မန္တလေးတိုင်း၊ စဉ့်ကူးမြို့နယ်ရှိ လက်ပံလှရွာကို စစ်ကောင်စီလေတပ်က  မတ် ၁၄ ရက် မွန်းလွဲ ၃ နာရီလောက်မှာ လေကြောင်းကနေ ဗုံးကြဲတိုက်ခိုက်လို့ ကလေးငယ် ၆ ယောက် အပါအဝင် ၂၇ ယောက် သေဆုံးခဲ့ပြီး အယောက် ၃၀ လောက် ဒဏ်ရာရတယ်လို့ ပြည်သူ့ကာကွယ်ရေးတပ်မတော်၊ မန္တလေးက ထုတ်ပြန်ပါတယ်။

ကလေးငယ် ၂ ယောက်အပါအဝင် ၁၁ ယောက်သေဆုံးတယ်လို့ ထုတ်ပြန်ပြီးမကြာခင်မှာပဲ ၂၇ ယောက်သေဆုံးတယ်လို့ ပြင်ဆင်ထုတ်ပြန်လာတာပါ။

ပြည်သူ့ကာကွယ်ရေးတပ်မတော်၊ မန္တလေးရဲ့ ပြောရေးဆိုခွင့်ရှိသူက “လက်ရှိ နောက်ဆုံးအတည်ပြုနိုင်တဲ့စာရင်းအရဆိုရင်တော့ ၂၇ ဦးအထိ ရှိသွားပါပြီဗျ။ ကျား၊ မ ကတော့ အသေးစိတ်သိဖို့ လောလောဆယ်တော့ မလွယ်ကူသေးဘူးခင်ဗျ” လို့ မတ် ၁၄ ရက် ညပိုင်းမှာ DVB ကို ပြောပါတယ်။

မန္တလေး - မိုးကုတ် လမ်းပေါ်က ရွာကြီးတရွာဖြစ်တဲ့ လက်ပံလှရွာရဲ့ လူစည်ကားရာ ဈေးဆိုင်တန်းကို အကြောင်းမဲ့ တိုက်ခိုက်ခဲ့တာဖြစ်တယ်လို့ ဆိုပါတယ်။

မတ် ၄ ရက်ကလည်း စဉ့်ကူးမြို့နယ်၊ လက်ပံလှရွာကို လေကြောင်းကနေ တိုက်ခိုက်တာကြောင့် ပြည်သူ ၂ ယောက် သေဆုံးခဲ့သလို ထိခိုက်ဒဏ်ရာရသူတွေလည်းရှိပြီး ဇန်နဝါရီ ၃၁ ရက် မနက်အစောပိုင်းကလည်း စဉ့်ကူးမြို့ပေါ်က မြို့နယ်ပြည်သူ့ဆေးရုံကို လေကြောင်းကနေ ဗုံးကြဲတိုက်ခိုက်ခဲ့ပါသေးတယ်။

စဉ့်ကူးမြို့နယ်ဟာ ပြီးခဲ့တဲ့နှစ်ကပဲ ပြည်သူ့ကာကွယ်ရေးတပ်မတော်၊ မန္တလေးဦးဆောင်တဲ့ တော်လှန်ရေးတပ်ဖွဲ့တွေ ထိန်းချုပ်စိုးမိုးထားတာဖြစ်ပြီး ဒီလိုနယ်မြေတွေမှာ ပြည်သူကို ပစ်မှတ်ထားတဲ့ လေကြောင်းတိုက်ခိုက်မှုတွေကို စစ်ကောင်စီတပ်က တစထက်တစ ပေါ်ပေါ်ထင်ထင် ကျူးလွန်လာတယ်လို့လည်း ပြည်သူ့ကာကွယ်ရေးတပ်မတော်၊ မန္တလေးက ဆိုပါတယ်။