ကချင်လွတ်လပ်ရေးအဖွဲ့ (KIO/KIA)  ဥက္ကဋ္ဌဟောင်း အသက် ၈၇ နှစ်အရွယ်  ဦးလညော်ဇောင်းဟရားဟာ  မေ ၁၅ ရက် မနက် ၇ နာရီ ၁၅ မိနစ်က ကာလရှည်ကြာ နာမကျန်းဖြစ်ပြီး လိုင်ဇာမှာ ကွယ်လွန်သွားပြီလို့ ဒေသခံတွေနဲ့  KIA နဲ့ နီးစပ်သူတွေဆီက သိရပါတယ်။

ဒေသခံ အမျိုးသားတယောက်က “KIO/KIA ဥက္ကဋ္ဌဟောင်း ဦးလညော်ဇောင်းဟရား ကွယ်လွန်သွားပြီ။ အသက်လည်ကြီးပြီ။ နာမကျန်းဖြစ်နေတာလည်း ကြာပြီ။ KIO/KIA ဥက္ကဋ္ဌ ရာထူးကနေ အနားယူတာတော့ ၈ နှစ်လောက်ရှိပြီ” လို့ ပြောပါတယ်။

KIA နဲ့ နီးစပ်သူတယောက်က “အသက်ကြီးသွားလို့ ဥက္ကဋ္ဌ တာဝန်ကနေ အနားယူလိုက်တာပါ။ သူ တာဝန်ထမ်းတဲ့ သက်တမ်းတောင် အနှစ် ၆၀ နီးပါး ရှိတယ်။ အသက်ကြီးသွားလို့ ဥက္ကဋ္ဌ တာဝန်ကို ဗိုလ်ချုပ်ကြီး အင်ဘန်လကို လွှဲပြောင်းပေးခဲ့တာပါ” လို့ ပြောပါတယ်။

လိုင်ဇာ၊ ရပ်ကွက် ၁ မှာ နေထိုင်တာဖြစ်ပြီး လွန်ခဲ့တဲ့ ၂ နှစ်၊ ၃ နှစ်ခန့်ကတည်းက ဥက္ကဋ္ဌကြီးက နာမကျန်းဖြစ်နေခဲ့တာလို့ ဆိုပါတယ်။

ဦးလညော်ဇောင်းဟရားဟာ ၁၉၆၀ ပြည့်နှစ်မှာ ရန်ကုန်တက္ကသိုလ်ကနေ ဘွဲ့ရရှိခဲ့ပြီး ၁၉၆၄ ခုနှစ်မှာ KIA တပ်ဖွဲ့ထဲ စတင်ဝင်ရောက်ခဲ့ပါတယ်။ 

KIO/KIA ဥက္ကဋ္ဌ ဗိုလ်ချုပ် လမုန်တူးဂျိုင် ကွယ်လွန်သွားပြီးနောက် ၂၀၀၆ ဇူလိုင်လကနေ ၂၀၁၇ ဒီဇင်ဘာလအထိ KIO/KIA ရဲ့ ဥက္ကဋ္ဌ တာဝန်ကို ထမ်းဆောင်ခဲ့ကာ ၂၀၁၈ ဇန်နဝါရီ ၂ ရက်နေ့ကမှ KIO/KIA ရဲ့ ဥက္ကဋ္ဌ ရာထူးကို ဗိုလ်ချုပ်ကြီး အင်ဘန်လကို လွှဲပြောင်းပေးခဲ့ကြောင်း သိရပါတယ်။