ကချင်ပြည်နယ် လိုင်ဇာ-တရုတ်နယ်စပ်ဂိတ်ကို ဧပြီ ၁ ရက်နေ့မှာ ကုန်ပစ္စည်းတချို့ တင်သွင်းခွင့်ပြုနေပြီလို့ လိုင်ဇာဒေသခံတယောက်က ပြောပါတယ်။
“လောင်စာဆီနဲ့ ဆောက်လုပ်ရေးပစ္စည်းတွေတော့ မသွင်းပေးသေးဘူး။ အခြေခံ စားသောက်ကုန်တွေပေါ့ ပစ္စည်းအချို့ တင်သွင်းခွင့်ပြုပြီ။”
နယ်စပ်တကြောရှိ စစ်ကောင်စီရဲ့တပ်စခန်းတွေကို ထိုးစစ်ဆင်နေတဲ့ ကချင်လွတ်လပ်ရေးတပ်မတော် (KIA) ကို တိုက်ပွဲတွေ ရပ်တန့်ပေးဖို့ ဖိအားပေးတဲ့အနေနဲ့ ပြီးခဲ့တဲ့နှစ် အောက်တိုဘာ ၁၈ ရက်ကစပြီး တရုတ်နိုင်ငံဘက်က ကချင်နယ်စပ်ဂိတ်အားလုံးကို ရုတ်တရက် ပိတ်ဆို့ခဲ့တာဖြစ်ပါတယ်။ အဲဒီနောက် KIA ဘက်ကလည်း တရုတ် ပိတ်လိုက်တဲ့ နယ်စပ်ဂိတ်တွေအားလုံးကို တန်ပြန်ပိတ်ဆို့မှုတွေ ပြုလုပ်ခဲ့တာပါ။
ပြီးခဲ့တဲ့နှစ် ဒီဇင်ဘာ ၉ ရက်နေ့က တရုတ်အစိုးရရဲ့ ဖိတ်ကြားချက်နဲ့ ကချင်လွတ်လပ်ရေးအဖွဲ့ (KIO) ဥက္ကဋ္ဌ ဗိုလ်ချုပ်ကြီးအင်ဘန်လ ဦးဆောင်တဲ့အဖွဲ့က တရုတ်နိုင်ငံကို သွားရောာက်ကာ ဒီဇင်ဘာ ၁၂ ရက်နေ့က ဆွေးနွေးပွဲပြုလုပ်ခဲ့ပြီးနောက် ဒီဇင်ဘာ ၁၃ ရက် မနက်မှာ နယ်စပ်ဂိတ်တွေ ပြန်ဖွင့်ခဲ့ကြတာ ဖြစ်ပါတယ်။
နယ်စပ်ဂိတ်တွေ ပြန်ဖွင့်ခဲ့တဲ့နောက် တရုတ်ဘက်က ကုန်ပစ္စည်းတွေ အဝင်မရှိဘဲ တရုတ်ဘက်ကနေ ကချင်ဘက်မှာ လာစိုက်ပျိုးထားတဲ့ တစ်သျှူးငှက်ပျောနဲ့ ဖရဲ၊ ကြံတို့လို သီးနှံကားတွေကိုတော့ တရုတ်ဘက် အဝင်ပဲ ရှိခဲ့တာပါ။
KIA က ပြီးခဲ့တဲ့နှစ် တရုတ်နယ်စပ်ရှိ စကစတပ်စခန်းရှိရာ မြို့တွေကို တိုက်ခိုက် သိမ်းပိုက်လိုက်တဲ့နောက် နယ်စပ်ဂိတ်တွေ နှစ်ဖက် ပိတ်လိုက်ပြီး လောင်စာဆီနဲ့ အခြားကုန်ပစ္စည်းအားလုံး တင်သွင်းခွင့် ပိတ်လိုက်တာလည်း ဖြစ်ပါတယ်။
ကချင်-တရုတ် နယ်စပ်တကြောက နယ်စပ်ကုန်သွယ်ရေးဂိတ်တွေဖြစ်တဲ့ လိုင်ဇာ၊ လွယ်ဂျယ်၊ မန်ဝိန်းကြီး၊ ကန်ပိုက်တီနဲ့ ပန်ဝါ စတဲ့ နယ်စပ်ကုန်သွယ်ရေးစခန်းတွေအားလုံးကို KIA က ထိန်းချုပ်ထားတာပါ။
ဟန်န
