ဗန်းမော်မြို့သိမ်းတိုက်ပွဲ ထိုးစစ်အရှိန်မြင့်လိုက်ပြီးနောက် ဇန်နဝါရီ ၂၄ ရက် နေ့လယ်ပိုင်းက ကချင်လွတ်လပ်လပ်ရေးတပ်မတော် (KIO/ KIA) ဌာနချုပ် တည်ရှိရာ လိုင်ဇာမြို့အတွင်းကို စစ်ကောင်စီတပ်က ဒရုန်းနဲ့ဗုံးလာကြဲသွားတယ်လို့ ဒေသခံတွေက သိရပါတယ်။
ဗန်းမော်မြို့ရှိ စစ်ကောင်စီတပ်ရဲ့ သံချပ်ကာတပ်ရင်းကို KIA နဲ့ ပူးပေါင်းတပ်တွေက သိမ်းပိုက်လိုက်တယ်လို့ မနေ့ မနက်ပိုင်းမှာပဲ သတင်းထွက်ပေါ်လာပြီးနောက် လိုင်ဇာမြို့အနီးကို စစ်ကောင်စီတပ်က လေယာဉ်ပျံဝဲခဲ့ပြီး နေ့လယ် ၂ နာရီခွဲဝန်းကျင်လောက်မှာ ဒရုန်းနဲ့ ဗုံးလာကြဲသွားတာ ဖြစ်တယ်လို့ ဒေသခံတယောက် ပြောပါတယ်။
“နှစ်ကြိမ် လာချသွားတာ။ ကျတာက မြစ်ကြီးနားဟိုတယ်ပေါ်ကို ကျတာ။ လူတော့ ထိခိုက်တာမရှိဘူး။ ဟိုတယ်ပေါ်မှာ တပ်ထားတဲ့ ဆိုလာပြားတွေပဲ ပျက်စီးသွားတာ။”
ဇန်နဝါရီ ၂၄ ရက် မနက်ပိုင်းက ဗန်းမော်မြို့ရှိ စစ်ကောင်စီရဲ့ သံချပ်ကာတပ်ရင်းကို KIA နဲ့ ပူးပေါင်းတပ်တွေ သိမ်းပိုက်လိုက်ပြီး သံချပ်ကာကား ၄ စီး ရရှိလိုက်တယ်လို့ သတင်းထွက်ရှိလာတာဖြစ်ပါတယ်။
ဒီဇင်ဘာ ၄ ရက်ကတည်းက စတင်ခဲ့တဲ့ ဗန်းမော်မြို့သိမ်းစစ်ဆင်ရေးအတွင်းမှာ KIA နဲ့ ပူးပေါင်းအဖွဲ့က မံစီမြို့အပါအဝင် ဗန်းမော်မြို့ရဲ့ စစ်မျက်နှာပြင်အတွင်း စစ်ကောင်စီနေရာယူခဲ့တဲ့ စစ်ဘက်ဆိုင်ရာနေရာတချို့ကိုလည်း သိမ်းပိုက်ရရှိထား ပါတယ်။
နှစ်ဖက်အပြန်အလှန် လက်နက်ကြီးပစ်ခတ်တာ၊ ဒရုန်းနဲ့တိုက်ခိုက်တာတွေကြောင့် ဗန်းမော်မြို့သိမ်းတိုက်ပွဲ ဆက်လက်ပြင်းထန်နေပြီး စစ်ကောင်စီဘက်ကတော့ စခန်းလက်မလွတ်ရရေးအတွက် လေကြောင်းကနေပါ အပြင်းအထန် ခုခံနေပါတယ်။
