မကွေးတိုင်း၊ ရေစကြိုမြို့နယ် စာသင်ကျောင်းကို စစ်ကောင်စီတပ်က ဧပြီ ၁၂ ရက်၊ မနက် ၁၀ နာရီဝန်းကျင်မှာ ဗုံးကြဲတိုက်ခိုက်ခဲ့တာကြောင့် စာသင်ဆောင်ပျက်စီးသွားခဲ့တယ်လို့ ရေစကြိုမြို့နယ်သတင်းအချက်အလက်ကော်မတီဆီကနေ သိရပါတယ်။
ရေစကြိုမြို့နယ်သတင်းအချက်အလက်ကော်မတီရဲ့ ပြောရေးဆိုခွင့်ရှိသူက “ရေစကြိုရေလယ်ကျွန်းဒေသမှာရှိတဲ့ သာဂေါင်လေးရွာက စာသင်ကျောင်းကို စစ်တပ်ရဲ့ ဂျက်ဖိုက်တာ ၂ စင်းက ပေါင် ၂၀၀ ဗုံး ၂ လုံး ကြဲသွားခဲ့တာပါ” လို့ ပြောပါတယ်။
Southern YSO PDF တာဝန်ခံ ကိုအောင်မောင်း က “အခုဗုံးကြဲခံရတဲ့ သာဂေါင်လေးရွာက အခုနှစ်ထဲမှာတင် ဒါနဲ့ဆို ၃ ကြိမ်ထက်မနည်းဗုံးကြဲခံရပြီ။ အဲ့တုန်းကတော့ ပြည်သူအသေအပျောက်ရှိခဲ့တယ်။ အခုဖြစ်စဥ်မှာတော့ လေယာဥ်သံကြားတဲ့အချိန် ကလေးတွေကို ဖယ်ထုတ်နိုင်ခဲ့လို့ ကလေးတွေ ထိခိုက်တာမရှိပေမဲ့ ပြည်သူတချို့တော့ မစိုးရိမ်ရတဲ့ဒဏ်ရာတွေရခဲ့ကြတယ်။ စာသင်ဆောင်က ရစရာမရှိအောင် ပျက်စီးသွားတယ်။ တိုက်ပွဲမရှိ ေ-စစ်ကြောင်းမရှိဘဲ အသားလွတ်ဗုံးကြဲသွားတာ” လို့ DVB ကိုပြောပါတယ်။
ပြီးခဲ့တဲ့ မတ်လဆန်းပိုင်းမှာလည်း စစ်ကောင်စီစစ်ကြောင်းက အဆိုပါရေလယ်ကျွန်းဒေသကို စစ်ကြောင်းထိုး ဝင်ရောက်မီးရှို့ဖျက်ဆီးခဲ့သေးလို့ လူနေအိမ်အများအပြား မီးလောင်ပျက်စီးကာ ပြည်သူ သောင်းနဲ့ချီပြီး ထွက်ပြေးခဲ့ကြရတယ်လို့ ဒေသခံတွေဆီကနေ သိရပါတယ်။
Photos .... ရေစကြိုမြို့နယ်သတင်းအချက်အလက်ကော်မတီ
