စစ်ကိုင်းတိုင်း၊ ဘုတလင်မြို့နယ်နဲ့ ကနီမြို့နယ်ကို စစ်တပ်က လက်နက်ကြီး၊ စက်တပ်လေထီးနဲ့ ပစ်ခတ်ဗုံးကြဲလို့  ပြည်သူ ၄ ယောက် သေဆုံးပြီး တချို့ဒဏ်ရာရခဲ့ပါတယ်။

ဘုတလင်မြို့နယ်အတွင်းကို နမခအထိုင်စခန်းက ဧပြီ ၂၅ ရက်နေ့ မနက် ၁၁ နာရီ ၁၅ မိနစ်ကနေ ၁၁ နာရီ ၄၅ မိနစ်အထိ လက်နက်ကြီး ၄ လုံး ပစ်ခတ်ခဲ့တယ်လို့ ဒေသခံတွေဆီက သိရပါတယ်။

ဘုတလင်မြို့နယ် ဒေသခံတယောက်က “ပစ်တာက ဟောင်ဝှစ်ဇာလက်နက်ကြီး ၄ လုံးနဲ့ ပစ်ခတ်တာဗျ။ ကျရောက်ပေါက်ကွဲတဲ့ နေရာက ဘုတလင်နယ် အရှေ့တောင်ပိုင်းက ဆိတ်လူးအိုင်ရွာ၊ အောင်သာရွာနဲ့ ရွာဟောင်းရွာ စတဲ့ ၃ ရွာကြားက လမ်းဆုံကိုကျတာဗျ။ လမ်းဆုံမှာ ဈေးရောင်းတဲ့ ဈေးဆိုင်ရှေ့ကိုကျပြီး ဈေးရောင်းနေတဲ့ အသက် ၅၀ ကျော်အရွယ် ဒေါ်ပြုံးချို ရင်ဘတ်ဖောက်ထွက်ဒဏ်ရာနဲ့ သေဆုံးခဲ့ရတယ်ဗျ။ ဈေးဆိုင်လည်း ထိခိုက်ပျက်စီးတယ်ဗျ” လို့ ပြောပါတယ်။

စစ်ကောင်စီတပ်က လက်နက်ကြီးနဲ့ပစ်ခတ်လို့ ရွာဟောင်းရွာ၊ ဆိတ်လူးကန်ရွာနဲ့ အောင်သာရွာက ပြည်သူတွေ ထွက်ပြေးတိမ်းရှောင်နေကြရပြီး ဧပြီ ၂၄ ရက်ကလည်း ကြို့ကုန်းရွာကို စက်တပ်လေထီးနဲ့ ဗုံးကြဲတာကြောင့် အမျိုးသမီး ၁ ယောက်နဲ့ အမျိုးသား ၁ ယောက် သေဆုံးခဲ့ရပါသေးတယ်။

ကနီမြို့နယ်မှတော့ ဧပြီ ၂၅ ရက် မနက် ၇ နာရီလောက်က ဆူးလေကုန်းကျေးရွာကို နမခ က တက်လာတဲ့ စက်တပ်လေထီးနဲ့ ဗုံးကြဲတိုက်ခိုက်သွားတယ်လို့ ဒေသခံတွေဆီကနေ သိရပါတယ်။

ဆူးလေကုန်းရွာသားတယောက်က “စက်တပ်လေထီးနဲ့ ၂ ကြိမ်ကြဲသွားတာပါဗျ။ တကြိမ်က ရွာအစပ်ကျပါတယ်။ ကျန်တဲ့တကြိမ်ကတော့ တောထဲမှာကျတာပါ။ ဗုံးစထိမှန်ပြီး သေဆုံးတဲ့ အမျိုးသားကတော့ ကိုစိုးနိုင်လို့ ခေါ်တယ်ဗျ။ တောကနေ တောင်သူလုပ် ပြန်လာရင်း ဗုံးစထိမှန်ပြီး သေဆုံးခဲ့ရတယ်။ ဗုံးစမှန်ပြီး ထိခိုက်ဒဏ်ရာရသူတွေလည်း ရှိနေသေးပါတယ်ဗျ။ ၅ နှစ်သားအရွယ် ကလေးငယ်တဦးနဲ့ အမျိုးသမီးတဦး ပြင်းထန်ဒဏ်ရာရရှိခဲ့ပြီး ဆေးကုသပေးနေတယ်” လို့ ပြောပါတယ်။

ဆူလေကုန်းရွာကို စစ်တပ်က စက်တပ်လေထီးနဲ့ အကြိမ်ကြိမ် ဗုံးကြဲချနေပြီး ပြီးခဲ့တဲ့ ဖေဖော်ဝါရီ ၇ ရက်နေ့ကလည်း ဗုံးကြဲလို့ အမျိုးသား ၁ ယောက် သေဆုံးခဲ့ပါတယ်။

ကနီမြို့နယ် ပြည်သူ့ကာကွယ်ရေးတပ်ဖွဲ့ဝင်တယောက်က “စစ်တပ်ကတော့ အပစ်ခတ်ရပ်စဲမှုကို ၁ ပတ် သက်တမ်းထပ်တိုးတယ်‌‌လို့ ကြေညာပြီး မြေပြင်မှာ ထင်သလို ပြည်သူကို သတ်ဖြတ်နေတယ်။ ဆူးလေကုန်းရွာကို ၁၂၀ မမနဲ့ ဗုံးသီး ၂ လုံးချတယ်။ အိုင်တောင်ရွာ၊ နတ်ကြီးရွာတွေကိုလည်း ဗုံးသီးချတယ်။ အဲရွာတွေကတော့ လူအထိခိုက်မရှိဘူးလို့သိရတယ်။ စစ်တိုက်တယ်ဆိုရင် စစ်ကို စစ်နဲ့ တူအောင်တိုက်ပါ။ အောက်တန်းစား စစ်ပရိယာယ်ဆိုတဲ့ စကားလုံးလေးသုံးပြီး အရပ်သားပြည်သူတွေကို ထပ်ပြီး သတ်မနေပါနဲ့။ သတ္တိရှိရင် မြေပြင်စစ်ကြောင်းထိုးလာပါလို့ပဲ ပြောချင်ပါတယ်” လို့ ပြောပါတယ်။

ဧပြီ ၁၄ ရက်ကလည်း ကနီမြို့နယ်က ကျေးရွာ ၇ ရွာကို စစ်တပ်က လေကြောင်းကနေ Y12၊ Mi 35၊ ဒရုန်းနဲ့ စက်တပ် လေထီးတွေနဲ့ပါ ဗုံးကြဲတိုက်ခိုက်ခဲ့ပါသေးတယ်။