ကရင်နီပြည်နယ်၊ ဒီးမော့ဆိုမြို့နယ်အရှေ့ဘက်ခြမ်းကနေ အနောက်ခြမ်းကို စစ်ရှောင်လာတဲ့ ပြည်သူတွေကို စစ်ကောင်စီတပ်ကဖမ်းဆီးပြီး ၄ ယောက်ကို သတ်ဖြတ်လိုက်တယ်လို့ ကရင်နီပြည် ကြားကာလအုပ်ချုပ်ရေးကောင်စီ IEC အတွင်းရေးမှူး ၂ ဦးဗညားက ပြောပါတယ်။

သြဂုတ် ၈ ရက်နေ့ မနက် ၈ နာရီဝန်းကျင်မှာ လူ ၁၅ ယောက်ပါတဲ့ စစ်ရှောင်ကားဟာ ဒီးမော့ဆိုအရှေ့ကနေ အနောက်ကို စစ်ရှောင်ချိန် စစ်ကောင်စီတပ်က ပစ်ခတ်ဖမ်းဆီးပြီး သတ်လိုက်တာလို့ ဆိုပါတယ်။

IEC အတွင်းရေးမှူး ၂ ဦးဗညားက “မနေ့ကအထိ ၂ ယောက် ပစ်ခတ်သတ်ဖြတ်ခြင်းခံရတယ်။ အခုကျ အကုန်လုံးပေါင်းလိုက်ရင် ၄ ယောက်လို့ပြောနေကြတယ်။ ကျား၊ မ အတည်မပြုနိုင်သေးဘူး။ အများစုကတော့ အမျိုးသားတွေဖြစ်မယ်လို့ ခန့်မှန်းရတယ်။ ၁၅ ဦးဖမ်းဆီးခံရတယ်၊ အခုလောလောဆယ် ၄ ယောက် သတ်ဖြတ်ခံရတယ်လို့ အကြမ်းဖျင်းပြောလို့ရတာပေါ့နော်” လို့ ပြောပါတယ်။

၁၅ ယောက်ထဲက ၄ ယောက်ကို ဖမ်းဆီးသတ်ဖြတ်လိုက်ပြီး  ကျန်တဲ့သူတွေကို ပြန်လွှတ်တယ်လို့ ကနဦးသိရပေမယ့် အသေးစိတ်ကိုတော့ စုံစမ်းနေဆဲဖြစ်ပါတယ်။

ဖြစ်စဉ်ကိုသိသူတယောက်က “ပြန်လွတ်တဲ့ထဲက မဒေါ်တယောက် ဘယ်သူနဲ့မှ စကားမပြော ကြောင်တောင်တောင်ကြီးဖြစ်ပြီး နှလုံးအမောဖောက်လို့ ဆေးရုံတင်ထားရတယ်” လို့ ပြောပါတယ်။

စစ်ကောင်စီတပ်ဟာ ဒီးမော့ဆိုမြို့နယ်က ဒေါငံခါး၊ ကုန်းသာရွာနဲ့ ငွေတောင်ဆည်ဘက်ကို လက်နက်ကြီးနဲ့ ပစ်ခတ်တာတွေရှိနေပြီး ဒီးမော့ဆိုအရှေ့နဲ့ အနောက်ကို စစ်​ကြောင်းထိုးဖို့ ပြင်နေတယ်လို့ သိရပါတယ်။

ပြီးခဲ့တဲ့ သြဂုတ် ၇ ရက်နေ့ ညနေမှာလည်း ဒီးမော့ဆိုအနောက်ခြမ်းကို လက်နက်ကြီးနဲ့ပစ်ခတ်ပြီး လေကြောင်းကနေလည်း ဗုံးကြဲတိုက်ခိုက်ခဲ့တာကြောင့် ပြည်သူ ၁ ယောက် ဒဏ်ရာရပြီး နေအိမ်နဲ့ ကျောင်းဆောင်အနည်းငယ် ပျက်စီးရတယ်လို့ စစ်ရှောင်ပြည်သူတွေက ပြောပါတယ်။