ပဲခူးတိုင်း၊ တောင်ငူမြို့မှာ ဒီနေ့ မတ် ၂၈ ရက်က လှုပ်ခတ်ခဲ့တဲ့ ငလျင်ကြောင့် စစ်ဘေးရှောင်တွေထားတဲ့ ဝေဠုဝန်ဘုန်းကြီးကျောင်းနဲ့ ကန်တော်ဗလီပြိုကျပြီး ၁၁ ယောက် သေဆုံးခဲ့ကြောင်း ဒေသခံတွေထံက စုံစမ်းသိရပါတယ်။
စစ်ဘေးရှောင်တွေထားရှိတဲ့ ဝေဠုဝန်ဘုန်းကြီးကျောင်း ပြိုကျမှုကြောင့် ကိုရင်တပါး အပါအဝင် စစ်ဘေးရှောင်ကလေး ၆ ယောက် သေဆုံးခဲ့ကြောင်း ဒေသခံအမျိုးသားတယောက်က DVB ကို ပြောပါတယ်။
“သေဆုံးသွားတဲ့အထဲမှာ ကလေးတွေ၊ အဲဒီဘုန်းကြီးကျောင်းမှာက စစ်ဘေးရှောင်တွေပဲ ထားတာ၊ ဒဏ်ရာရတဲ့သူတွေလည်း များတယ်၊ အရေးပေါ်ကယ်ဆယ်ရေးလုပ်ပြီး တောင်ငူဆေးရုံ ပို့ထားပါတယ်။”
အလားတူ ကန်တော်ဗလီ ပြိုကျမှုကြောင့် ဗလီအတွင်းရှိ အစ္စာလာမ်ဘာသာဝင် ၅ ယောက် သေဆုံးခဲ့ကြောင်း ကယ်ဆယ်ရေးလုပ်ကိုင်နေတဲ့ ပရဟိတအဖွဲ့ဝင် အမျိုးသမီးတယောက်က DVB ကို ပြောပါတယ်။
“ဝတ်ပြုနေတဲ့အချိန် ဖြစ်သွားတာ၊ ခုလောလောဆယ်တော့ ၅ ယောက်သေသွားတယ်၊ ဒဏ်ရာ ရတဲ့သူတွေလည်း ရှိတယ်။”
မြန်မာနိုင်ငံမှာ အခု ငလျင်လှုပ်ခတ်မှုကြောင့် ထိခိုက်ပျက်စီးဆုံးရှုံးမှု များခဲ့ပြီး ပြည်သူတွေ သေဆုံးခဲ့သလို နေအိမ်အဆောက်အုံ၊ ဟိုတယ်၊ တည်ခိုခန်း၊ ဘာသာရေးအဆောက်အအုံတွေနဲ့ လမ်းတံတားတွေ ပျက်စီးဆုံးရှုံးခဲ့ပါတယ်။
