အမေရိကန်သမ္မတ ဒေါ်နယ်ထရမ့်ပ်က တတိယသက်တမ်း ထမ်းဆောင်နိုင်ဖို့ ကြိုးစားနေတယ် ဆိုတာဟာ “နောက်နေတာမဟုတ်ဘူး” လို့ မတ် ၃၀ ရက်က ပြောကြားခဲ့ပါတယ်။

၂၀၂၉ ခုနှစ်မှာ ထရမ့်ပ်ရဲ့ တကျော့ပြန် သမ္မတ ဒုတိယသက်တမ်း ကုန်ဆုံးမှာဖြစ်တဲ့အတွက် အခြေခံဥပဒေ အတားအဆီးကို ကျော်လွှားနိုင်ဖို့ နည်းလမ်းတွေကို စဉ်းစားနေတယ်လို့ အတည်ပြုခဲ့တာ ဖြစ်ပါတယ်။

“လုပ်နိုင်တဲ့နည်းလမ်းတွေ ရှိပါတယ်” လို့ ထရမ့်ပ်က NBC ရုပ်သံနဲ့ တယ်လီဖုန်းအင်တာဗျူးမှာ ပြောကြားခဲ့ပါတယ်။

ဖလော်ရီဒါကနေ ဝါရှင်တန်ကိုသွားတဲ့ Air Force One လေယာဉ်ပေါ်မှာလည်း ထရမ့်ပ်က “လူတွေက ကျုပ်ကို တတိယသက်တမ်း တာဝန်ယူဖို့ မေးကြတယ်၊ တနည်းပြောရရင် စတုတ္ထသက်တမ်းပေါ့ဗျာ၊ ဘာလို့လဲဆိုတော့ ၂၀၂၀ ရွေးကောက်ပွဲက မသမာမှု ရှိခဲ့တာ ဆိုတော့လေ” လို့ ထရမ့်ပ်က ပြောကြားခဲ့ပါတယ်။

ဘယ်လိုပဲကြည့်ကြည့် အဝေးကြီးလိုနေသေးတာကြောင့် “လက်ရှိမှာ တတိယသက်တမ်း အကြောင်း အသေးစိတ် မပြောချင်သေးဘူး” လို့လည်း ထရမ့်ပ်က ပြောပါတယ်။

သမ္မတ ဖရန်ကလင်ဒီနာ ရုစဘဲ့ဟာ သမ္မတသက်တမ်း ၄ ကြိမ်ဆက်တိုက် ရွေးကောက်ခံခဲ့ရအပြီး ၁၉၅၁ ခုနှစ်မှာ အခြေခံဥပဒေမှာ ဖြည့်စွက်ချက်အမှတ် ၂၂ ကို ထည့်သွင်းခဲ့တာ ဖြစ်ပါတယ်။ အဲဒီပုဒ်မမှာ မည်သည့်ပုဂ္ဂိုလ်မျှ သမ္မတတာဝန်ကို ၂ ကြိမ် မယူရလို့ ပါရှိပါတယ်။

အခြေခံဥပဒေ ဖြည့်စွက်ချက်တွေကို ပြင်ဆင်ဖို့ဆိုရင် လွှတ်တော်နှစ်ရပ်စလုံးမှာ မဲ သုံးပုံ နှစ်ပုံ ထောက်ခံမှုရဖို့ လိုအပ်သလို အမေရိကန်ပြည်နယ် ၅၀ မှာ လေးပုံ သုံးပုံရဲ့ ပြည်နယ်လွှတ်တော်တွေကလည်း အတည်ပြုပေးဖို့ လိုအပ်ပါတယ်။

Source : Reuters