်ထားတာပါ။