သံအမတ်ကြီးဦးကျော်မိုးထွန်း ကုလသမဂ္ဂ (UN) မှာ ဆက်လက်ကိုယ်စားပြုခွင့်ရရေး ထောက်ခံဆန္ဒပြပွဲတွေ ပြုလုပ်ဖို့ နိုင်ငံတကာရောက် မြန်မာ့အရေးဆောင်ရွက်သူတွေ ပူးပေါင်းပြီး ပထမအကြိမ် Global Meeting ခေါ်ယူခဲ့ပါတယ်။
ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီးဦး ကျော်မိုးထွန်းကို ကုလမှာ ဆက်လက်တာဝန်ပေးအပ်ရေး လူထုထောက်ခံပွဲတွေပြုလုပ်ဖို့ ပထမအကြိမ် Global Meeting ကို ဩဂုတ်လ ၁၀ ရက်နေ့မှာ နိုင်ငံတကာရောက်မြန်မာ့အရေးဆောင်ရွက်သူတွေ ပူးပေါင်းခေါ်ယူခဲ့တာပါ။
အွန်လိုင်းကနေပြုလုပ်တဲ့အစည်းအဝေးမှာ မြေပြင်တော်လှန်ရေးအင်အားစုတွေ၊ အမေရိကန်၊ ကနေဒါ၊ ဥရောပ၊ ဩစတြေးလျနဲ့ အာရှနိုင်ငံအသီးအသီးကို ရောက်နေတဲ့ မြန်မာ့အရေးတက်ကြွလှုပ်ရှားသူတွေ ပူးပေါင်းပါဝင်ခဲ့ပါတယ်။
ဦးကိုကိုလေး (Learn and Share) က “ကမ္ဘာ့ကုလသမဂ္ဂအထွေထွေညီလာခံကြီးက စက်တင်ဘာ ၈ ရက်နေ့မှာ စမှာဖြစ်ပါတယ်။ စက်တင်ဘာ ၂၀ မှာကတော့ နိုင်ငံတကာရဲ့ ခေါင်းဆောင်ကြီးတွေ စုစည်းမယ့်အပတ် ဖြစ်တဲ့အတွက်ကြောင့် စက်တင်ဘာလ ၂၀ ရက်နေ့ကို ပစ်မှတ်ထားပြီးတော့ ဂလိုဘယ်ကမ်ပိန်းခေါ်ဖို့အတွက် ကျနော်တို့ ဆုံးဖြတ်ချက်ချပါတယ်။ အားလုံးပါဝင်တဲ့ United States ဖြစ်မြောက်ရေးကော်မတီဖွဲ့ပါတယ်။ ဥရောပက တက်လာတဲ့လူတွေအားလုံး ပေါင်းပြီးတော့ ဒီဂလိုဘယ်ကမ်ပိန်းနဲ့ ပတ်သက်ပြီးတော့ ဥရောပက ဖွဲ့ပါတယ်။ အာရှဆိုရင်လည်း အာရှကို ဖွဲ့ပါတယ်။ ဩဇီဆိုလည်း ဩဇီကိုဖွဲ့ပါတယ်။ အရှေ့နဲ့အနောက်ပေါ့။ ဒါက ဇုန်အလိုက်ဖွဲ့လိုက်တယ်။ ဂလိုဘယ်အနေနဲ့လည်း တက်လာတဲ့လူတွေ ၇၀ ကျော်ကိုလည်း ဂလိုဘယ်ဖြစ်မြောက်ရေး ကော်မတီအနေနဲ့ ကျနော်တို့ဖွဲ့ကြပါတယ်။ ကော်မတီ ဆပ်ကော်မတီလေးတွေ အများကြီးဖွဲ့ဖြစ်ပါတယ်။ အဲ့ဒီအလုပ်တွေ အကုန်လုံးကို အမြန်ဆုံးသေချာခွဲဝေပြီးတော့ တာဝန်တွေယူပြီးတော့ ပြင်ဆင်ရမှာဖြစ်တယ်” လို့ ပြောပါတယ်။
အခု ၂၀၂၅ ခုနှစ်မှာ သံအမတ်ကြီးဟာ စစ်အာဏာသိမ်းမှုအပြီး ၅ နှစ်မြောက် ရာထူးတာဝန်ကို ဆက်လက်ထိန်းထားနိုင်ဖို့ ကြိးစားရတာဖြစ်ပါတယ်။ အမေရိကန်မှာ အစိုးရအပြောင်းအလဲဖြစ်ချိန်၊ ကမ္ဘာ့နိုင်ငံရေး၊ စစ်ရေး၊ စီးပွားရေးမတည်ငြိမ်မှုဖြစ်နေချိန်နဲ့ တိုက်ဆိုင်တာကြောင့် အခုနှစ်မှာတော့ အရင်နှစ်တွေကထက်ပိုတဲ့ ဖိအားတချို့ရှိနေတာပါ။
NUG နိုင်ငံခြားရေးဝန်ကြီးဌာန ဒုဝန်ကြီး ဦးမိုးဇော်ဦး “ဒီနှစ်ကတော့ မနှစ်ကနဲ့ မတူတာတော့ရှိတယ်။ သံအမတ်ကြီးအတွက်ကတော့ ဆောင်ရွက်ရမယ့်လုပ်ငန်းတွေ လျှော့စရာအကြောင်းမရှိဘူး။ ကျနော်တို့ရဲ့ ကမ်ပိန်း၊ လှုပ်ရှားဆောင်ရွက်မှုတွေကို အရင်နှစ်တွေအတိုင်းပဲ ဆက်ပြီးဆောင်ရွက်ရမယ့်သဘောတော့ ရှိတယ်ပေါ့နော်။ ဒါပေမဲ့ ဒီနှစ်မှာ နည်းနည်း ထူးခြားတာလေးတွေတော့ ရှိတာပေါ့လေ။ အမေရိကန်ပြည်ထောင်စုရဲ့ ကုလသမဂ္ဂဆိုင်ရာ အမြဲတမ်းကိုယ်စားလှယ် PR က အခုထိတောင် မခန့်ရသေးဘူး။ အဲ့ဒီလိုမျိုးတွေတော့ရှိတယ်။ ဒါပေမဲ့ သူ့ရဲ့လက်ထောက် PR နဲ့ တွေ့ဆုံဆွေးနွေးမှုတွေကတော့ ရှိတဲ့အခါကြတော့ သူကတော့ အရင်သဘောထားအတိုင်းပဲ ရှိတယ်ဆိုတာမျိုးတွေတော့ သံအမတ်ကြီးကနေတဆင့် သိရတာတွေရှိတယ်ပေါ့လေ” လို့ ပြောပါတယ်။
အခုတကြိမ်ခေါ်ယူတဲ့ Global Meeting ဟာ သံအမတ်ကြီး ဦးကျော်မိုးထွန်းအတွက် ဦးစားပေးခေါ်ယူတာဖြစ်ပေမဲ့ လတ်တလော တော်လှန်ရေးအပေါ် သက်ရောက်နေတဲ့ စစ်ကောင်စီက အမေရိကန်လော်ဘီကုမ္ပဏီကို ဩဂုတ် ၁ ရက်နေ့မှာ တနှစ်ကို ဒေါ်လာ ၃ သန်းပေးပြီး ငှားထားတဲ့ကိစ္စ၊ အတုအယောင်ရွေးကောက်ပွဲကို မဖြစ်မနေ ကျင်းပနိုင်ဖို့ တွန်းအားပေးနေတဲ့ ကိစ္စတွေကိုလည်း ဆွေးနွေးပြောဆိုတာတွေရှိခဲ့ပါတယ်။
မခင်သီရိနန္ဒာစိုး (ဆန်ဖရန်စစ္စကို၊ ကယ်လီဖိုးနီးယားပြည်နယ်) က “သံအမတ်ကြီးဦးကျော်မိုးထွန်း ဆက်လက်ပြီးတော့ ကိုယ်စားပြုနိုင်ရေးကို အဓိက ဆွေးနွေးသွားတယ်ဆိုပေမဲ့ စစ်အုပ်စုတွေက DCI Group လော်ဘီကုမ္ပဏီကို ပိုက်ဆံပေးပြီး ငှားလိုက်တဲ့ကိစ္စတွေ၊ အတုအယောင် ရွေးကောက်ပွဲ ကျင်းပနိုင်ဖို့ သူတို့လုံးပန်းနေတဲ့ ကိစ္စတွေဆိုတာက အားလုံးဆက်စပ်နေတဲ့ ကိစ္စတွေဖြစ်တဲ့အတွက် ကျမတို့ရဲ့ ဆွေးနွေးပွဲမှာ ဒီအချင်းအရာတွေကလည်း ပါဝင်ပြီးတော့ ဆွေးနွေးသွားကြတာတွေရှိပါတယ်။ ဒါတွေကို ကျမတို့အနေနဲ့ဆက်လက်ပြီးတော့ Second Global Meeting- Section No-2 အနေနဲ့ ထားပြီးတော့ ဆက်ပြီးတော့ ဆွေးနွေးသွားဖို့ကို လာမယ့်အပတ်မှာ ဒုတိယ ကမ္ဘာလုံးဆိုင်ရာ Meeting ကို ကျမတို့ဆက်ပြီးတော့ခေါ်ထားပါတယ်” လို့ ပြောပါတယ်။
နွေဦးတော်လှန်ရေးအပေါ် ဖိအားဖြစ်လာတဲ့ စစ်ကောင်စီရဲ့ လှုပ်ရှားမှုတွေကို တုံ့ပြန်ဖို့ ကမ္ဘာ့နိုင်ငံအသီးသီးကိုရောက်နေတဲ့ မြန်မာ့အရေးဆောင်ရွက်သူတွေက ရောက်ရှိရာ နိုင်ငံအလိုက် အစိုးရနဲ့လွှတ်တော်တွေကို မြန်မာ့အရေးအတွက် သတင်းစကားပေးတာတွေ ပိုပြီးညီညီညွတ်ညွတ်လုပ်နိုင်ဖို့ စုစည်းနေတာဖြစ်ပါတယ်။
စက်တင်ဘာ ၂၀ ရက်နေ့ဝန်းကျင်မှာ ကမ္ဘာ့နိုင်ငံအသီးသီးကို ရောက်နေတဲ့ မြန်မာတွေက သံအမတ်ကြီး ဦးကျော်မိုးထွန်းကို ထောက်ခံအားပေးတာ၊ စစ်ကောင်စီရဲ့ အတုအယောင်ရွေးကောက်ပွဲကို ဆန့်ကျင်ကန့်ကွက်တာတွေ တပြိုင်တည်းပြုလုပ်သွားဖို့ စီစဉ်နေတာလည်း ဖြစ်ပါတယ်။
သုတချမ်းသာ
