တနင်္သာရီတိုင်း၊ မြိတ်မြို့မှာ အသက် ၇ နှစ်အရွယ် မိန်းကလေးတယောက် ၃ ရက်ကြာတဲ့အထိ မိသားစုနဲ့ အသွယ်မရဘဲ ပျောက်ဆုံးနေတယ်လို့ မိသားစုနဲ့ နီးစပ်သူတွေထံက သိရပါတယ်။
မတ် ၁၄ ရက် မနက်ပိုင်းလောက်က အဆိုပါမိန်းကလေး ကစားနေချိန် ဘုန်းကြီးတပါးမှ လာရောက်ခေါ်ဆောင်သွားတယ်လို့ ရပ်ကွက်နေသူတွေက ပြောပါတယ်။
ပျောက်ဆုံးသူ အသက် ၇ နှစ်အရွယ် မိန်းကလေးနာမည်မှာ မသီသီဝင်း ဖြစ်ပြီး မြိတ်မြို့၊ တရုတ်တန်းရပ်၊ အေးချမ်းဖြူစင်လမ်းမှာ နေထိုင်တယ်လို့ သိရပါတယ်။
မတ် ၁၄ ရက် ညနေဘက်လောက်မှာ အဆိုပါဘုန်းကြီးနဲ့ မိသားစု ဖုန်းအဆက်အသွယ်ရပြီး ကလေးငယ်ကို ပြန်လာပို့ခိုင်းရာ မပို့ပေးဘဲ ဒီကနေ့အထိ ဖုန်းဆက်ပိတ်ထားတယ်လို့ မိသားစုနဲ့ နီးစပ်သူတယောက်က ပြောပါတယ်။
မိသားစုနဲ့ နီးစပ်သူတယောက်က “ကလေးကို တရက် နှစ်ရက် ခေါ်ဆောင်သွားမယ်လို့ ပြောတယ်။ မိသားစုဘက်က ပြန်လာပို့ခိုင်းတာ မပို့ပေးဘူး။ ဖုန်းကလည်း စက်ပိတ်ထားတယ်”လို့ ပြောပါတယ်။
အဆိုပါကလေးနဲ့ ဘုန်းကြီးမှာ ရန်ကုန်ဘက်ကို ရောက်နေပြီလို့ မိသားစုဘက်မှ စုံစမ်းသိရှိထားရပြီး မြိတ်မြို့မ၊ ရဲစခန်းမှာ အမှုဖွင့်ထားတယ်လို့ မိသားစုနဲ့ နီးစပ်သူတွေဆီမှ သိရပါတယ်။
