အမျိုးသားညီညွတ်ရေးအစိုးရ (NUG) ရဲ့ နွေဦးဖွံ့ဖြိုးရေးဘဏ် (SDB) က စစ်ကောင်စီရဲ့ အကြမ်းဖက်မှုနဲ့ သဘာဝဘေးအန္တရာယ်ဖြစ်တဲ့ ငလျင်ဒဏ်ကို ခံစားခဲ့ရတဲ့ ပြည်သူလူထုအတွက် အောင်လံလွှင့်ချီ နွေဦးထီနဲ့ နွေဦးလူထုရန်ပုံငွေ (SCF) တို့နဲ့ အတူ လူသားချင်းစာနာမှုဆိုင်ရာ အကူအညီပေးရေး ရန်ပုံငွေ ကမ်ပိန်းကို မတ် ၂၈ ရက်က စတင်ခဲ့ပါတယ်။

အဆိုပါ အကူအညီပေးရေး ရန်ပုံငွေကမ်ပိန်းကိုတော့ NUG အစိုးရရဲ့ လူသားချင်း စာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနနဲ့ ချိတ်ဆက်ပြီး လိုအပ်တဲ့ လုပ်ငန်းစဉ်တွေကို ကူညီဆောင်ရွက်သွားမယ်လို့ SDB က ဆိုပါတယ်။

“မြေငလျင် သဘာဝဘေး၊ ထောက်ပံ့စာနာ ကူညီပေး” ဆိုတဲ့ ဒီကမ်ပိန်းစတင်ပြီး ၂၄ နာရီမပြည့်ခင်မှာပဲ မြန်မာကျပ်ငွေ သိန်းပေါင်း ၁၉၀၀ ကျော် ရရှိခဲ့တာလည်း ဖြစ်ပါတယ်။

ကမ်ပိန်းမှာပါဝင်ဖို့ နွေဦးလူထုရန်ပုံငွေ (SCF) ရဲ့ ဝက်ဘ်ဆိုဒ်ကတဆင့် ပါဝင်လှူဒါန်းနိုင်မှာပဲ ဖြစ်ပါတယ်။

ဒီကမ်ပိန်းကတော့ ဧပြီ ၁၁ ရက်နေ့အထိဖြစ်ပြီး ရရှိလာတဲ့ ထောက်ပံ့ကူညီငွေတွေအားလုံးကို NUG ရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနကတဆင့် တိုက်ရိုက် ကူညီသွားမယ်လို့ SDB က ဆိုပါတယ်။