ရှမ်းပြည်နယ်တောင်ပိုင်း၊ မိုင်းပွန်မြို့နယ် အခြေစိုက် ခမရ ၅၁၇ တပ်ရင်းကနေ စစ်ကောင်စီတပ်သားအဖြစ် ပေါ်တာဆွဲခံရသူ ၂ ယောက် လွိုင်ကော်မြို့နယ် ဒေသခံ ပြည်သူ့ကာကွယ်ရေးတပ် Loikaw Local PDF ဆီမှာ ဧပြီ ၁၉ ရက်က ဘက်ပြောင်း ခိုလှုံခဲ့တယ်လို့ တပ်ရင်းက ထုတ်ပြန်ထားပါတယ်။
စစ်ကောင်စီတပ်ရဲ့ စစ်မှုထမ်းအပတ်စဥ် ၅ နဲ့ ၆ က သင်တန်းဆင်း တပ်သား ၂ ယောက်က ကိုယ်ပိုင်အမှတ် ပစ - ၁၂၆၈၅၂ နဲ့ ပစ - ၁၂၅၀၂၇ ဖြစ်တယ်လို့ ဆိုပါတယ်။
စစ်ကောင်စီတပ်ရဲ့ ရှောင်တခင် ဖမ်းဆီးခံခဲ့ရပြီး ရှေ့တန်းကို ရောက်လာချိန်မှာ စစ်မတိုက်လိုတဲ့အတွက် ဘက်ပြောင်းခိုလှုံလာခဲ့ပြီး ခုလက်ရှိမှာတော့ လုံခြုံစိတ်ချရတဲ့ နေရာတွေမှာ ပို့ဆောင်ထားတယ်လို့ သိရပါတယ်။
Loikaw Local PDF ပြန်ကြားရေးတာဝန်ခံက “CDM ကတော့ အခု ဒီ ၂၀၂၃ ကနေ ၂၀၂၅ အတွင်း အားလုံး ၈ ယောက်ရှိပြီပေါ့နော်” လို့ ပြောပါတယ်။
စစ်ကောင်စီတပ်ရဲ့ ပြည်သူ့စစ်အဖြစ် အတင်းအဓမ္မ ပေါ်တာဆွဲခံရသူတွေက နီးစပ်ရာ တပ်ရင်းတွေကို ချိတ်ဆက်ပြီး လက်နက်ရှိ၊ လက်နက်မဲ့ အလင်းဝင်နေကြပါတယ်။
