အပြစ်မဲ့ ပြည်သူတွေရဲ့ အသက်၊ အိုးအိမ်၊ စည်းစိမ်တွေ သေကျေပျက်စီးအောင် နေ့စဉ် ဗုံးကြဲတိုက်ခိုက်နေတဲ့ စစ်ခေါင်းဆောင်က တရားသောစစ်ဆိုပြီး တိုက်ပွဲတွေ ဆက်လက်ဖော်ဆောင်သွားမယ်လို့ မတ် ၂၇ ရက်နေ့ နှစ် ၈၀ ပြည့် တပ်မတော်နေ့ (ဖက်ဆစ်တော်လှန်ရေးနေ့) အခမ်းအနားမှာ ပြောလိုက်ပါတယ်။

နယ်မြေဒေသအလိုက် အာဏာရဖို့ ကြိုးစားနေတဲ့ အကြမ်းဖက်သောင်းကျန်းသူတွေရဲ့ တိုက်ခိုက်မှုတွေကြောင့် အပြစ်မဲ့ပြည်သူတွေရဲ့ အသက်၊ အိုးအိမ်၊ စည်းစိမ်ဥစ္စာတွေနဲ့ မြို့ရွာတွေ ပျက်စီးခဲ့တဲ့အတွက် ပြည်သူတွေက ရွံ့ရှာမုန်းတီးနေပြီ ဖြစ်တယ်လို့လည်း စစ်ခေါင်းဆောင်က စွပ်စွဲပြောဆိုပါတယ်။

ဗိုလ်ချုပ်မှူးကြီးမင်းအောင်လှိုင်က “ဒါကြောင့် အပြစ်မဲ့ပြည်သူတွေအပေါ် အကြမ်းဖက်တိုက်ခိုက်နေမှုတွေကို လက်မခံနိုင်သလို တို့တာဝန်အရေးသုံးပါးကို ထိပါးလာတဲ့ လက်နက်ကိုင် အကြမ်းဖက်လမ်းစဉ်တွေကိုလည်း လုံးဝလက်သင့်ခံလို့ မရတဲ့အတွက် တပ်မတော်အနေနဲ့ ပြည်သူလူထုတရပ်လုံးရဲ့ ပူးပေါင်းပါဝင်မှုနဲ့အတူ တရားသောစစ်ကို ဆက်လက်ဆင်နွှဲသွားမှာ ဖြစ်တယ်” လို့ ပြောပါတယ်။

တပ်မတော်အနေနဲ့ အကြမ်းဖက်လမ်းစဉ် ကျင့်သုံးပြီး အကျပ်ကိုင်တောင်းဆိုတဲ့ ဖြစ်စဉ်တိုင်းမှာ အလျှော့ပေးလက်ခံခဲ့တဲ့ အစဉ်အလာ မရှိခဲ့တာကြောင့် ပြည်သူတွေရဲ့ အသက်အိုးအိမ်စည်းစိမ်ကို ကာကွယ်ဖို့နဲ့ တို့တာဝန်အရေးသုံးပါးကို ထိန်းသိမ်းစောင့်ရှောက်ဖို့အတွက် တပ်ဖွဲ့ဝင်တွေအနေနဲ့ အသက်စွန့်ပြီး တာဝန်တွေ ထမ်းဆောင်ရမယ်လို့လည်း ဆိုပါတယ်။

စစ်ခေါင်းဆောင်က သူ့ကိုတိုက်ခိုက်နေတဲ့ တိုင်းရင်းသားလက်နက်ကိုင်အဖွဲ့တွေ၊ PDF အဖွဲ့တွေကို လက်နက်ကိုင်လမ်းစဉ်ကိုစွန့်ပြီး ပါတီနိုင်ငံရေးလမ်းကြောင်းနဲ့ ရွေးကောက်ပွဲ လမ်းကြောင်းတွေကတဆင့် နိုင်ငံရေးနည်းလမ်းနဲ့ ဖြေရှင်းဆောင်ရွက်နိုင်ဖို့ ငြိမ်းချမ်းရေး ဆွေးနွေးမှုတွေကို အမြဲကြိုဆို လမ်းဖွင့်ပေးထားကြောင်း ထပ်မံ အသိပေးလိုက်တယ်လို့လည်း ပြောပါတယ်။

စစ်ခေါင်းဆောင်က တပ်မတော်အနေနဲ့ တိုင်းပြည်ကို ၁၉၄၉ ခုနှစ်မှာ တကြိမ်၊ ၁၉၅၈ ခုနှစ်မှာ တကြိမ်၊ ၁၉၆၂ ခုနှစ်မှာ တကြိမ်၊ ၁၉၈၈ ခုနှစ်မှာ တကြိမ်နဲ့ ၂၀၂၁ ခုနှစ်မှာ တကြိမ် တိုင်းပြည်ကို အကြိမ်ကြိမ် ကာကွယ် ကယ်တင်ခဲ့ရတယ်လို့ ဆိုပါတယ်။

ဒါပေမဲ့ အမျိုးသားညီညွတ်ရေးအစိုးရ (NUG)ကတော့  ဒီကနေ့ အချိန်အခါမှာ အာဏာသိမ်း စစ်တပ်ဟာ လူထုအသက်အိုးအိမ်စည်းစိမ်ကို ကာကွယ်ရမယ့်အစား ပြည်သူကို ရန်ပြုခြိမ်းခြောက် ဖျက်ဆီးနေတဲ့ ဖက်ဆစ်စစ်တပ်အသွင်ကူး ပြောင်းလာတဲ့အတွက် တိုင်းရင်းသားပြည်သူတရပ်လုံးက တော်လှန်တိုက်ခိုက်နေတဲ့အတွက် ခေတ်သစ်ဖက်ဆစ်တော်လှန်ရေးကာလဖြစ်တယ်လို့  ဖက်ဆစ်တော်လှန်ရေးနေ့မှာ ထုတ်ပြန်ပြောပါတယ်။

အလားတူ ပြည်ထောင်စုလွှတ်တော်ကိုယ်စားပြုကော်မတီ (CRPH) ကလည်း မြန်မာနိုင်ငံသူ၊ နိုင်ငံသားအားလုံးအနေနဲ့  ဖက်ဆစ် အာဏာရှင်တွေထက် အဆပေါင်းများစွာ ရက်စက်ကြမ်းကြုတ်တဲ့ အကြမ်းဖက်စစ်အာဏာရှင်စနစ်ဆိုးကို အပြီးတိုင် ပပျောက်တဲ့အထိ တွန်းလှန်တိုက်ထုတ်ပြီး တော်လှန်ရေးအောင်ပွဲတွေ ဆင်နွှဲနိုင်ကြဖို့ သဝဏ်လွှာ ထုတ်ပြန်ပါတယ်။