မကွေးတိုင်း၊ စလင်းမြို့နယ်မှာ မတ် ၁၆ ရက် မွန်းလွဲပိုင်းမှာ စစ်ကောင်စီရဲ့ သံပြားကာ ကားတစီး တိုက်ခိုက်ခံရပြီး တယောက်သေဆုံးကာ တချို့ ဒဏ်ရာရရှိခဲ့တယ်လို့ ဗမာ့တပ်တော်ကနေ သိရပါတယ်။
စလင်းမြို့နယ် ဆင်ဖြူကျွန်းမြို့ဘက်ကို အင်အားဖြည့်ဖို့လာတဲ့ စစ်ကောင်စီတပ်သား အင်အား ၂၀ လောက်လိုက်ပါလာတဲ့ သံပြားကာကားတစီးကို မတ် ၁၆ ရက် မွန်းလွဲ ၂ နာရီ ၁၅ မိနစ်လောက်မှာ ဗမာတပ်တော်ရဲ့ တပ်ရင်း ၇၀၇ က ကြားဖြတ်ဟန့်တိုက်တိုက်ခိုက်ခဲ့တာလို့ ဗမာ့တပ်တော်ရဲ့ ပြန်ကြားရေးတာဝန်ခံက DVB ကို ပြောပါတယ်။
အဲဒီတိုက်ခိုက်မှုကြောင့် စစ်ကောင်စီတပ်သားတယောက် ဦးခေါင်းကို ကျည်ထိမှန်သေဆုံးကာ၊ တပ်သားတယောက် လက်ကိုကျည်ထိမှန်ပြီး တခြားတပ်သားတချို့လည်း ဒဏ်ရာရရှိခဲ့တယ်လို့ ဆိုပါတယ်။
ဆင်ဖြူကျွန်းတိုက်နယ်အတွင်းကို မတ် ၇ ရက် မနက်ပိုင်းကစတင်ကာ စလင်းအခြေစိုက် ခမရ ၂၅၃၊ ၂၅၄၊ ၂၅၅ တပ်ရင်းတွေက စစ်ကောင်စီတပ်သား အင်အား ၂၀၀ လောက်နဲ့ စစ်ကြောင်းထိုး မွှေနှောက်နေတာလို့ ပြောပါတယ်။
အဲဒီ တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေအနေကို DVB က သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ဆင်ဖြူကျွန်းတိုက်နယ်က နေပူကန်ကျေးရွာကိုလည်း မတ် ၁၂ ရက် ညနေပိုင်းမှာ စစ်ကောင်စီစစ်ကြောင်းက မီးရှို့ဖျက်ဆီးခဲ့လို့ အိမ်ခြေ ၈၀ ကျော် မီးလောင်ကျွမ်းခဲ့တယ်လို့ ဒေသခံတွေဆီကနေ သိရပါတယ်။
