မြန်မာနိုင်ငံမှာ အင်အားပြင်းမြေငလျင်လှုပ်ခတ်ပြီးနောက် ဥရောပသမဂ္ဂ (EU)က  လူသားချင်းစာနာထောက်ထားမှုဆိုင်ရာစီမံကိန်း Humanitarian Air Bridge ကို စတင်လိုက်ပြီး ထောက်ပံ့ရေးပစ္စည်းတွေ တင်လာတဲ့ ပထမဆုံးလေယာဉ်ဟာ ဧပြီ ၂ ရက်မှာ ဒိန်းမတ်နိုင်ငံ၊ ကိုပင်ဟေဂင်ကနေ ပျံသန်းလာပြီလို့ သိရပါတယ်။

ဒါဟာငလျင်ဘေးကူညီကယ်ဆယ်ရေးအတွက်  ယူရို ၂ သန်းခွဲကူညီပေးမယ်လို့ ကြေညာပြီးနောက် ကယ်ဆယ်ရေးလုပ်ငန်းတွေ အားကောင်းလာစေဖို့ နောက်ထပ်အကူအညီတွေ လို့ ဆိုပါတယ်။

ပထမဆုံးလေယာဉ်နဲ့ ရွက်ဖျင်တဲတွေ၊ ကလေးသူငယ်တွေအတွက် အကာအကွယ်ပစ္စည်းတွေ၊ ကျန်းမာရေး၊ ရေနဲ့ သန့်ရှင်းရေးသုံးပစ္စည်းတွေအပါအဝင် တန်ချိန် ၈၀ ရှိတဲ့ ဥရောပသမဂ္ဂရဲ့ ထောက်ပံ့ရေးပစ္စည်းတွေပါလာပြီး ယူနီဆက်ဖ်ဆီ ကို ပေးပို့သွားမယ်လို့ ဆိုပါတယ်။

ထောက်ပံ့ပစ္စည်းတွေကို ဥရောပသမဂ္ဂရဲ့ မိတ်ဖက်အဖွဲ့အစည်းတွေက စုဆောင်းလက်ခံရရှိရေးနဲ့ ဖြန့်ဝေဖို့အတွက် မန္တလေးကိုပို့မှာဖြစ်ပြီး ဒီအကူအညီတွေဟာ လိုအပ်နေသူတွေဆီရောက်တာ သေချာစေဖို့အတွက်လည်း ဆွီဒင်၊ ဖင်လန်၊ နယ်သာလန်၊ စလိုဗေးနီးယား၊ လူဇင်ဘတ်နဲ့ နော်ဝေးနိုင်ငံ တို့က ကျွမ်းကျင်ပညာရှင် ၁၂ ယောက်ပါ အဖွဲ့တဖွဲ့ကို ကုလသမဂ္ဂ လူသားချင်းစာနာ ထောက်ထားရေးဆိုင်ရာ ညှိနှိုင်းရေးရုံးက ဘန်ကောက်နဲ့ ကွာလာလမ်ပူတို့မှာ နေရာချထားမယ်လို့ ဆိုပါတယ်။

ဆွီဒင်နဲ့ နယ်သာလန်နိုင်ငံတို့ကလည်း UNEP/OCHA Joint Environmental Unit ရဲ့ ပန်ကြားချက်အရ တခြားကျွမ်းကျင်သူတွေကိုစေလွှတ်ဖို့ ကမ်းလှမ်းထားသလို ဥရောပသမဂ္ဂ၏ အရေးပေါ်အခြေအနေတုံ့ပြန်ညှိနှိုင်းရေးဌာနကလည်း မြေပြင်မှာ မိတ်ဖက်အဖွဲ့အစည်းတွေနဲ့ ညှိနှိုင်းဖို့ ဆက်သွယ်ရေးအရာရှိတယောက်ကိုလည်း ဘန်ကောက်မှာ စေလွှတ်ထားတယ်လို့ ထုတ်ပြန်ပါတယ်။

ကြိုတင်ပြင်ဆင်မှု၊ အရေးပေါ်စီမံခန့်ခွဲမှုနဲ့ ညီမျှခြင်းရေးရာ ဥရောပ ကော်မရှင်နာ ဟာဂျာလာဘစ်က “နိုင်ငံတွင်း အပစ်အခတ် ချက်ချင်းရပ်စဲဖို့အတွက် ပဋိပက္ခတွင်း သက်ဆိုင်ပါဝင်နေတဲ့သူအားလုံးကို ကျနော်တို့တိုက်တွန်းပါတယ်။ အရပ်သားတွေနဲ့ ကူညီကယ်ဆယ်ရေးလုပ်သားတွေကို ကာကွယ်ပေးဖို့ အရေးကြီးပြီး အသက်ကယ်အကူအညီတွေ အတားအဆီးမရှိစေရေးကိုလည်း သေချာစေရမှာ ဖြစ်ပါတယ်” လို့ ပြောပါတယ်။

ဘေးအန္တရာယ်ကျရောက်ပြီး အရေးအကြီးဆုံးအချိန်နာရီပိုင်းအတွင်း ကူညီပံ့ပိုးမှုသေချာစေဖို့ ဥရောပသမဂ္ဂဟာ သက်ရောက်မှုအကဲဖြတ်မှုကိုအဆင်ပြေအောင် Copernicus ဂြိုဟ်တုဝန်ဆောင်မှုကို စတင်ခဲ့ပြီး လူသားချင်းစာနာမှုအကူအညီ ယူရို ၂ သန်းခွဲ ပေးမယ်လို့ ထုတ်ပြန်ခဲ့သလို အပြည်ပြည်ဆိုင်ရာကြက်ခြေနီနဲ့ လခြမ်းနီအသင်းတို့ကိုလည်း အရေးပေါ်တောင်းဆိုချက်အတွက်  နောက်ထပ် ယူရို ၅ သိန်း ပံ့ပိုးကူညီပေးခဲ့ပါတယ်။

လူသားချင်းစာနာထောက်ထားမှုဆိုင်ရာအဖွဲ့အစည်းတွေကို ဝင်ရောက်ခွင့်ပြုဖို့၊ ဘေးကင်းလုံခြုံတဲ့ ပတ်ဝန်းကျင်မှာ သူတို့လုပ်ကိုင်ခွင့်ရဖို့နဲ့ အရပ်သားတွေကို အသက်ကယ်အကူအညီတွေ ပေးအပ်နိုင်ဖို့ အလွန်အရေးကြီးတယ်လို့လည်း ဆိုပါတယ်။