Home
ဆောင်းပါး
နွေဦးပြည်သူတို့အတွက် ဇရစ်ပင် ဆေးဖက်ဝင်
DVB
·
March 19, 2025

ဒီတပတ်မှာ နွေဦးပြည်သူတို့အတွက် ဇရစ်ပင် ဆေးဖက်ဝင်အကြောင်းကို လက်လှမ်းမီ ဆေးပညာမှ ရေးသားမျှဝေသွားမှာ ဖြစ်ပါတယ်။

ဇရစ်ပင်ကို သိပ္ပံလို Lasia spinosa လို့ခေါ်ပြီး အင်္ဂလိပ်လို Geli-geli, Bekil, Spiny Lasia, Lasia, Pimply lasia, Unicorn plant လို့ ခေါ်ကြပါတယ်။

ဇရစ်ပင်မှာ ရေဓာတ်၊ ပရိုတင်း၊ ကာဗိုဟိုက်ဒရိတ်၊ အမျှင်ဓာတ်၊ ပြာ၊ ဗီတာမင် C၊ ဗီတာမင် A စတဲ့ အာဟာရသတ္တုဓာတ်များနဲ့ alkane, aldehyde, alkaloid, carotenoid, flavonoid စတဲ့ ကျန်းမာရေးအကျိုးပြု ဓာတုဓာတ်ပေါင်းများပါဝင်ပြီး ရောင်ရမ်းမှုကို ဆန့်ကျင်ခြင်း၊ ဓာတ်တိုးဆန့်ကျင်ခြင်း၊ ဘက်တီးရီးယား ဆန့်ကျင်ခြင်း၊ ကပ်ပါးပိုး ဆန့်ကျင်ခြင်း၊ အကျိတ်ကို ဆန့်ကျင်ခြင်း၊ ဝမ်းပျက်ဝမ်းလျှော ဆန့်ကျင်ခြင်း၊ ပိုးသတ်ဆေးအာနိသင်ရှိခြင်း၊ ဆီးချိုရောဂါကို တိုက်ဖျက်ခြင်း၊ သွေးတွင်းမကောင်းတဲ့အဆီကို လျှော့ချပေးခြင်း၊ နာကျင်မှုကို လျော့ပါးစေခြင်း၊ ဆီးရွှင်စေခြင်း စတဲ့ အစွမ်းအာနိသင်များ ပါဝင်ပါတယ်။

ဆေးဖက်ဆိုင်ရာမှာ ဇရစ်ပင်ရဲ့ အရွက်၊ ပင်စည်၊ အမြစ်နဲ့ တပင်လုံးကို သုံးစွဲကြပါတယ်။ လည်ချောင်းရောဂါမှာ အမြစ်ပြုတ်ရည်ကို တခါသောက် ရေနွေးကြမ်းပန်းကန် ၁ ခွက်ကို တနေ့ ၂-၃ ကြိမ် သောက်ပေးနိုင်ပါတယ်။

အမြစ်နဲ့ အရွက် နှစ်မျိုးလုံးဟာ ဆီးသွားစေတဲ့အာနိသင် ရှိတာကြောင့် ဆီးနီ၊ ဆီးနည်း၊ ဆီးကျဉ်၊ ဆီးအောင့် ရောဂါများ အမြစ်နဲ့ အရွက်ပြုတ်ရည် တခါသောက် ရေနွေးကြမ်းပန်းကန် ၁ ခွက်ကို တနေ့ ၂-၃ ကြိမ် သောက်ပေးနိုင်ပါတယ်။

အစာအိမ်နဲ့ အူလမ်းကြောင်းဆိုင်ရာ ရောဂါများနဲ့ အစာအိမ်နာများမှာ အမြစ်ပြုတ်ရည် တခါသောက် ရေနွေးကြမ်းပန်းကန် ၁ ခွက်ကို တနေ့ ၂-၃ ကြိမ် သောက်ပေးနိုင်ပါတယ်။

အဆုတ်ရောင်ခြင်း၊ ချောင်းဆိုးသွေးပါခြင်းများမှာ ဇရစ်ရွက်ပြုတ်ရည် တခါသောက် ရေနွေးကြမ်းပန်းကန် ၁ ခွက်ကို ပျားရည် ကော်ဖီ ၁ ဇွန်းထည့်ပြီး တနေ့ ၂-၃ ကြိမ် သောက်ပေးနိုင်ပါတယ်။

ပန်းနာရင်ကျပ်ရောဂါအတွက် အရွက်သတ္တုရည် ဟင်းစားဇွန်း ၁ ဇွန်းကို ထန်းလျက်မှုန့် ကော်ဖီ ၁ ဇွန်းနဲ့ တနေ့ ၂-၃ ကြိမ် သောက်ပေးနိုင်ပါတယ်။

သန်ကောင်/တုတ်ကောင် ရောဂါများမှာ အရွက်နု အညှာ သတ္တုရည် ဟင်းစားဇွန်း ၁ ဇွန်းကို ပျားရည် ကော်ဖီ ၁ ဇွန်းနဲ့ တနေ့ ၂ ကြိမ် သောက်ပေးနိုင်ပါတယ်။

တီဘီရောဂါအတွက် အမြစ်မှုန့် ကော်ဖီ ၁ ဇွန်းကို ပဒဲကောမှုန့်နဲ့ ဆတူစပ်ပြီး တခါသောက် ကော်ဖီ ၂ ဇွန်းကို တနေ့ ၂-၃ ကြိမ် သောက်ပေးနိုင်ပါတယ်။

အပင်မှာ ရောင်ရမ်းမှုကို သက်သာစေတဲ့ အာနိသင်ရှိတာကြောင့် အဆစ်အမြစ်ရောင်ရမ်းခြင်း များမှာ အပင်ပြုတ်ရည် တခါသောက် ရေနွေးကြမ်းပန်းကန် ၁ ခွက်ကို တနေ့ ၂-၃ ကြိမ် သောက်ပေးနိုင်ပါတယ်။

ဇရစ်ကို ချက်ပြုတ်စားသောက်ခြင်းက အစာစားချင်စိတ်ကို တိုးပွားစေပြီး ကျောက်ကပ်နဲ့ နှလုံး လုပ်ငန်းဆောင်တာများကို ကောင်းမွန်စေပြီး ရောင်ရမ်းခြင်းနဲ့ အကျိတ်များ ကြီးထွားလာခြင်းတို့ကို လျော့ပါးစေပါတယ်။ ကပ်ပါးရောဂါများကို ဟန့်တားပေးပါတယ်။

လိပ်ခေါင်းရောဂါအတွက် အမြစ်ပြုတ်ရည် တခါသောက် ရေနွေးကြမ်းပန်းကန်တဝက်ကို ဆားမီးဖုတ် ကော်ဖီဇွန်းဝက်ခန့်ထည့်ပြီး တနေ့ ၂ ကြိမ် သောက်ပေးနိုင်ပါတယ်။

ဇရစ်ပင်ကို ပုံမှန်စားသောက်ပေးခြင်းက သွေးတွင်းအဆီကို ကျစေပြီး ကိုယ်အလေးချိန် ထိန်းသိမ်းရာမှာ အထောက်အကူ ဖြစ်စေပါတယ်။

ဆီးချိုရောဂါဝေဒနာရှင်များ ဇရစ်ပင် အသင့်အတင့်ကို ချက်ပြုတ်စားသောက်ခြင်းဖြင့် ဆီးချိုရောဂါ ထိန်းသိမ်းရာမှာ အထောက်အကူ ဖြစ်စေပါတယ်။

ဇရစ်ပင် အသင့်အတင့် စားသောက်ခြင်းကြောင့် ထူးခြားတဲ့ ဘေးထွက်ဆိုးကျိုး မရှိပေမဲ့ အလွန်အကျွံ စားသောက်ခြင်းက ရင်ပြည့်ရင်ကယ်ခြင်း၊ လေထိုးလေအောင့်ခြင်း စတဲ့ အစာလမ်းကြောင်းဆိုင်ရာ ပြဿနာများ ဖြစ်စေနိုင်ပါတယ်။ ဇရစ်ပင် အစိမ်းစားတာက လျှာနဲ့ လည်ချောင်းတွေကို ယားယံခြင်း စူးရှနာကျင်ခြင်း ဖြစ်စေနိုင်ပါတယ်။ ဇရစ်ပင်နဲ့ ဓာတ်မတည့်သူများ ဇရစ်ပင်ထွက်ပစ္စည်းများကို ရှောင်ကြဉ်သင့်ပါတယ်။

နွေဦးပြည်သူများ ဇရစ်ပင်ရဲ့ ကျန်းမာရေးဆိုင်ရာ အကျိုးကျေးဇူးများကို သိရှိပြီး လိုအပ်သလို ရယူသုံးစွဲနိုင်ဖို့ ရေးသားဖော်ပြလိုက်ပါတယ်။

သာဇဏ် (CDM ကျန်းမာရေးဝန်ထမ်း၊ တိုင်းရင်းဆေးပညာရှင်)

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024