ဧရာဝတီတိုင်း၊ ပုသိမ်မြို့မှာ မတ် ၂၈ ရက်ကစတင်ပြီး ဒီနေ့အထိ လျှပ်စစ်မီးမရရှိတဲ့အတွက် ပြည်သူအများစု ရေရရှိဖို့ အခက်အခဲဖြစ်နေကြောင်း ပုသိမ်မြို့ခံတွေထံက သိရပါတယ်။
ပုသိမ်မြို့ အမှတ် ၈ ရပ်ကွက်နေသူတယောက်က “လျှပ်စစ်မီး တခါမှ မကြုံဖူးအောင် ပျက်နေတာ၊ အခုဆို ၃ ရက်ရှိပြီး မလာတာ အခက်အခဲက အများကြီးပေါ့၊ ရေချိုးဖို့ တကိုယ်ရေ သန့်ရှင်းရေးအတွက်တောင် ရေတင်မရဘူးလေ။ တခြားအခက်အခဲတွေ ဖုန်းအားသွင်းတာအစ လုပ်ငန်းတွေပါ ထိခိုက်တာပေါ့” လို့ ပြောပါတယ်။
ပုသိမ်မြို့မှာ မတ် ၂၈ ရက်က စတင်ပြီး လျှပ်စစ်မီးပြတ်တောက်သွားတာ ဖြစ်ပါတယ်။ မီးပျက်ပြီးနောက်ပိုင်း အထပ်မြင့်တိုက်ခန်းများ ရေတင်ဖို့ အခက်အခဲရှိလာပြီး ရေတင်ဖို့ မီးစက်ငှားရမ်းရကြောင်း တချို့ ပရဟိတအဖွဲ့တွေက သောက်သုံးရေ လိုက်ပေးဝေနေမှုရှိကြောင်း ပုသိမ်မြို့ပေါ် နေထိုင်သူတွေက ဆိုပါတယ်။
ပုသိမ်မြို့မှာ နေထိုင်သူတယောက်က “ရေတင်ဖို့ မီးစက်ငှားရတယ်။ မီးစက်က ချက်ချင်း ငှားမရဘူးလေ။ အိမ်တိုင်း ရေအတွက် ခက်ခဲသွားတယ်။ တခြားမြို့တွေ အလှည့်ကျရသေးတာ။ တနေ့ ၂ နာရီလောက် ပေးရင်တောင် ရေတင် အဝတ်လျှော်၊ ဖုန်းအားသွင်းရတာပေါ့။ အခုက ဘယ်လောက်ကြာမယ်မသိဘူး” လို့ ပြောပါတယ်။
ပုသိမ်မြို့မှာ အိမ်သုံးဖို့ ရေတစည်ကို ၁၅,၀၀၀ ကျပ်ပေး ဝယ်ယူသုံးစွဲနေရပြီး ရေစည်က ချက်ချင်းမှာမရတာရှိကြောင်း သိရှိရပါတယ်။
လူမှုရေးအဖွဲ့တွေက ရေကားတွေနဲ့ သောက်သုံးရေ အခမဲ့ လိုက်ပေးဝေနေကြောင်း သိရှိရပါတယ်။
လျှပ်စစ်မီးပြတ်နေတာ ဘယ်အဖွဲ့အစည်း တာဝန်ရှိသူက ပြည်သူကို အသိပေးတာမျိုး မရှိကြောင်း၊ ဘယ်ရက် လာနိုင်မယ်ဆိုတာ ပြောဆိုမှုမရှိကြောင်း ပုသိမ်မြို့နေထိုင်သူတွေထံက သိရပါတယ်။
မြန်မာနိုင်ငံမှာ အင်အားပြင်းလျင် လှုပ်ခတ်ပြီး ဓာတ်အားပေးစက်ရုံများ ပျက်စီးတာ၊ ရန်ကုန်မှာ အုပ်စု ၆ စုနဲ့ တရက် ၄ နာရီ Gas Turbine က ဓာတ်အားဖြန့်ဖြူးပေးနေကြောင်း သိရပါတယ်။
