ကရင်နီပြည်၊ ဖားဆောင်းမြို့နယ်ထဲက မော်ချီးဒေသကို စစ်ကောင်စီတပ်က ဧပြီ ၂၆ ရက် ဒီနေ့မှာ လေကြောင်းကနေ ထပ်ပြီးဗုံးကြဲတိုက်ခိုက်ခဲ့တာကြောင့် ဒေသခံပြည်သူ ၃ ‌ယောက် ထိခိုက်ဒဏ်ရာရပြီး နေအိမ်တချို့လည်း ထိခိုက်ပျက်စီးခဲ့ရတယ်လို့ ဒေသခံတွေက ပြောပါတယ်။

နေ့လယ် ၁၂ နာရီ ၁၅ မိနစ်မှာ မော်ချီးဒေသက နေရာ ၃ ခုကို လေကြောင်းကနေ ဗုံးကြဲတိုက်ခိုက်ခဲ့တာဖြစ်ပြီး ပြည်သူ ၃ ယောက်၊ ဘုရားကျောင်း၊ နေအိမ်တချို့နဲ့ ကား ထိခိုက်ပျက်စီးခဲ့တယ်လို့ ဒေသခံတယောက်က ပြောပါတယ်။

“လက်နက်အစမှန်ပြီး ခေါင်းနဲ့လက်ထိတယ်။ နောက် ၂ ယောက်လည်း ထိတယ်၊ ၃ နေရာတောင် ကြဲတာဆိုတော့ ထိခိုက်မှုကများတယ်” လို့ ပြောပါတယ်။

ဧပြီ ၂၄ ရက်နေ့ကလည်း မော်ချီး အမှတ် ၂ အနီးကို လေကြောင်းကနေ ဗုံးကြဲတိုက်ခိုက်ခဲ့တဲ့အတွက် ပြည်သူ ၆ ယောက် သေဆုံး၊ ၁၀ ယောက် ဒဏ်ရာရပြီး နေအိမ်တွေ ထိခိုက်ပျက်စီးခဲ့ရပါတယ်။

ဒါ့အပြင် မတ် ၇ ရက်နေ့ကလည်း လေကြောင်းကနေ ဗုံးကြဲခဲ့တာကြောင့် ပြည်သူ ၂ ယောက် သေဆုံးပြီး ၁၀ ယောက်ထက်မနည်း ထိခိုက်ဒဏ်ရာရရှိခဲ့ကာ ဒီတခါက ၃ ကြိမ်မြောက် ဗုံးကြဲတိုက်ခိုက်ခံရတာဖြစ်ပါတယ်။

မော်ချီးဒေသကို စစ်ကောင်စီတပ်က ဗုံးကြဲတိုက်ခိုက်တာတွေရှိတဲ့အတွက် ပြည်သူတွေအနေနဲ့ ဗုံးခိုကျင်းတွေ တူးထားကြဖို့ Karenni National Solidarity Organization KNSO က မတ်  ၁၀ ရက်နေ့က အသိပေးထုတ်ပြန်ထားပါတယ်။