စစ်ကိုင်းတိုင်း၊ ကောလင်းမြို့နယ်ကို စစ်ကောင်စီက နေ့တိုင်းဆိုသလို လေကြောင်းကနေ ဗုံးကြဲပစ်ခတ်တိုက်ခိုက်နေပြီး ဧပြီ ၁၃ ရက် ဒီနေ့လယ်မှာလည်း ရွှေဘို-မြစ်ကြီးနား ကားလမ်းဘေးက ညောင်ကုန်းကို အကြမ်းဖက်စစ်ကောင်စီက လေယာဉ်နဲ့ ပစ်ခတ်တိုက်ခိုက်လို့ အဆောက်အအုံတွေ ပျက်စီးမီးလောင်ပြီး ပြည်သူ ၂ ယောက် ဒဏ်ရာရသွားပါတယ်။
မြေပြင်စစ်ဆင်ရေးမရှိဘဲ ၁၂ နာရီ ၆ မိနစ်မှာ မိတ္ထီလာလေတပ်က တက်လာတဲ့ တိုက်လေယာဉ်က မြို့နယ်အရှေ့ခြမ်းမှာ မိနစ်နည်းနည်းပျံဝဲပြီး ၁၂ နာရီ ၁၂ မိနစ်မှာ ပစ်ခတ်တိုက်ခိုက်တာလို့ Kawlin Revolution-KR က ထုတ်ပြန်ထားပါတယ်။
၃ ကြိမ်ပစ်ခတ်ခဲ့ပြီး ဆီဆိုင်ကို ထိမှန်တာကြောင့် မီးလောင်ပျက်စီးခဲ့သလို အမျိုးသား ၁ ယောက်နဲ့ အမျိုးသမီး ၁ ယောက် ဒဏ်ရာရခဲ့တယ်လို့ ကောလင်းသတင်းတွေကို ဖော်ပြပေးနေတဲ့ Kawlin info က ဆိုပါတယ်။
Kawlin info တာဝန်ခံတယောက်က “သူတို့က နယ်ခံမဟုတ်ဘူးခင်ဗျ။ တခြားနေရာကနေ စစ်ရှောင်ရင်းနဲ့ ဆီရောင်းဝယ်လုပ်စားနေတာပေါ့” လို့ ပြောပါတယ်။
အဲဒီတိုက်လေယာဉ်ဟာ ပစ်ခတ်တိုက်ခိုက်ပြီးနောက် ကန့်ဘလူနယ် အရှေ့ခြမ်းကိုဖြတ်ပြီး တောင်ဘက်ကို ပြန်လည်ဆင်းသက်သွားတယ်လို့လည်း သိရပါတယ်။
ဧပြီ ၁၁ ရက်ညနေပိုင်းကလည်း ကောလင်းမြိုနယ်၊ ကချင်ကုန်းရွာနဲ့ တောင်ဘို့လှအုပ်စု၊ လျှော်ဖြူကုန်းရွာကို တိုက်လေယာဉ်နဲ့လာရောက်ပစ်ခတ်လို့ စစ်ရှောင် အမျိုးသမီးအပါအဝင် ၂ ယောက် သေဆုံးခဲ့ပါတယ်။
ဧပြီ ၁၀ ရက် မွန်းလွဲကလည်း အင်ပင်လှရွာ စာသင်ကျောင်းကို ပေါင် ၅၀၀ ဗုံး ၂ လုံးကြဲချပြီး ပစ်ခတ်ခဲ့တာကြောင့် ကျောင်းမှာနေထိုင်တဲ့ စစ်ရှောင်မိသားစုကို ထိမှန်ပြီး ၁၄ နှစ်အရွယ် မိန်းကလေးသေဆုံး၊ သူ့အမေအပါအဝင် ၂ ယောက်က အပြင်းအထန် ဒဏ်ရာရခဲ့ပါတယ်။
