ဧရာဝတီတိုင်း၊ ပုသိမ်ခရိုင်၊ ရေကြည်မြို့နယ်၊ ငါးသိုင်းချောင်းမြို့ စစ်ကောင်စီခန့် အုပ်ချုပ်ရေးမှူးက ငလျင်ဘေးအတွက် အလှူဆိုပြီး တအိမ်တသိန်းအထိ ကောက်ယူနေတယ်လို့ ဒေသခံတွေဆီကနေ သိရပါတယ်။
မတ် ၂၈ ရက်က လှုပ်ခတ်ခဲ့တဲ့ အင်အားအလွန်ပြင်းထန်တဲ့ ငလျင်ဒဏ်သင့် ဒေသတွေမှာ သွားရောက်လှူဒါန်းဖို့အတွက်ဆိုပြီး စစ်ကောင်စီခန့် ငါးသိုင်းချောင်းမြို့ အုပ်ချုပ်ရေးမှူး ရဲထက်အောင်က ဧပြီ ၂ ရက်ကစတင်ပြီး ငွေကောက်ယူနေတာလို့ ဆိုပါတယ်။
ငါးသိုင်းချောင်း ဒေသခံတယောက်က “အစည်းအဝေးခေါ်ပြီး ငွေကောက်တာ။ တအိမ် ၁ သိန်း ထည့်ခိုင်းတယ်။ စီးပွားရေးလုပ်ငန်းရှင် အများစုပဲ သူတို့ကောက်တဲ့ငွေပမာဏအတိုင်း ထည့်သူများပါတယ်” လို့ ပြောပါတယ်။
စစ်ကောင်စီခန့် အုပ်ချုပ်ရေးမှူး ရဲထက်အောင်က ငလျင်အလှူငွေလို့ ခေါင်းစဉ်တပ် ကောက်နေပေမဲ့ အနုကြမ်းစီးသလို မဖြစ်မနေ အတင်းအဓမ္မ ကောက်ယူနေတာလို့ ဆိုပါတယ်။
ငါးသိုင်းချောင်းမြို့ခံ စီးပွားရေးလုပ်ငန်းရှင်တယောက်က “အတင်း ဓားပြတိုက်သလို တောင်းတော့ နီးရာဓား ကြောက်နေရတော့ ထည့်ရတာပဲ။ သူတို့သုံးလည်း လှူတာပဲလို့ သဘောထားလိုက်တယ်။ သူတို့ကိုတော့ အယုံအကြည်တော့ မရှိပါဘူး” လို့ ပြောပါတယ်။
စစ်ကောင်စီခန့် အုပ်ချုပ်ရေးမှူးတွေက ငလျင်ဒဏ်သင့် ဒေသခံတွေကို အကြောင်းပြကာ ရရှိတဲ့အလှူငွေတွေကို ကိုယ်ကျိုးအတွက်သာ အသုံးပြုမှာ သေချာတယ်လို့ ငွေထည့်ရတဲ့ အရပ်သားတွေက ဆိုပါတယ်။
စစ်ကောင်စီခန့် မြို့နယ်နဲ့ ရပ်ကွက်၊ ကျေးရွာ အုပ်ချုပ်ရေးမှူးတွေက စစ်မှုထမ်းရတဲ့ လူငယ်လေးတွေကို အကြောင်းပြ အဓမ္မ စစ်မှုထမ်းထောက်ပံ့ကြေး ကောက်ယူကာ ကိုယ်ကျိုးအတွက်သုံးပြီး ကားဝယ်စီးတဲ့အထိပါ လုပ်နေတာလို့ ဒေသခံတွေ ပြောပြချက်အရ သိရပါတယ်။
