ဗြိတိန်မြို့တော် လန်ဒန်မှာ ခိုလှုံခွင့်တောင်းခံသူတွေ တည်းခိုတဲ့ ဘာဘီကံ သစ္စတယ် ဟိုတယ်အပြင်ဘက်မှာ ရွှေ့ပြောင်းနေထိုင်သူတွေကို ဆန့်ကျင်ဆန္ဒပြပွဲတွေနဲ့ တန်ပြန်ဆန္ဒပြပွဲတွေ သြဂုတ် ၂ ရက်က ပေါ်ပေါက်ခဲ့လို့ လူ ၉ ယောက်ကို ဖမ်းဆီးခဲ့ပါတယ်။

မြို့တော်ရဲတပ်ဖွဲ့က ဖမ်းဆီးခံရတဲ့လူဦးရေကို ဆိုရှယ်မီဒီယာပလက်ဖောင်း X မှာ ပို့စ်တခုနဲ့အတည်ပြုခဲ့ပြီး အရာရှိတွေက အုပ်စုနှစ်စုကို ခွဲထားခဲ့တယ်လို့လည်း ဖော်ပြခဲ့ပါတယ်။

Stand Up To Racism အဖွဲ့ကစီစဉ်တဲ့ တန်ပြန်ဆန္ဒပြသူတွေက နိုင်ငံမရှိ၊ နယ်စပ်မရှိ၊ ဒုက္ခသည်တွေကို ဒီမှာကြိုဆိုတယ်၊ လက်ယာစွန်းတွေရပ်လိုက်ပါ ဆိုတဲ့ စာတန်းတွေကို ကိုင်ဆောင်ထားပါတယ်။

ရွှေ့ပြောင်းနေထိုင်သူတွေကို ဆန့်ကျင်တဲ့သူတွေကတော့ အင်္ဂလန်အလံကို ဝှေ့ယမ်းရင်း 'သူတို့ကို အိမ်ပြန်ပို့ပါ' လို့ ကြွေးကြော်ခဲ့ပါတယ်။

‘သစ္စတယ်ဘာဘီကံ   က သွားဖို့လိုတယ် - ဒေသခံတွေက ဟင့်အင်းလို့ ပြောနေတယ်' ဆိုတဲ့ ဆိုင်းဘုတ်အောက်မှာ ဒေသခံတွေက ဆန္ဒပြခဲ့ကြတယ်လို့ မြို့တော်ရဲတပ်ဖွဲ့က သြဂုတ် ၁ ရက်က ထုတ်ပြန်တဲ့ ကြေညာချက်မှာ ဖော်ပြထားပါတယ်။

မန်ချက်စတာနဲ့ နယူးကာဆယ်မြို့တွေမှာလည်း ရွှေ့ပြောင်းနေထိုင်သူတွေကို ဆန့်ကျင်ဆန္ဒပြခဲ့ကြတယ်လို့ ဒေသတွင်းသတင်းတွေမှာ ဖော်ပြထားပါတယ်။

ဇူလိုင် ၃၀ ရက်ကနေ ဩဂုတ် ၃ ရက်နေ့အတွင်း ဗြိတိန်နိုင်ငံက မြို့ပေါင်း ၂၇ မြို့မှာ ရွှေ့ပြောင်းနေထိုင်မှုကိုဆန့်ကျင်ရေး ဆန္ဒပြပွဲတွေ ပျံ့နှံ့ခဲ့ပြီး မွတ်စလင်တွေနဲ့ လူဝင်မှုကြီးကြပ်ရေးဌာနတွေကို ပစ်မှတ်ထားရင်း အဓိကရုဏ်းတွေနဲ့ လူမျိုးရေးခွဲခြားတဲ့ တိုက်ခိုက်မှုတွေ ဖြစ်ပွားခဲ့ပါတယ်။

Source: Reuters