ဒီကနေ့ မတ်လ ၂၈ ရက်နေ့မှာ ပြင်းထန်တဲ့ ငလျင်ကြောင့် မန္တလေးမြို့မှာ နေအိမ်အဆောက်အအုံတွေ ပြိုကျပျက်စီးခဲ့သလို လူအသေအပျောက် ရှိတယ်လို့ ဒေသခံတွေက ပြောပါတယ်။
မန္တလေးမြို့ ၇၁ စီလမ်း ၁၁၀ နဲ့ ၁၁၁ ကြားမှာ တိုက်တွေပြိုကျကုန်ပြီး လမ်းတွေ ပိတ်ထားတယ်လို့ ဒေသခံတယောက်က ညနေ ၃ နာရီဝန်းကျင်မှာ DVB ကို ပြောပါတယ်။
မန္တလေးမြို့ခံ ကိုမင်းမင်းလတ်က “လောလောဆယ်တော့ ထိခိုက်တာတွေက တော်တော်များတယ်၊ မြို့တဝက်ကျော်ကျော် ၇၅ ရာခိုင်နှုန်းလောက် ပျက်စီးတယ်လို့ ခန့်မှန်းရတယ်ပေါ့နော်။ တိုက်ပြိုကျတဲ့အထဲမှာ အလုံးလိုက် ပြိုသွားတဲ့အထဲမှာ လူအသေအပျောက် ရှိတာတွေလည်း ရှိတယ်။ ခန့်မှန်းခြေ ၅၀ နဲ့ ၁၀၀ ကြားထဲမှာ ရှိလောက်တယ်။ ဒါ ကျနော်ခန့်မှန်းတာနော် အတိအကျတော့ မသိရသေးဘူး” လို့ ပြောပါတယ်။
မန္တလေး တိုက်သစ် မစိုးရိမ်ဓမ္မရက္ခိတကျောင်းဆောင်နဲ့ ရွှေဘုန်းရှိန်ဗလီလည်း ပြိုကျပျက်စီးခဲ့ပြီး လူအသေအပျောက်တွေ ရှိနိုင်တယ်လို့ ကနဦး သိရှိထားရပါတယ်။
လက်ရှိ မန္တလေးမြို့ အခြေအနေနဲ့ ပတ်သက်ပြီး ကိုမင်းမင်းလတ်က “မန္တလေးတမြို့လုံးကတော့ အခု လမ်းပေါ်မှာပဲ ထွက်ပြီးနေနေကြတယ်။ တချို့ကကျတော့ ဘုရားတွေ၊ ဗလီတွေ၊ နောက်ပြီးကျတော့ စာသင်ကျောင်းတွေထဲမှာ သွားပြီး ဘောလုံးကွင်းတွေထဲမှာ ရွှေ့ပြီး နေနေတာတွေ ရှိတယ်။ ရပ်ကွက်အခံပေါ့နော်၊ ဘာသာရေး ဗလီမှာရှိတဲ့ သာရေးနာရေး အသင်းတွေ၊ လူမှုဆောင်ရွက်ရေးအသင်းတွေ အကုန်လုံးက ကူညီကယ်ဆယ်ရေး လုပ်နေတာတွေ ရှိတယ်။ တိုက်တွေ ပြိုသွားတာတွေ၊ အိမ်တွေ အက်လို့ နေလို့မရတော့တာတွေ၊ အကုန်လုံးကတော့ ပြောင်းပြီးတော့ အပြင်မှာ ထွက်ပြီးတော့ နေနေကြတာ၊ ဘာမှ မဖြစ်ဘူးဆိုတဲ့ အိမ်ပဲ အဲ့မှာပဲ ဆက်နေနေကြတာပေါ့လေ” လို့ ပြောပါတယ်။
မန္တလေးအပြည်ပြည်ဆိုင်ရာလေဆိပ်လည်း ပြိုကျပျက်စီးပြီး လေကြောင်းခရီးစဉ်အားလုံး ရပ်ဆိုင်းထားရတယ်လို့ ဒေသခံတွေက ဆိုပါတယ်။
မန္တလေးမြို့ရဲ့ ဆက်သွယ်ရေး အခြေအနေကတော့ ဖုန်းလိုင်းတွေက အဝင်ခေါ်ဆိုမှုပဲ ရရှိပြီး အထွက်ခေါ်ဆိုမှု မရရှိဘူးလို့လည်း သိရပါတယ်။ အင်တာနက်ရရှိမှု အခြေအနေကတော့ ဝိုင်ဖိုင်နဲ့ပဲ သုံးလို့ရပြီး ဖုန်းဒေတာအင်တာနက်နဲ့ သုံးမရဘူးလို့လည်း ဒေသခံတွေက ဆိုပါတယ်။
မြတ်သဇင်
