အပူချိန် ၅၀ ဒီဂရီစင်တီဂရိတ်အထက် ပုံမှန်မြင့်တက်နေလို့ ပူပြင်းတဲ့အပူရှိန်နဲ့ မိုးခေါင်မှုတို့ဟာ အီရတ် လယ်သမားတွေကို မကြုံစဘူး အခက်အခဲဖြစ်အောင် ခြိမ်းခြောက်နေပါတယ်။

မကြာသေးမီက တရားဝင် အချက်အလက်တွေအရ နေ့စဉ် ကမ္ဘာ့အပူဆုံးမြို့တွေထဲမှာ အီရတ်မြို့ အနည်းဆုံး ၅ မြို့ကို ပြသထားပါတယ်။

အခု နွေရာသီ စိုက်ပျိုးရာသီအတွင်း စိုက်ပျိုးတဲ့ ဧရိယာတွေကို ကြီးကြီးမားမား လျှော့ချဖို့ အီရတ် စိုက်ပျိုးရေးဝန်ကြီးဌာနက အမိန့်ပေးထားပါတယ်။

လွန်ကဲတဲ့ ရာသီဥတုဟာ အခုတော့ သဘာဝပတ်ဝန်းကျင် တည်ငြိမ်မှုနဲ့ စားနပ်ရိက္ခာ ဖူလုံရေးကို ခြိမ်းခြောက်နေတယ်ဆိုတာ ရှင်းရှင်းလင်းလင်း ညွှန်ပြနေပါတယ်။

အီရတ် ပတ်ဝန်းကျင်ထိန်းသိမ်းရေးလှုပ်ရှားသူ အလီ ဂျဝဒ်က  “မော်တော်ယာဥ်နဲ့ မီးစက်တွေကနေ ကာဗွန်ထုတ်လွှတ်မှု လျှော့ချရေး၊ အိမ်နီးချင်းနိုင်ငံတွေကနေ ရေထုတ်လွှတ်မှု ပိုရရှိရေး၊ သဘာဝပတ်ဝန်းကျင် အရည်အချင်းပြည့်တဲ့ အခြေခံအဆောက်အအုံတွေ တိုးချဲ့ခြင်း အပါအဝင် ကုစားနည်းတွေကို သာမန်ပြည်သူတွေတောင် သိပါတယ်” လို့ ပြောပါတယ်။

အီရတ်နိုင်ငံရဲ့ ပြင်းထန်တဲ့ မိုးခေါင်မှုဖြစ်ရတဲ့ လတ်တလော အကြောင်းအရင်း ၂ ရပ်က မိုးရွာသွန်းမှု လျော့နည်းတာအပြင် တိုက်ဂရစ်နဲ့ ယူဖရေးတီးမြစ် အထက်ပိုင်းက နိုင်ငံတွေကနေ ရေစီးဆင်းမှု လျော့နည်းသွားတာကြောင့် ဖြစ်တယ်လို့ ပညာရှင်တွေက ပြောပါတယ်။

အခုနှစ်ဟာ နှစ် ၉၀ ကျော်အတွင်း အီရတ်မှာ အခြောက်သွေ့ဆုံးနှစ် ဖြစ်တယ်လို့ နိုင်ငံရဲ့ ရေအရင်းအမြစ်ဝန်ကြီးဌာနက ပြောပါတယ်။

ပုံမှန်မဟုတ်တဲ့ အပူချိန်တွေကြောင့် ဘက်ပေါင်းစုံမှာ အကျပ်အတည်း ဖြစ်နေတဲ့ အီရတ်အပေါ် ရာသီဥတုပြောင်းလဲမှုရဲ့ လေးနက်တဲ့ အကျိုးသက်ရောက်မှုတွေ ပေါ်ပေါက်နေပါတယ်။

မိုးခေါင်မှုနဲ့ ရေပမာဏ ကျဆင်းမှုတွေက သဘာဝပတ်ဝန်းကျင်၊ စိုက်ပျိုးရေးနဲ့ စီးပွားရေးတို့ကို လွှမ်းခြုံထားပါတယ်။

Source: Reuters