မကွေးတိုင်း၊ မြိုင်မြို့ရဲ့မြောက်ဘက် မီတာ ၆၅၀ လောက် ဝေးကွာတဲ့ စစ်တပ် စစ်ဆေးရေး ကင်းစခန်းတခုကို ဩဂုတ် ၁၁ ရက်နေ့ မနက်မှာ မီးရှို့ပြီး တပ်ဆုတ်သွားတယ်လို့ ဒေသခံတွေဆီက သိရပါတယ်။
အဆိုပါစခန်းမှာ စစ်သားအင်အား ၂၀ လောက်ရှိပြီး မြိုင်မြို့အတွင်း ဝင်လာသူမှန်သမျှကို စစ်ဆေး၊ ဖမ်းဆီး၊ ရိုက်နှက်တာတွေ လုပ်ဆောင်နေတာလို့ ဆိုပါတယ်။
မြိုင်ဒေသခံတယောက်က “သူတို့စခန်းကို သူတို့ကိုယ်တိုင် မီးရှို့ပြီး မြိုင်မြို့ထဲ ပြန်ဆုတ်သွားတယ်။ အခုတော့ အဲဒီကောင်တွေ မြိုင်မြို့ထဲက ဈေးအနီးမှာ စခန်းချနေတယ်။ တိုက်ပွဲမဖြစ်ဘူး အစ်ကိုရေ။ ပြည်သူ့ကာကွယ်ရေးတပ်က လာတိုက်မှာ ကြောက်ပြီး ကိုယ့်စခန်းကို မီးရှို့ပြီး နောက်ဆုတ်လာတာရယ်” လို့ ပြောပါတယ်။
အဆိုပါဂိတ်မှာ စစ်တပ်က ၂၀၂၂ ခုကနေ ဒီနေ့အချိန်အထိ စခန်းချနေထိုင်ပြီး မြို့အဝင်အထွက် စစ်ဆေးနေတာလို့ သိရပါတယ်။
မြိုင်မြို့နယ် ပြည်သူ့ကာကွယ်ရေးအဖွဲ့ ရဲဘော်တယောက်က “စစ်တပ်က သူ့စခန်းသူ မီးရှို့ပြီး ထွက်ပြေးသွားတယ်ဆိုတာ ဟုတ်တယ်ဗျ။ ကျနော်တို့ နေ့လယ်ပိုင်းမှာ အဲဒီစခန်းကို ရှင်းလင်းရေး သွားလုပ်ကြသေးတယ်။ စခန်းအတွင်းကနေ ချိန်းစောစက် ၃ လုံး၊ မြက်ရိတ်စက် ၂ လုံး၊ လှည်း ၁ စီး သိမ်းဆည်းရခဲ့တယ်။ သူတို့က သုံးဘီးနဲ့ ပစ္စည်းတွေသယ်ပြီး ပြန်ဝင်သွားတယ်။ ကျနော်တို့နဲ့ တိုက်ပွဲမဖြစ်ပါဘူး။ သူတို့ကြောက်ချေးပါပြီး ကိုယ့်စခန်းကိုယ် မီးရှို့ပြီး ထွက်သွားတာပါ” လို့ ပြောပါတယ်။
ပြည်သူ့ကာကွယ်ရေးတပ်တွေ ရှင်းလင်းရေးလုပ်ပြီး ညနေ ၃ နာရီကျော်မှာ စစ်တပ်က မြိုင်မြို့ အနီးတဝိုက်ကို လေယာဉ် ၂ စီးနဲ့ ပစ်ခတ်တိုက်ခိုက်မှု လုပ်ဆောင်ခဲ့ပေမဲ့ ထိခိုက်သူမရှိခဲ့ဘူးလို့ သိရပါတယ်။
