ထိုင်းနိုင်ငံ၊ ဘန်ကောက်မြို့မှာ မတ် ၂၈ ရက် နေ့လယ်က လှုပ်ခတ်ခဲ့တဲ့ ငလျင်ကြောင့် ဘန်ကောက်မြို့၊ ချတ်တူးကျတ်ပန်းခြံအနီး ‌ဆောက်လုပ်နေဆဲ အထပ်မြင့်အဆောက်အဦပြိုကျ ပျက်စီးမှုကြောင့် ထိုင်းစံတော်ချိန် ည ၆ နာရီ ၂၀ အထိ ထိခိုက်သေဆုံးသူ အလုပ်သမား ၃ ယောက်၊ ထိခိုက်ဒဏ်ရာရသူ အလုပ်သမား ၈ ယောက်နဲ့ ပျောက်ဆုံးနေသူ ၁၁၈ ယောက် ရှိတယ်လို့ ကနဦးသိရပါတယ်။

အဲဒီ ဖြစ်စဉ်အတွင်း ထိခိုက်ခံစားနေရတဲ့ မြန်မာအလုပ်သမားတွေနဲ့ ပတ်သက်လို့ စစ်ကောင်စီ လက်အောက်ခံ အလုပ်သမားသံအရာရှိရုံးက သွားရောက်ကြည့်ရှုခဲ့ပြီးတော့ လတ်တလော မြန်မာနိုင်ငံသား ထိခိုက်သေဆုံးစာရင်းရရှိဖို့ ဆောင်ရွက်နေတယ်လို့ မတ်လ ၂၈ ရက်ညက သတင်းထုတ်ပြန်ပါတယ်။

ထိခိုက်သေဆုံးတဲ့ မြန်မာနိုင်ငံသားတွေအတွက်လည်း ထိုင်းလူမှုဖူလုံရေးဥပဒေနဲ့အညီ ခံစားခွင့် ရရှိနိုင်ဖို့ သက်ဆိုင်ရာနယ်မြေ ထိုင်းအလုပ်အကိုင်ဌာန၊ ညွှန်ကြားရေးမှူးနဲ့ တွေ့ဆုံညှိနှိုင်းခဲ့ကြောင်းလည်း သတင်းထုတ်ပြန်ထားပါတယ်။

မတ် ၂၈ ရက် ညပိုင်းအထိ နောက်ဆုံးသိရသလောက် အဆောက်အဦး ပြိုကျမှုအတွင်း ပိတ်မိနေသူ အလုပ်သမား ၁၀၀ ကျော် ရှိနေကာ သူတို့ကိုကယ်ထုတ်ပေးဖို့ အထဲကနေ အော်ဟစ်ပြီး အကူညီ တောင်းခံနေတဲ့အသံတွေကို အပြင်ကပါကြားနေရတယ်လို့ ထိုင်းသတင်းတွေမှာ ဖော်ပြပါတယ်။

အဲဒီ နေရာကို ထိုင်းဝန်ကြီးချုပ်ကိုယ်တိုင် ရောက်ရှိခဲ့ပြီး အထဲမှာ ပိတ်မိနေတဲ့ အလုပ်သမားတွေကို ကူညီကယ်ထုတ်နိုင်ဖို့အတွက် ထိုင်းလူမှုကူညီရေးအသင်းတွေက လုပ်ဆောင်နေတယ်လို့ သိရပါတယ်။

ထိုင်းအခြေစိုက် မြန်မာရွှေ့ပြောင်းအလုပ်သမားတွေကို ကူညီပေးနေတဲ့ AAC မဟာမိတ်အဖွဲ့၊ MHAC မဟာမိတ်အဖွဲ့တို့ကလည်း အလုပ်သမားတွေနဲ့ သွားရောက်တွေ့ဆုံကာ ဖြစ်စဉ်ကို မေးမြန်းတာ၊ လိုအပ်တဲ့ အကူညီတွေ ပေးအပ်တာတွေ လုပ်ခဲ့တယ်လို့ ဆိုပါတယ်။

အဲဒီ ဆောက်လုပ်ရေးလုပ်ငန်းခွင်မှာ မြန်မာရွှေ့ပြောင်းအလုပ်သမားတွေ အပါအဝင် စုစုပေါင်း အလုပ်သမား ၄၀၀ ကျော် လုပ်ကိုင်နေတယ်လို့ ထိုင်းသတင်းတွေမှာ ဖော်ပြပါတယ်။

လက်ရှိမှာ ပျောက်ဆုံးနေတဲ့ အလုပ်သမားတွေကို ထိုင်းနိုင်ငံတာဝန်ရှိသူတွေနဲ့ လူမှုကယ်ဆယ်ရေးအဖွဲ့တွေက ရှာဖွေမှုတွေ ပြုလုပ်နေပါတယ်။

အဲဒီအဆောက်အအုံဟာ ဘတ်သန်း ၂၁၃၆ သန်း အသုံးပြုတည်ဆောက်နေတဲ့ အထပ် ၃၀ ပါ ထိုင်းအစိုးရရဲ့ နိုင်ငံတော်ဘဏ္ဍာငွေ စစ်ဆေးရေးရုံးသစ်ဖြစ်ပြီး ပြီးလုနီးချိန် ခုလို သဘာဝဘေး အန္တရာယ်နဲ့ ကြုံရတာလို့  တာဝန်ရှိသူက ပြောကြောင်း ထိုင်းသတင်းမှာ ဖော်ပြပါတယ်။ 

Photo: Reuters