ကရင်အမျိုးသားအစည်းအရုံး (KNU) တပ်မဟာ ၅ နယ်မြေ၊ ကတိုင်တိကျေးရွာနဲ့ ကမမောင်းမြို့ကြားက နေကကျေးရွာကို ဧပြီ ၂ ရက် ညနေ ၄ နာရီလောက်က စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တယ်လို့ တပ်မဟာ ၅ ပြောခွင့်ရ ဗိုလ်မှူးကြီး စောကလယ်ဒိုက ပြောပါတယ်။
မြေပြင်မှာ တိုက်ပွဲဖြစ်ပွားတာမရှိဘဲ စစ်ကောင်စီက တိုက်လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ကလေးငယ် ၂ ယောက် သေဆုံးပြီး ကလေးငယ် အပါအဝင် ပြည်သူ ၃ ယောက် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ဗိုလ်မှူးကြီး စောကလယ်ဒိုက “နေကရွာက ကတိုင်တိနဲ့ ကမမောင်းကြားမှာ ရှိတယ်။ စစ်ကောင်စီရဲ့ တိုက်လေယာဉ် ဗုံးလာကြဲတော့ ကလေးတွေ ထိခိုက်ပြီး သေဆုံးသွားတယ်” လို့ ပြောပါတယ်။
စစ်ကောင်စီရဲ့ လေကြောင်းတိုက်ခိုက်မှုကြောင့် ၃ လအရွယ် ကလေးငယ်တယောက်၊ ၁၂ နှစ်အရွယ် ကလေးတယောက် သေဆုံးပြီး ၁၀ နှစ်အရွယ် တယောက်၊ အသက် ၅၀ အရွယ် အမျိုးသားတယောက်နဲ့ အမျိုးသမီးတယောက် ဒဏ်ရာတွေရရှိသွားတယ်လို့ ဆိုပါတယ်။
နှစ်ဖက်တိုက်ပွဲတွေ ငြိမ်သက်နေပေမဲ့ စစ်ကောင်စီက လေကြောင်းကနေ နေ့တိုင်းလိုလို စောင့်ကြည့် ပျံသန်းတာတွေလည်း ရှိတယ်လို့ တပ်မဟာ ၅ တာဝန်ရှိသူက ပြောပါတယ်။
စစ်ကောင်စီက ကမမောင်းဗျူဟာမကျရေး အင်အားဖြည့်တင်းထားတာကြောင့် ကမမောင်း ဒေသခံတွေနဲ့အတူ စစ်ရှောင်ပြည်သူတွေ အပါအဝင် ကတိုင်တိ၊ ဖားပေါင်၊ ကပ်ကျော်၊ မီဇိုင်း၊ ဝါးကော် စတဲ့ အနီးအနားကျေးရွာက ဒေသခံပြည်သူ ၃,၀၀၀ ကျော်ဟာ မြိုင်ကြီးငူ၊ ဘားအံမြို့နဲ့ ဘေးလွတ်ရာ ဆွေမျိုးတွေဆီ ထွက်ပြေးတိမ်းရှောင်နေရပါတယ်။
