လုံခြုံရေးအာမခံချက်ရှိမယ်ဆိုရင် စစ်ကောင်စီထိန်းချုပ်နယ်မြေတွေမှာလည်း ငလျင်ဘေးသင့် ပြည်သူတွေကို ကယ်ဆယ်ကုသရေးလုပ်မှာဖြစ်ပြီး ငလျင်ဒဏ်သင့်ဒေသတွေနဲ့ ဆက်စပ်ခရိုင်တွေမှာ ခုခံကာကွယ်စစ်ကလွဲပြီး ထိုးစစ်တွေအားလုံး သီတင်း ၂ ပတ်ကြာ ရပ်ထားဖို့ ညွှန်ကြားထားပြီလို့ အမျိုးသားညီညွတ်ရေးအစိုးရ(NUG)က မတ် ၂၉ ရက် ညပိုင်းမှာ ထုတ်ပြန်ပါတယ်။

NUG ထိန်းချုပ်နယ်မြေတွေမှာလည်း ကုလသမဂ္ဂကူညီကယ်ဆယ်ရေးအဖွဲ့တွေ၊ နိုင်ငံတကာ အဖွဲ့အစည်းတွေနဲ့ အရေးပေါ်ကယ်ဆယ်ရေးနဲ့ ကုသရေးလုပ်ငန်းတွေလုပ်နိုင်ဖို့ လုံခြုံရေး၊ သယ်ယူပို့ဆောင်ရေးနဲ့ ယာယီကယ်ဆယ်ကုသရေးစခန်းတွေဖွင့်လှစ်ရေးတို့ကို တာဝန်ယူ ပူးပေါင်းဆောင်ရွက်မယ်လို့လည်း ဆိုပါတယ်။

နိုင်ငံတဝန်းနဲ့ NUG ထိန်းချုပ်နယ်မြေက ငလျင်ဒဏ်သင့်ပြည်သူတွေတွေကို ဖြစ်နိုင်တဲ့ နည်းပေါင်းစုံနဲ့ ကယ်ဆယ်ကုသရေးလုပ်နိုင်ဖို့ ကနဦးအနေနဲ့ အမေရိကန် ဒေါ်လာ ၁ သန်း သုံးစွဲဖို့ လျာထားတယ်လို့လည် ထုတ်ပြန်ပါတယ်။ 

ကုလသမဂ္ဂကူညီကယ်ဆယ်ရေးအဖွဲ့တွေ၊ နိုင်ငံတကာ အဖွဲ့အစည်းတွေနဲ့ အရေးပေါ်ကယ်ဆယ်ရေးနဲ့ ကုသရေးလုပ်ငန်းတွေကို အမြန်ဆုံးကူညီကြဖို့လည်း ဖိတ်ခေါ်ထားပါတယ်။

ငလျင်ဘေးသင့်ဒေသတွေနဲ့ ဆက်စပ်နေတဲ့ ခရိုင်တွေမှာ လူသားချင်းစာနာထောက်ထားမှု အကူအညီပေးရေးဆိုင်ရာလုပ်ငန်းတွေဆောင်ရွက်နိုင်ဖို့အတွက် မတ် ၃၀ ရက်ကနေ ဧပြီ ၁၂ ရက်အထိခုခံကာကွယ်စစ်ကလွဲပြီး ထိုးစစ်တွေအားလုံးကို ရပ်ဆိုင်းထားဖို့ ပြည်သူ့ကာကွယ်ရေးတပ်မတော်နဲ့ ပြည်သူ့ကာကွယ်ရေးအဖွဲ့တွေကို အထူးညွှန်ကြားချက် ထုတ်ပြန်ထားတယ်လို့လည်း NUG ကာကွယ်ရေးဝန်ကြီးဌာနက ဆိုပါတယ်။

ပြီးတော့ ပြည်တွင်း ပြည်ပ ကူညီကယ်ဆယ်ရေးအဖွဲ့တွေကိုလည်း လိုအပ်တဲ့ အကူအညီနဲ့ ကာကွယ်စောင့်ရှောက်ပေးဖို့ကိုလည်း ညွှန်ကြားထားတယ်လို့ ဆိုပါတယ်။

စစ်ကောင်စီကတော့ ငလျင်မလှုပ်ခတ်ခင်အချိန်ကရော လှုပ်ခတ်ပြီးအချိန်မှာပါ လေကြောင်းကနေဗုံးကြဲ တိုက်ခိုက်နေတယ်လို့ သက်ဆိုင်ရာ ဒေသခံတွေဆီက သိရပါတယ်။