မြိတ်ကနေ တနင်္သာရီမြို့နယ်ဘက်ကို ကုန်ပစ္စည်းတင်ဆောင်တဲ့ကားတွေကို မြိတ်မြို့နယ် ကြေးနန်းတိုင် စစ်ဆေးရေးဂိတ်က တားဆီးပြီး ကားသမားတွေပါ ဖမ်းဆီးခံနေရပါတယ်လို့ ဒေသခံပြည်သူတွေက ပြောပါတယ်။
မတ် ၂၈ ရက်နေ့လယ်ပိုင်းက မြိတ်မြို့မှာ ဆန်အိတ်တွေဝယ်ပြီး ပြန်လာတဲ့ ဘန်းလမွတ်ရွာက ကားတစီးကို မြိတ်မြို့နယ်၊ ကြေးနန်းတိုင်စစ်ဆေးရေးဂိတ်က တားဆီးပြီးတော့ ကားသမားဖြစ်တဲ့ ကိုနိုင်လင်းဦဂကို ဖမ်းဆီးလိုက်တယ်လို့ ဒေသခံအမျိုးသမီးတယောက်က ပြောပါတယ်။
“ကားသမားက ဘန်းလမွတ်ရွာကပါ၊ သူက ဘုရားပွဲမှာ အလှူလုပ်ဖို့ မြိတ်မှာ ပစ္စည်းသွားဝယ်တာ။ မြိတ်ကနေ ပြန်အလာမှာ ဖမ်းခံလိုက်ရတယ်။ ကားပေါ်မှာ သူတယောက်တည်းပဲ။ ကားရော လူပါ ဖမ်းခံရတာပေါ့။ အခုထိ စရဖရုံးမှာပဲလို့ သိရတယ်။ အဆက်အသွယ်တော့ ရနေတယ်။ လိုက်လည်း စုံစမ်းနေရတယ်။”
အဆိုပါ ကြေးနန်းတိုင်စစ်ဆေးရေးဂိတ်မှာ ဆန်အိတ် တင်ဆောင်တဲ့ ကားတွေမှန်သမျှကို အတင်းအကျပ် စစ်ဆေးနေပြီး တနင်္သာရီမြို့နယ်ထဲက ပဝ၊ လယ်သစ်၊ မော်တုန်းနဲ့ ဘန်းလမွတ်တို့က ကုန်ကားတွေကိုဆို အဓိက ဖမ်းဆီးစစ်ဆေးတာတွေ လုပ်တယ်လို့ ဒေသခံက ပြောပါတယ်။
ကုန်ကားတွေ ဆက်တိုက် ဖမ်းဆီးခံနေရတာကြောင့် တနင်္သာရီမြို့နယ်အတွင်းရှိ စစ်ကောင်စီက ကုန်စီးဆင်းမှု ခွင့်မပြုထားတဲ့ ကျေးရွာတွေမှာတော့ ရိက္ခာတွေ ပြတ်လပ်နေတာကြောင့် ဒေသခံပြည်သူတွေ အခက်အခဲများစွာရှိလာတယ်လို့ ပြောနေပါတယ်။
အခုလို ကုန်ကားတွေ ဖမ်းဆီးခံနေရတဲ့အခြေအနေတွေ ရင်ဆိုင်နေရတာကြောင့် ကုန်ကားတွေ သွားလာခြင်းမရှိတော့သလို့ ကုန်စည်ပြတ်လပ်တာ ကြာလာပါက ဒေသခံပြည်သူတွေအတွက် စိုးရိမ်ရပါတယ်လို့ ဆိုပါတယ်။
