အိမ်နီးချင်း ၂ နိုင်ငံအကြား တိုက်ပွဲတွေဖြစ်နေချိန်မှာပဲ ဇူလိုင် ၂၄ ရက်မှာ ထိုင်းအာဏာပိုင်တွေ ဟာ ကမ္ဘောဒီးယားနဲ့ ထိစပ်တဲ့ နယ်စပ်ဂိတ်တွေ အားလုံးကို ပိတ်ပစ်ကြောင်း ကြေညာခဲ့ပါတယ်။

အခြေအနေတွေ တင်းမာလာကတည်းက အထူးကြပ်မတ်စင်တာအနေနဲ့ နယ်စပ်တလျှောက် လုံခြုံရေး အစီအမံတွေကို အဆင့် ၂ ကနေ တိုးမြှင့်လုပ်ဆောင်ခဲ့ကြောင်း၊ ထိုင်း-ကမ္ဘောဒီးယား နယ်စပ်တလျှောက်က နယ်စပ် စစ်ဆေးရေးဂိတ်တွေကို အပြီးအပြတ်ပိတ်သိမ်းဖို့ အဆင့် ၄ ဆင့်ကို တိုးမြှင့်ဆောင်ရွက်ထားပါတယ်လို့ ထိုင်း-ကမ္ဘောဒီးယား နယ်စပ်ဒေသ စီမံခန့်ခွဲရေး (SOC-TCBSM) မှ အထူးအလုပ်အဖွဲ့မှ ပြောရေးဆိုခွင့်ရှိသူ ရေတပ်ဗိုလ်ချုပ်ကြီး ဆူရာစန့် ကုံးစီရီ က ပြောပါတယ်။ 

လောလောဆယ်မှာတော့ ကမ္ဘောဒီးယားဘက်က BM-21 ဒုံးပစ်လောင်ချာမျိုးစုံနဲ့ ၁၂၂ မီလီမီတာ အမြောက်တွေလို လက်နက်ကြီးတွေ ချထားပြီး ဆူရင်ပြည်နယ် ကက်ပ်ချုံးခရိုင်ရှိ လူနေအိမ်တွေနဲ့ နယ်စပ်ဒေသ ဖွံ့ဖြိုးတိုးတက်ရေးစင်တာတို့ အပါအဝင် ထိုင်းနယ်စပ်တလျှောက်ရှိ အရပ်သားနေအိမ်တွေနဲ့ အများပြည်သူ အဆောက်အအုံတွေ၊  ထိခိုက်ပျက်စီးမှုတွေရှိခဲ့ကြောင်း (SOC-TCBSM) မှ အထူးအလုပ်အဖွဲ့မှ ပြောရေးဆိုခွင့်ရှိသူ ဆူရာစန့် ကုံးစီရီက ပြောပါတယ်။

ထိုင်းဘက်ခြမ်းက အရပ်သားတွေကို ဘေးလွတ်ရာကို ရွှေ့ပြောင်းပေးခဲ့ကြောင်းလည်း ဆိုပါတယ်။

ဇူလိုင် ၂၄ ရက်က ကမ္ဘောဒီးယားနိုင်ငံနဲ့ နယ်နိမိတ်ချင်း ထိစပ်နေတဲ့ ထိုင်းနိုင်ငံ ဆီဆာကတ်ခရိုင်၊ ကန်ထရာလက်ရှိ ဂက်စ်ဆိုင်တဆိုင်မှာ မီးလောင်မှုကြောင့် လူ ၆ ယောက် သေဆုံးသွားကြောင်း အာဏာပိုင်တွေက ပြောပါတယ်။ 

ဂက်စ်ဆိုင်ဘေးရှိ ဂိုဒေါင် တခုကနေ မီးခိုးလုံးတွေ ထွက်နေတာကို မြင်ရပြီး အခင်းဖြစ်ပွားရာ နေရာမှာ မီးသတ်သမားတွေက မီးငြှိမ်းသတ်ဖို့ လုပ်ဆောင်နေကြပါတယ်။ အဲဒီနေရာမှာ လူ ၆ ယောက် သေဆုံးသွားပြီး ၁၀ ယောက် ဒဏ်ရာရရှိခဲ့ကြောင်း စစ်တပ်က ပြောပါတယ်။ 

ကြာသပတေးနေ့မှာ ထိုင်း F-16 တိုက်လေယာဉ်တစင်းဟာ ကမ္ဘောဒီးယားရှိ ပစ်မှတ်တွေကို ဗုံးကြဲတိုက်ခိုက်ခဲ့ကြောင်း ၂ ဖက်စလုံးမှ ပြောကြားခဲ့ပါတယ်။ 

နယ်စပ်အငြင်းပွားမှုတွေကြောင့် သီတင်းပတ်တွေအတွင်း တင်းမာမှုတွေ တဖြည်းဖြည်း မြင့်တက် လာပြီးနောက်မှာ ပဋိပက္ခတွေ အရှိန်မြင့်လာကာ အရပ်သားအနည်းဆုံး ၂ ယောက် သေဆုံးခဲ့ရ ပြီးနောက်မှာ ဗုံးကြဲတိုက်ခိုက်မှု လုပ်ဆောင်ခဲ့တာပါ။ 

အငြင်းပွားနယ်စပ်တလျှောက်မှာ ထိုင်းစစ်တပ် အသင့်ဖြန့်ချ ပြင်ဆင်ထားတဲ့ F-16 တိုက်လေယာဉ် ၆ စင်းထဲမှ တစ်စင်းဟာ ကမ္ဘောဒီးယားကို ပစ်ခတ်ခဲ့ပြီး စစ်ရေးပစ်မှတ် တခုကို ဖျက်ဆီးခဲ့ကြောင်း ထိုင်းစစ်တပ်က ပြောပါတယ်။ 

ကြာသပတေးနေ့ အစောပိုင်းမှာ တိုက်ပွဲတွေ စတင်ဖြစ်ပွားခဲ့တဲ့အပေါ်  ၂ နိုင်ငံစလုံးက အပြန်အလှန် စွပ်စွဲထားပါတယ်။ 

Source:Reuters