ရခိုင်ပြည်နယ် ကျောက်ဖြူမြို့နယ် ပင်လယ်ပြင်အနီးမှာ ရေလုပ်သား ၉ ယောက်ကို မတ် ၂၂ ရက်နေ့မှာ စစ်ကောင်စီက ဖမ်းဆီးခဲ့တယ်လို့ ဒေသခံတွေက ပြောပါတယ်။
ကျောက်ဖြူမြို့နယ် ချင်းမင်းပြင်ကျေးရွာက ရေလုပ်သား ၂ ယောက်နဲ့ ကင်းပင်လယ်နားရွာက ရေလုပ်သား ၇ ယောက်တို့ကို ငါးဖမ်းထွက်လာစဉ်မှာ ရေပိုင်နက် ကျူးကျော်လို့ဆိုပြီး စစ်ကောင်စီနေဗီတစ်စီးက ဖမ်းဆီးသွားတာလို့ ကျောက်ဖြူဒေသခံတယောက်က ပြောပါတယ်။
“ဖမ်းဆီးခံရတာကတော့ ချင်းမင်းပြင်ရွာက ၂ ဦးနဲ့ ကင်းပင်လယ်နားရွာက ၇ ဦးလို့ သိထားရတယ်။ သူတို့က ရေလုပ်ငန်းနဲ့ အသက်မွေးဝမ်းကျောင်းပြုနေသူတွေဆိုတော့ ငါးဖမ်းထွက်ကြရာမှာ စစ်ကောင်စီနေဗီတစီးက ရေပိုင်နက်ကျူးကျော်တယ်ဆိုပြီး ဖမ်းသွားတာလို့ သိရတယ်။ အခုတော့ ကျောက်ဖြူမြို့မ ရဲစခန်းမှာ ရောက်နေပြီလို့ သိရပြီး ဘယ်လို ပုဒ်မတွေနဲ့ အမှုဖွင့်မယ်ဆိုတာတော့ မသိရသေးဘူး။”
ဖမ်းဆီးခံထားရသူတွေကတော့ ကျောက်ဖြူမြိုနယ်၊ ချင်းမင်းပြင်ရွာက မောင်ကျော်လင်းအောင်၊ ကိုဇင်မင်းဌေး၊ ကင်းပင်လယ်နားရွာက မောင်ဒိုးလက်၊ ဦးကျော်သူထွန်း၊ ဦးဘူးသီးတောင်၊ ဦးဌေးဌေး၊ ဦးအောင်သိန်း၊ ဦးဘခက် နဲ့ ဦးညီတုတ် တို့ ဖြစ်ကြပါတယ်။
ကျောက်ဖြူမြို့အနီးရှိ ပင်လယ်ပြင် ငါးဖမ်းခွင့်ကို စစ်ကောင်စီက ၂၀၂၃ ခုနှစ် နိုဝင်ဘာလကတည်းက ပိတ်ပင်ထားတာဖြစ်ပြီး ဒေသခံတွေက စားဝတ်နေရေးအတွက် တပိုင်တနိုင် ငါဖမ်းနေကြတာလို့ သိရပါတယ်။
ကျောက်ဖြူမြို့နယ်မှာ ၂၀၂၅ ခုနှစ် ဖေဖော်ဝါရီ ၂၀ ရက်နေ့ကတည်းက စတင်တိုက်ပွဲဖြစ်ပွားနေပြီး လက်ရှိတွင် ဓညဝတီရေတပ်ဌာနချုပ်နဲ့ အမှတ်(၃၂) တပ်ရင်းအနီးတို့မှာ စစ်ကောင်စီနဲ့ AA တို့ တိုက်ပွဲပြင်းထန်နေပါတယ်။
