တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်မှာ သြဂုတ် ၅ ရက် ည ၁၁ နာရီလောက်က ဥယျာဥ်ခြံထဲကို စစ်ကောင်စီရဲ့ လက်နက်ကြီး ကျရောက်ပေါက်ကွဲပြီး တနှစ်သားအရွယ် ကလေးတယောက် သေဆုံးခဲ့တယ်လို့ ဒေသခံတွေက ပြောပါတယ်။
တနင်္သာရီမြို့ပေါ်မှာ အထိုင်ချထားတဲ့ စစ်ကောင်စီတပ်ကနေ ၈၁ မမ လက်နက်ကြီးနဲ့ လယ်တောင်ယာကျေးရွာထဲကို ၂ လုံးပစ်ခတ်ခဲ့ပြီး ဥယျာဥ်ခြံဘက် ကျရောက်ပေါက်ကွဲခဲ့ကာ ကလေးအား လက်နက်ကြီးလာစင်ခဲ့တာလို့ ဒေသခံတယောက်က ပြောပါတယ်။
“ကျနော်တို့ သိရသလောက်တော့ လက်နက်ကြီးက ၈၁ မမ ပစ်လိုက်တာပါ။ လက်နက်ကြီးက အိမ်ထဲ တည့်လာကျတာမဟုတ်ဘူး။ အိမ်အနီးလာကျပြီး ပေါက်ကွဲတယ်။ အိမ်ထဲလာစင်ပြီး ကလေးကို ထိတာမျိုးပါ။”
ကလေးတယောက်တည်း လက်နက်ကြီး ထိခိုက်သေဆုံးခဲ့တာဖြစ်ပြီး မိသားစုဝင်တွေတော့ ထိခိုက်မှုမရှိခဲ့ဘူးလို့ ဒေသခံတွေက ပြောပါတယ်။
စစ်ကောင်စီက လယ်တောင်ယာကျေးရွာကို လက်နက်ကြီးနဲ့ ပစ်ခတ်နေတာ ၂ ရက်ရှိပြီဖြစ်ပြီး ကျေးရွာထဲကိုလည်း စစ်သားအင်အားအလုံးအရင်းနဲ့ ဝင်ရောက်အထိုင်ချနေတယ်လို့ ပြောပါတယ်။
အဆိုပါ လယ်တောင်ယာကျေးရွာအနီးမှာ စစ်ကောင်စီနဲ့ တော်လှန်ရေးတပ်ဖွဲ့တွေ သြဂုတ် ၄ ရက် က ထိတွေ့တိုက်ပွဲတွေ ဖြစ်ပွားခဲ့ပြီးတော့ ဒေသခံအများအပြား စစ်ရှောင်နေကြရတယ်လို့ ပြောပါတယ်။
