
မန္တလေးတိုင်းနဲ့ ရှမ်းပြည်နယ်တောင်ပိုင်းကနေ ကျပ်သန်းပေါင်း ၈,၂၀၀ ကျော် တန်ဖိုးရှိတဲ့ စိတ်ကြွဆေးပြားတွေ ဖမ်းဆီးရမိပြီး အာရက္ခတပ်တော် (AA) ကို ထောက်ပံ့နေသူနဲ့ ပတ်သက်တယ်လို့ စစ်ကောင်စီ မူးယစ်ဆေးထိန်းချုပ်ရေး ဗဟိုအဖွဲ့က ဧပြီ ၃ ရက်မှာ စွပ်စွဲ ထုတ်ပြန်ပါတယ်။
မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ မတ် ၁၅ ရက် ညနေပိုင်းက ကျောက်ဆည်မြို့နယ်၊ ပဒုမ္မာကျေးရွာနားမှာ သတင်းအရ စောင့်ဆိုင်းနေတုန်း တောင်တော်ကျေးရွာဘက်ကနေ မြစ်သားမြို့နယ်၊ ရွာခိုင်ကြီးကျေးရွာဘက်ကို ရဲနိုင်ဦး၊ အောင်ငွေမိုး၊ ထွန်းလှိုင်နဲ့ ရှိုင်းကိုဇင်တို့ မော်တော်ဆိုင်ကယ် ၄ စီးနဲ့ သယ်ဆောင်လာတဲ့ ဆာလာအိတ် ၁၂ အိတ်ထဲက စိတ်ကြွရူးသွပ်ဆေးပြား ၂၃ ဒသမ ၉ သိန်း ဖမ်းဆီးရမိခဲ့တယ်လို့ ဆိုပါတယ်။
သူတို့ရဲ့ ဖော်ထုတ်ချက်အရ အဲဒီနေ့ ည ၇ နာရီမှာ ဆေးပြားတွေကို ကျောက်ဆည်ကို သယ်ခိုင်းတဲ့ လွမ်းဇော် (ခ) ကိုပွားနဲ့ နောင်သျှမ်းဝင်း တို့ကို ကျောက်ဆည်မြို့နယ်၊ ဟံမြင့်မိုရ်ရွာနားမှာ မော်တော်ဆိုင်ကယ်တစီးနဲ့ ဖမ်းဆီးမိပြီး ဆေးပြားတွေကို ရှမ်းပြည်နယ်တောင်ပိုင်းကနေ ရန်ကုန်ကို တာဝန်ခံသယ်ဆောင်တဲ့ ညီဝဏ္ဏနဲ့ သိန်းလင်းကျော် တို့ကို ရန်ကုန်-မန္တလေးလမ်းဟောင်း၊ လယ်ကြီးကျေးရွာနားမှာ Kluger တစီးနဲ့ ဖမ်းဆီးရမိတယ်လို့ ဆိုပါတယ်။
သူတို့ရဲ့ဖော်ထုတ်ချက်အရ ရှမ်းပြည်နယ်တောင်ပိုင်း၊ ရွာငံမြို့နယ် တောအတွင်းက လျှိုမြောင်ထဲမှာ သိမ်းထားတဲ့ ဆာလာအိတ် ၁၅ အိတ်ထဲက စိတ်ကြွရူးသွပ်ဆေးပြား ၃၀ ဒသမ ၉ သိန်း ထပ်မံသိမ်းဆည်းရမိလို့ စုစုပေါင်း ကာလတန်ဖိုးငွေကျပ် သန်း ၈,၂၀၀ ကျော်တယ်လို့လည်း ထုတ်ပြန်ပါတယ်။
စစ်ဆေးဖော်ထုတ်ချက်တွေအရ ဆေးပြားတွေကို သီပေါမြို့နယ်၊ နားလွမ့်ကျေးရွာနေ အိုက်စိုင်း (ခ) အိုက်စံ (ခ) စိုင်းနောင့်က ညီဝဏ္ဏနဲ့ သိန်းလင်းကျော် တို့ကို ရှမ်းပြည်နယ်တောင်ပိုင်းကနေ ရန်ကုန်ကို သယ်ဆောင်ခိုင်းတာဖြစ်ပြီး ညီဝဏ္ဏနဲ့ သိန်းလင်းကျော် တို့ကလည်း ရွာငံမြို့နယ်၊ ကျောက်ဂူပြင်ကျေးရွာနေ ဝင်းမင်းထက် (ခ) တစ် (ခ) သားတစ်ကို ရွာငံကနေ ကျောက်ဆည်ကို တောလမ်းကနေ သယ်ဆောင်ခိုင်းခဲ့တာလို့ ဆိုပါတယ်။
ကွင်းဆက်ဖော်ထုတ်ချက်တွေအရ အဲဒီဆေးပြားတွေထဲက အပြား သိန်း ၄၀ ကို ရန်ကုန်ကနေ မင်းတုန်းကို သယ်ဆောင်ခိုင်းသူ အောင်သူရကို ဧရာဝတီတိုင်း၊ ညောင်တုန်းမြို့နယ်မှာ ဆက်လက်ဖမ်းဆီးရမိခဲ့ပြီး သူဟာ AA ကို ငွေကြေးထောက်ပံ့နေသူလို့ ဆိုပါတယ်။
ဆေးပြား ၁၄ ဒသမ ၈ သိန်းကို ရန်ကုန်မြို့မှာ လက်ခံသူ မျိုးမြင့်မောင် (ခ) မောင်မောင်နဲ့ ထွေးမင်းခန့် (ခ) သားငယ် တို့ကိုတော့ မြောက်ဥက္ကလာပမြို့နယ်၊ (ဈ) ရပ်ကွက်မှာ Toyota Sprinter ကားနဲ့အတူ ဖမ်းဆီးရမိပြီး သူတို့ရဲ့ဖော်ထုတ်ချက်တွေအရ စိတ်ကြွရူးသွပ်ဆေးပြားတွေကို ရှမ်းပြည်နယ်ကနေ ရန်ကုန်ကို သယ်ဆောင်ခိုင်းသူဟာ ကျေးသီးမြို့နယ်၊ ဝမ်စိမ်းကျေးရွာနေ မစိန်မေ (ခ) ယမင်း ဖြစ်တယ်လို့ သိရပြီး သူတို့ကို မူးယစ်ဆေးဝါးနဲ့ စိတ်ကိုပြောင်းလဲစေတဲ့ ဆေးဝါးများဆိုင်ရာဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူတွေကို ဆက်လက်ဖော်ထုတ်နေတယ်လို့လည်း ဆိုပါတယ်။
ဒီထဲက အိုက်စိုင်း (ခ) အိုက်စံ (ခ) စိုင်းနောင့် (သီပေါမြို့နယ်နေသူ) ဟာ ၂၀၂၁ ခုနှစ်ကနေ ၂၀၂၄ ခုနှစ်အတွင်း မူးယစ်ဆေးဝါးသယ်ဆောင်ရောင်းဝယ်မှု၊ အမှုကြီး ၆ မှုက အလိုရှိ တရားခံပြေးဖြစ်ပြီး ရန်ကုန်မြို့မှာ စိတ်ကြွရူးသွပ်ဆေးပြား လက်ခံသယ်ဆောင်ရောင်းဝယ်သူ မျိုးမြင့်မောင် (ခ) မောင်မောင် ဟာလည်း ၂၀၂၅ ခုနှစ်အတွင်း မူးယစ်ဆေးဝါး သယ်ဆောင်ရောင်းဝယ်မှုမှာ အလိုရှိ တရားခံပြေးတယောက် ဖြစ်တယ်လို့ ဆိုပါတယ်။
စစ်ကောင်စီဟာ မူးယစ်ဆေးဝါး ဖမ်းဆီးရမိမှုတွေမှာ AA နဲ့ ဆက်နွှယ်တယ်လို့ မကြာခဏ စွပ်စွဲ ထုတ်ပြန်လေ့ရှိတာဖြစ်ပြီး အာရက္ခတပ်တော် (AA) ကလည်း မဟုတ်မှန်ကြောင်း ပြန်လည် ငြင်းဆိုထားပါတယ်။