နိုင်ငံတကာ ဈေးကွက်မှာ ကမ္ဘာ့ရွေဈေး စံချိန်တင်မြင့်တက်ခဲ့ပြီးနောက် ပြည်တွင်းရွှေဈေးလည်း တကျပ်သားကို ကျပ် ၆၈ သိန်းဝန်းကျင်အထိ လိုက်ပါမြင့်တက်လာတယ်လို့ ရွှေဈေးကွက်အတွင်းက သိရပါတယ်။

ကမ္ဘ့ာရွှေဈေးဟာ ဒီနေ့မနက်က  တအောင်စကို ဒေါ်လာ ၃၀၄၀ အထက်အထိ မြင့်တက်နေပြီး ဒီဈေးနှုန်းက သမိုင်းတလျှောက် အမြင့်ဆုံးစံချိန်တင်ဈေး ဖြစ်ခဲ့တယ်လို့ ရွှေဈေးကွက် လေ့လာသူတွေက ဆိုပါတယ်။

ရွှေဈေးကွက် လေ့လာသူတယောက်က “ဒေါ်လာဈေးက အကျဘက်သွား နေပေမယ့် ကမ္ဘာရွှေဈေးက တောက်‌ေလျှာက် အတက်အားကောင်းနေတာ။ အဲတော့ ပြည်တွင်းဈေးလည်း လိုက်တက်လာတယ်” လို့ ပြောပါတယ်။

ပြီးခဲ့တဲ့ လပိုင်းနဲ့ အခုလ ပထမပတ်အထိ ပြည်တွင်းအခေါက်ရွှေဈေးဟာ တကျပ်သားကို ကျပ် ၆၆ သိန်းဝန်းကျင်မှာပဲ ရှိရာကနေ ဒီနေ့မှာတော့ တကျပ်သားကို ကျပ် ၆၈ သိန်း နီးပါးအထိ မြင့်တက်ရောက်ရှိနေတာပါ။

ကမ္ဘာ့ရွှေဈေးနှုန်းကလည်း အခုလ ပထမပတ်က တအောင်စကို ကန်ဒေါ်လာ ၂,၈၀၀ ကျော်ဝန်းကျင်ရှိရာက လက်ရှိမှာ တအောင်စကို ဒေါ်လာ ၃၀၄၀ ဝန်းကျင်အထိ မြင့်တက်နေပါတယ်။

စစ်ကောင်စီလက်အောက်ခံ ရန်ကုန်တိုင်းရွှေလုပ်ငန်းရှင်အသင်းကတော့ သိပ်သည်းဆ ၁၉.၂၅ ဂရမ်/ကုဗစင်တီမီတာ အထက်ရှိတဲ့ စံချိန်မီရွှေတကျပ်သားဈေးကို ၅,၅၆၀,၀၀၀ ကျပ်သာ သတ်မှတ်ထုတ်ပြန်ထားပါတယ်။