ထိုင်းနိုင်ငံအလယ်ပိုင်း၊ အယုဒ္ဓယခရိုင်ထဲမှာ ထိုင်းနိုင်ငံမြောက်ပိုင်းကနေ မောင်းဝင်လာတဲ့ ကုန်တင်ကားကြီးတစီးထဲကနေ  စိတ်ကြွဆေးပြား ၁၀ သန်းခန့် ဖမ်းဆီးရမိတယ်လို့ ထိုင်း အမျိုးသားရဲတပ်ဖွဲ့က  ဧပြီ ၈ ရက် သတင်းစာရှင်းပွဲမှာ ပြောပါတယ်။

နယ်မြေထဲမှာ မူးယစ်ဆေးဝါးအချီကြီး ဝင်ရောက်လာဖို့ရှိကြောင်း ကြိုတင်သတင်းရထား တဲ့အတွက်  အယုဒ္ဓယခရိုင် အမှတ် ၁၉၁ ရဲတပ်ဖွဲ့ဝင်တွေဟာ ယာဉ်အသွားအလာတွေ စောင့်ကြပ် စစ်ဆေးခဲ့တယ်၊  ဧပြီ ၆ ရက် ည ၇ နာရီကျော်မှာတော့ ဘန်ပအင်မြို့နယ် ချိန်းရတ်နွဲ့ရပ်ကွက်ရှိ ဘန်ပဟန်-ပထုန်ဌာနီလမ်းမပေါ် မောင်းဝင်လာတဲ့   ၆ ဘီးတပ် အဖြူရောင် ဟီးနိုးကားကြီးတစီး ကိုပါ တားဆီးစစ်ဆေးခဲ့ကြတယ်လို့ ထိုင်းအမျိုးသားရဲတပ်ဖွဲ့မှ ဒုရဲချုပ် ဆာမ်ရမ်း နွန်းမားက ပြော ပါတယ်။

ကုန်တင်ကားရဲ့ နောက်ခန်းကို စစ်ဆေးရာမှာ အပေါ်မှာ ဂျင်းတွေတင်လာပေမဲ့ အောက်က အိတ်တွေထဲမှာတော့ စိတ်ကြွဆေးတွေတင်ဆောင်လာတာ တွေ့ရတယ်၊  စုစုပေါင်း ၁၀ သန်း ( သိန်းပေါင်း ၁၀၀ ) ခန့်ရှိမယ်လို့ ဆိုပါတယ်။

ယာဉ်မောင်းမှာ အသက် ၄၁ နှစ်ရွယ်ရှိ နိုင်းနုပ်ဖဒွန်း ရှဲ့ချုန့်ဖြစ်ပြီး နန့်ခရိုင် ဇာတိဖြစ်တယ် ။   သူဟာ အဆိုပါမူးယစ်ဆေးတွေကို မြောက်ပိုင်းဒေသ နန်းခရိုင်ကနေသယ်ဆောင်လာပြီး ဘန်ကောက်ကို ပို့ပေးဖို့ဖြစ်တယ်၊ သယ်ပို့ပေးခအနေနဲ့ ဘတ် ၈ သိန်းရတယ်၊  ဒီအလုပ်ကို လုပ်လာတာ ၅ လရှိပြီဖြစ်ပြီး စိတ်ကြွဆေး ၄ ကြိမ် သယ်ဆောင်ခဲ့တယ်လို့  ဝန်ခံသွားပါတယ်။ 

အယုဒ္ဓယခရိုင်ရဲတပ်ဖွဲ့က သူ့ကို တယ်လီဖုန်း တလုံး ငွေသား ဘတ် ၁၁၅၀၀ နဲ့အတူ ဖမ်းဆီးထားပြီး ကွင်းဆက်တွေ ဆက်လက်စုံစမ်းစစ်ဆေးအရေးယူသွားမယ်လို့  ဆိုပါတယ်။ 

Source:  Thairath / Top News