ထိုင်း-မြန်မာနယ်စပ် ကန်ကျနပူရီခရိုင်၊ ဆန်ခလပူရီမြို့ထဲမှာ ဘတ် ၁၀ သန်း တန်ဖိုးရှိ အကောက်ခွန်မဲ့ တရုတ်နိုင်ငံထုတ် စီးကရက်နဲ့ မြန်မာဆေးပေါ့လိပ်တွေ ဖမ်းဆီးရမိတယ်လို့ ကန်ကျနပူရီ ဒေသတွင်းသတင်းမှာ ဖော်ပြပါတယ်။

နယ်မြေထဲမှာ အိမ်နီးချင်းနိုင်ငံက တရားမဝင်ကုန်ပစ္စည်းတွေ ဝင်ရောက်လာဖို့ရှိကြောင်း ကြိုတင်သတင်းရမှုကြောင့် တာဝန်ရှိသူတွေဟာ မတ် ၂၅ ရက်က ဆန်ခလပူရီမြို့ထဲ ဖြတ်သန်းသွားလာတဲ့ မသင်္ကာဖွယ်ကားတွေ စောင့်ကြပ်စစ်ဆေးခဲ့တယ်၊ အဲဒီအခါမှာ ပါဆယ်ထုပ်ပို့ဆောင်ရေးကုမ္ပဏီ တံဆိပ်ပါ နောက်ခန်းမှာ ကွန်တိန်နာလုပ်ထားတဲ့ ငွေရောင်အီဇူးစူးကားတစီးကိုပါ စစ်ဆေးခဲ့တယ်လို့ ဆိုပါတယ်။

ကွန်တိန်နာထဲမှာ စက္ကူဂျပ်ဖာထုပ်တွေ တွေ့ရှိလို့ ဖောက်ထုတ်စစ်ဆေးရာမှာတော့ ဂျပ်ဖာပေါင်း ၄၀ ထဲက အကောက်ခွန်မဲ့ တရုတ်ဖြစ်စီးကရက် ပေါင်း ၁,၀၀၀ ကာတွန်းနဲ့ မြန်မာဆေးပေါ့လိပ် ၄၀၀ ထုပ်ကို တွေ့ရှိရတယ်။ အကောက်ခွန်ဥပဒေအရ တရားမဝင်ကုန်ပစ္စည်း ဖြစ်တာကြောင့် မူလတန်ဖိုးရဲ့ ၁၅ ဆကို တွက်ချက်ပြီး ဒဏ်တပ်ခံရမှာဖြစ်တယ်လို့ တာဝန်ရှိသူက ပြောပါတယ်။

ယာဉ်မောင်းသမားကတော့ သူ့အနေနဲ့ ကုန်ပစ္စည်းတွေ လိုရာရောက်အောင် မောင်းပို့ပေးဖို့သာ တာဝန်ရှိပြီး အထဲမှာ ဘာပစ္စည်းတွေရှိလဲဆိုတာ မသိရဘူးလို့ ပြောပါတယ်။ တာဝန်ရှိသူက ပစ္စည်းပိုင်ရှင်ကို ဥပဒေအရအရေးယူဖို့ ဆက်လက်စုံစမ်းဖော်ထုတ်သွားမယ်လို့ ထိုင်းသတင်းမှာ ဖော်ပြသွားပါတယ်။

Source : ကန်ကျနပူရီ ဒေသတွင်းသတင်း