စစ်ကိုင်းတိုင်း၊ တန့်ဆည်မြို့နယ်ရှိ လယ်မရွာဘုန်းတော်ကြီးကျောင်းကို စစ်ကောင်စီတပ်က ဧပြီ ၁၃ ရက် ညနေ ၃ နာရီခွဲက စတင်ပြီး လေကြောင်းတိုက်ခိုက်ခဲ့တယ်လို့ ဒေသခံတွေဆီကနေ သိရပါတယ်။
အဆိုပါ လယ်မကျေးရွာဟာ အိမ်ခြေ ၁၀၀ နီးပါးရှိပြီး ရေဦး-တန့်ဆည်-ကလေးဝသွား ကားလမ်းမဘေးမှာ တည်ရှိတဲ့ ကျေးရွာတရွာ ဖြစ်တယ်လို့လည်း သိရပါတယ်။
ဒေသခံရွာသားတယောက်က “ဗုံးသီးက ၄ လုံး ကြဲသွားတာ။ တခါကြဲရင် ၂ လုံးတွဲနဲ့ ၂ ကြိမ် ကြဲတာဗျ။ မြေပြင်မှာတော့ ဘာတိုက်ပွဲမှ မရှိဘူးဗျ။ သင်္ကြန်အခါကာလမှာ ဘုန်းကြီးကျောင်းမှာ သက်ကြီးရွယ်အိုတွေ ဥပုသ်စောင့်တဲ့ အချိန်လေဗျာ။ ဒါကို စစ်တပ်က မသိကြဘူးလား။ အခုတော့ ဘုန်းကြီးကျောင်း မီးလောင်တယ်။ ဘုရားစေတီ ပျက်စီးတယ်။ လူကတော့ လောလောဆယ် အမျိုးသမီးကြီးတဦး သေဆုံးတယ်။ ၃ ယောက် ဒဏ်ရာရတယ်။ ကျောင်းထိုင် ဘုန်းတော်ကြီးလည်း ပျောက်ဆုံးနေသေးတယ်ဗျ။ သေဆုံးအထိအခိုက်ကတော့ အခုလောလောဆယ် အတိအကျ အတည်ပြုမရသေးဘူးအစ်ကို။ ဘုန်းတော်ကြီးကျောင်း မီးလောင်နေလို့ မီးငြှိမ်းနေရတယ်” လို့ ပြောပါတယ်။
လယ်မရွာကို လာရောက်တိုက်ခိုက်တဲ့ စစ်တပ်လေယာဉ်ဟာ ဂျက်ဖိုက်တာ အမျိုးအစားဖြစ်ပြီး မိတ္ထီလာ ရှမ်းတဲလေတပ်ကနေ လာရောက်တိုက်ခိုက်သွားတာလို့လည်း သိရပါတယ်။
တန့်ဆည်မြို့နယ် ABSDF ရဲဘော်တယောက်က “ဂျက်ဖိုက်တာက ၂ စီးနဲ့ ဗုံးကြဲသွားတာ။ လောလောဆယ်တော့ အသေအဆုံးက အမျိုးသမီးကြီးတဦးနဲ့ ထိခိုက်ဒဏ်ရာ ၃ ဦးပဲ အတည်ပြုလို့ရသေးတယ်။ ကျန်တာကတော့ ဘာမှ အတိအကျ ပြောလို့မရသေးဘူး” လို့ ပြောပါတယ်။
စစ်တပ်က ဧပြီ ၁၂ ရက်ကလည်း ဒီပဲယင်းမြို့နယ်၊ ကြာခတ်ရွာ ဘုန်းတော်ကြီးကျောင်းကို လေယာဉ်နဲ့ ဗုံးကြဲလို့ ကိုရင် ၃ ပါး အပါအဝင် ပြည်သူ ၂ ယောက် သေဆုံးခဲ့ပြီး ဘုန်းတော်ကြီးကျောင်းနဲ့ ဓမ္မာရုံအဆောက်အအုံတွေ ပျက်စီးခဲ့တယ်လို့ သိရပါတယ်။
