ပဲခူးတိုင်း၊ ကျောက်ကြီးမြို့နယ်ထဲမှာရှိတဲ့ စစ်ကောင်စီတပ်စခန်း ၂ ကို PDF ပူးပေါင်းတပ်ဖွဲ့တွေက ဇူလိုင် ၂၅ ရက်နေ့မှာ တိုက်ခိုက်သိမ်းပိုက်ရရှိခဲ့ပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၁၅ ယောက်ထက်မနည်းသေဆုံး၊ အများအပြားဒဏ်ရာရခဲ့တယ်လို့ ပြည်သူ့ကာကွယ်ရေးတပ်မတော်၊ ပဲခူးတိုင်း အမှတ် ၂ စစ်ဆင်ရေးနယ်‌‌မြေက ဇူလိုင် ၂၆ ရက်နေ့ညပိုင်းမှာ သတင်းထုတ်ပြန်ပါတယ်။

လက်နက်ခဲယမ်းတွေလည်းသိမ်းဆည်းရရှိခဲ့သလို PDF ရဲဘော် ၂ ယောက်လည်းကျဆုံးခဲ့တယ်လို့ ဆိုပါတယ်။

ပြည်သူ့ကာကွယ်ရေးတပ်မတော်၊ ပဲခူးတိုင်း အမှတ် ၂ စစ်ဆင်ရေးနယ်‌‌မြေရဲ့ ပြန်ကြားရေးတာဝန်ခံက “ကျောက်ကြီးမြို့နယ်ထဲက ရင်းတိုက်ကုန်းရွာနဲ့ လက်ပတ်ရွာတွေက အထိုင်ချတပ်စွဲထားတဲ့ စစ်ကောင်စီဘက်ကအထိုင်စခန်းတွေကို တိုက်ခိုက်သိမ်းပိုက်ရရှိခဲ့တာပါ။ အဲဒီတပ်စခန်းတွေကနေ လက်နက်ခဲယမ်းတွေလည်း သိမ်းဆည်းနိုင်ခဲ့ပါတယ်” လို့ ပြောပါတယ်။

ပြည်သူ့ကာကွယ်ရေးတပ်မတော် အမှတ် ၂ စစ်ဆင်ရေးနယ်‌‌မြေ၊ ပဲခူးတိုင်းစစ်ဌာန၊ ဗျူဟာ ၂၅၊ အမှတ် ၃၇၀၂ တပ်ရင်း၊ အထူးကွန်မန်ဒိုတပ်ရင်းနဲ့ KNLA တပ်ရင်း ၉ တို့ပူးပေါင်းပြီး ရင်းတိုက်ကုန်းကျေးရွာစစ်ကောင်စီရဲ့ ခမရ ၅၉၀ တပ်ရင်းရဲ့ ရှေ့တန်းအထိုင်စခန်းကို တိုက်ခိုက်ခဲ့ကြသလို လက်ပတ်ကျေးရွာစစ်ကောင်စီအထိုင်စခန်းကိုတော့ ပဲခူးတိုင်းစစ်ဌာန၊ ဗျူဟာ ၂၄၊ ၃၅၀၃ တပ်ရင်း၊ နဂါးနီတပ်ရင်း၊ ဗျူဟာ ၂၆၊ တော်ဝင်ဒေါင်းတပ်ရင်း၊ ၃၇၀၃ တပ်ရင်း၊ တောကျီးကန်းတပ်ရင်းတို့နဲ့အတူ KNLA တပ်ရင်း ၈ တို့ပူးပေါင်းတိုက်ခိုက်ခဲ့ကြတာဖြစ်တယ်လို့ သူက ဆက်ပြောပါတယ်။

တိုက်ပွဲတွေအတွင်း စစ်ကောင်စီတပ်ဖွဲ့​ဝင် ၁၅ ယောက်ထက်မနည်းသေဆုံးပြီး ထိခိုက်ဒဏ်ရာရသူ အများအပြားရှိသလို စခန်းစွန့်ခွာထွက်ပြေးသွားကြသူတွေရှိတယ်လည်း ဆိုပါတယ်။

တောင်ပိုင်းစစ်ဒေသ၊ အမှတ် ၂ စစ်ဒေသခွဲရဲ့ပြောရေးဆိုခွင့်ရှိသူ ဆရာလေး က “ရင်းတိုက်ကုန်းရွာစခန်းသိမ်းတိုက်ပွဲမှာ စစ်သား ၆ ယောက်သေနေတဲ့အလောင်းတွေတွေ့ရတယ်။ ခန့်မှန်း ၂၀ ကျော်ကတော့ ဒဏ်ရာတွေရလို့စခန်းစွန့်ပြီးထွက်ပြေးသွားတယ်။ အဲဒီတိုက်ပွဲထဲမှာ ကျနော်တို့ဘက်က ရဲဘော် ၁ ယောက် အသက်ပေးခဲ့ရပြီးတော့ ရဲဘော်တချို့ကတော့ မစိုးရိမ်ရတဲ့ဒဏ်ရာတွေရခဲ့​ကြတယ်။ နောက်တိုက်ပွဲကတော့ လက်ပတ်ရွာ စစ်တပ်အထိုင်စခန်းသိမ်း တိုက်ပွဲပေါ့။ အဲဒီတိုက်ပွဲတွေကို စစ်တောင်းမြစ်ဝှမ်းစစ်ဆင်‌ရေး JOC (Joint Operation Command - ပူးတွဲစစ်ဆင်ရေးကွပ်ကွဲမှု) အစီအမံနဲ့ဆောင်ရွက်ခဲ့ကြတာပါ။ စခန်းသိမ်းတိုက်ပွဲတွေထဲမှာပိတ်မိနေတဲ့ သူတို့ဘက်က တပ်မိသားစုဝင်တွေကို ကျနော်တို့ကယ်ထုတ်နိုင်ခဲ့ပြီးတော့ လွတ်တဲ့နေရာအထိပို့ပြီး ကယ်ဆယ်နိုင်ခဲ့တယ်” လို့ DVB ကို ပြောပါတယ်။

လက်ပတ်ကျေးရွာ စစ်တပ်အထိုင်စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၁၀ ယောက်ထက်မနည်း ထိခိုက်သေဆုံးခဲ့သလို PDF ပူးပေါင်းတပ်ဖွဲ့တွေဘက်ကလည်း ရဲဘော် ၁ ယောက် ကျဆုံးခဲ့ပြီး ရဲဘော် ၂ ယောက်က မစိုးရိမ်ရတဲ့ထိခိုက်ဒဏ်ရာတွေရခဲ့တယ်လို့ သူက ဆက်ပြောပါတယ်။

Photo : ပြည်သူ့ကာကွယ်ရေးတပ်မတော်၊ ပဲခူးတိုင်း အမှတ် ၂ စစ်ဆင်ရေးနယ်‌‌မြေ