ထိုင်းနိုင်ငံ မဲဆောက်မြို့ကနေ မြန်မာနိုင်ငံဘက်အဝင် စစ်ဆေးရေးဂိတ်တွေမှာ စစ်ကောင်စီ လက်အောက်ခံရဲနဲ့ လူဝင်မှုကြီးကြပ်ရေးအဖွဲ့တွေက ခရီးသွားပြည်သူတွေကို တင်းတင်းကျပ်ကျပ် စစ်ဆေးရှာဖွေလာတယ်လို့ သိရပါတယ်။

သြဂုတ် ၇ ရက်နေ့က မြဝတီ-မဲဆောက် အမှတ် ၁ ချစ်ကြည်ရေးတံတား နယ်စပ်ဖြတ်ကျော်ဂိတ်မှာ မြဝတီမြို့ဘက်ကနေ ဝင်ရောက်လာတဲ့ အသက် ၆၂ နှစ်အရွယ် ထိုင်းအမျိုးသမီးတယောက်ဆီကနေ မူးယစ်ဆေးဝါးတွေကို ထိုင်းအာဏာပိုင်တွေက ဖမ်းဆီးရမိခဲ့ပြီးနောက် မြဝတီမြို့ဘက်အခြမ်းမှာ ခရီးသွားတွေကို ပိုပြီးရှာဖွေစစ်ဆေးလာတာလို့ ဆိုပါတယ်။

ခရီးသွားအမျိုးသမီးတယောက်က “မဲဆောက်မြို့မှာ အထက်တန်းကျောင်းတက်နေတဲ့ ကလေးတွေဆီ သွားတာ၊ အသွားတုန်းကတော့ ပုံမှန်စစ်ဆေးတာလောက်ပဲရှိတယ်။ သြဂုတ် ၉ ရက်နေ့က မဲဆောက်ကအပြန် မြဝတီဘက်အခြမ်းမှာရှိတဲ့ ရဲ၊ လဝကနဲ့ အရပ်ဝတ် ဝတ်ထားတဲ့သူတွေက အစစ်အဆေးတွေ ကြမ်းနေတာ၊ ပိုက်ဆံအိတ်တွေကအစ ဖွင့်ခိုင်းပြီး ရှာဖွေစစ်ဆေးနေတာ” လို့ ပြောပါတယ်။

မဲဆောက်မြို့ဘက်အခြမ်းမှာ မူးယစ်ဆေးဝါးတွေမိလို့ သက်ကြီးရွယ်အိုတွေပါ စစ်ဆေးရတာလို့ ပြောကြောင်းနဲ့ ခရီးသွားတွေအနေနဲ့ အစစအရာရာဂရုစိုက်သွားလာစေချင်တယ်လို့ သူက ဆိုပါတယ်။

ထိုင်းနိုင်ငံ မဲဆောက်ဘက်အခြမ်းကနေ မြန်မာနိုင်ငံဘက် အသွားအပြန်လုပ်တဲ့အခါမှာ အမှတ် ၁ ချစ်ကြည်ရေးတံတားပေါ်ကနေ တရားဝင်လမ်းကြောင်းအဖြစ် သွားလာနေကြရပြီး နယ်စပ်ဖြတ်ကျော်ဂိတ်တွေမှာ နှစ်ဖက် တာဝန်ရှိသူတွေရဲ့ စစ်ဆေးတာကို ခံရတာပါ။

မြန်မာနိုင်ငံဘက်အခြမ်း မြဝတီမြို့အဝင်ဂိတ်ကနေ ခရီးသွားထောက်ခံစာ၊ စမတ်ကတ်နဲ့ ၇ ရက် နေထိုင်ခွင့်တံဆိပ်တုံးထု သွားလာနေရပြီး စမတ်ကတ်ကို စစ်ဆေးရာမှာ CDM ပြုလုပ်ထားခဲ့သူတွေရဲ့ ကိုယ်ရေးအချက်အလက်တွေ စစ်ဆေးတွေ့ရှိ ဖမ်းဆီးခံရတာတွေလည်း ရှိနေပါတယ်။