မန္တလေးတိုင်း၊ တောင်သာမြို့နယ်မှာ စစ်ကောင်စီတပ်ဖွဲ့ဝင်အရာရှိ ၁ ယောက်ရဲ့ဖခင်ဖြစ်သူ အုပ်ချုပ်ရေးမှူးကို စစ်တပ်က ဖမ်းဆီးရိုက်နှက်သတ်ဖြတ်ပြီး အလောင်းကို လမ်းဘေးမှာ စွန့်ပစ်သွားတယ်လို့ တောင်သာမြို့နယ် လူထုလှုပ်ရှားမှုကော်မတီဆီကနေ သိရပါတယ်။

တောင်သာမြို့နယ် လူထုလှုပ်ရှားမှုကော်မတီရဲ့ ပြောရေးဆိုခွင့်ရှိသူတယောက်က “တမိုက်သာရွာက စစ်ကောင်စီခန့်အုပ်ချုပ်ရေးမှူး ကိုဘိုရဲ ကို စစ်တပ်ကဖမ်းပြီး သတ်ပစ်တယ်။ သူ့သားက စစ်တပ်ထဲမှာ ဗိုလ် ၁ ယောက်ရှိတယ်။ အခုချိန်ထိ စစ်တပ်တာဝန်ထမ်းဆောင်နေတုန်းပဲ။ နောက်ပြီးတော့ ကိုဘိုရဲ က  ကြံ့ဖွတ်ပါတီက မြို့တော်ဝန်ဟောင်း အောင်သိန်းလင်းရဲ့ တူ(ဝမ်းကွဲ)တော်တယ်လို့လည်းသိရတယ်” လို့ ပြောပါတယ်။

စစ်ကောင်စီတပ်ဖွဲ့ဝင်တွေဟာ ပြီးခဲ့တဲ့ ဇွန် ၂၀ ရက်နေ့ဝန်းကျင်ကတည်းက တမိုက်ရွာမှာ ဝင်ရောက်တပ်စွဲ​ပြီး အုပ်ချုပ်ရေးမှူး ကိုဘိုရဲ အပါအဝင် ကျေးရွာက အမျိုးသား ၁၀ ယောက် ထက်မနည်းကိုလည်း ဖမ်းဆီးခဲ့တာလို့ သူက ဆက်ပြောပါတယ်။

စစ်ကောင်စီတပ်ဖွဲ့ဝင်တွေဖမ်းဆီးထားတဲ့ အုပ်ချုပ်ရေးမှူး ကိုဘိုရဲ ရဲ့ ရုပ်အ​လောင်းကို ဇူလိုင် ၂၁ ရက်နေ့ ညနေပိုင်းမှာတော့ တမိုက်သာကျေးရွာအနီးက လမ်းဘေးတနေရာမှာ စစ်ကောင်စီတပ်ဖွဲ့ဝင်တွေက လာရောက်စွန့်ပစ်သွားတာဖြစ်တယ်လို့ ဆိုပါတယ်။

တောင်သာမြို့နယ်အခြေစိုက် တော်လှန်ရေးရဲဘော်တယောက်က “တမိုက်သာရွာက ပျူရွာပါ။ ဇွန်လဆန်းပိုင်းထဲတုန်းက တော်လှန်ရေးတပ်ဖွဲ့တွေ အဲဒီ တမိုက်သာရွာကို ဝင်တိုက်သေးတယ်။ တိုက်ခိုက်မှုပြီးတဲ့နောက်မှာ စစ်တပ်ဘက်က အဲဒီရွာကို အထိုင်လာချတာ ၁ လ လောက်ရှိပြီ။ စစ်တပ်အထိုင်လာချကတည်းက ကိုဘိုရဲ တို့ကိုဖမ်းထားတာ။ ဘာကြောင့်ဖမ်းထားတယ် ဆိုတာတော့မသိဘူး။ ကိုဘိုရဲ သေတာကလည်း သူတို့နှိပ်စက်တာ လက်လွန်သွားတယ်လို့ကြားတယ်။ ကိုဘိုရဲ ရဲ့အလောင်းကို လမ်းဘေးမှာပစ်သွားတာကတော့ သွားရင်းလာရင်း PDF က ပစ်သွားတဲ့ပုံစံဖြစ်အောင်ဖန်တီးတာပါ။ ကျန်တဲ့ရွာသားတွေကိုတော့ ဆက်ဖမ်းထားတယ်လို့ သိရတယ်” လို့ DVB ကို ပြောပါတယ်။

မြင်းခြံ-ညောင်ဦးကားလမ်းပိုင်းပေါ်က တမိုက်သာကျေးရွာအပါအဝင် ၁၀ ရွာဝန်းကျင်ရှိတဲ့ ပျူစောထီးကျေးရွာတွေကို စစ်ကောင်စီဘက်က ဇူလိုင် ၂၂ နေ့အထိ စစ်သည်အင်အားနဲ့ ရိက္ခာတွေပို့ဆောင်ပေးနေတယ်လို့လည်း သူက ဆက်ပြောပါတယ်။

မြင်းခြံ-ညောင်ဦးကားလမ်းပိုင်းပေါ်မှာ စစ်ကောင်စီတပ်ဖွဲ့ဝင်တွေကို တော်လှန်ရေး တပ်ဖွဲ့ဝင်တွေက မကြာခဏကြားဖြတ်တိုက်ခိုက်နေတာကြောင့် ခရီးသွားပြည်သူတွေ အနေနဲ့လည်း စစ်ကောင်စီယာဉ်တန်းတွေနဲ့ အနီးကပ်လိုက်ပါ မောင်းနှင်တာတွေမလုပ်ကြဖို့ သတိပေးနှိုးဆော်ထားတယ်လို့လည်း တောင်သာမြို့နယ်အခြေစိုက် တော်လှန်ရေး တပ်ဖွဲ့ဝင်တွေဆီကနေ သိရပါတယ်။