မြန်မာပြည်တွင်းမှာ အလုပ်ကိုင်ရှားပါးမှုနဲ့ ပြည်တွင်းစစ်ပဋိပက္ခတွေကြောင့် မြန်မာရွှေ့ပြောင်းလုပ်သားတွေဟာ တရုတ်နိုင်ငံ၊ ရွှေလီဘက်ကို တရားမဝင် လမ်းကြောင်းတွေ ကနေ ငွေကြေး သိန်းနဲ့ချီပေးကာ ခိုးဝင်ပြီး အလုပ်အကိုင် ရှာဖွေနေရပါတယ်။

မြန်မာ-တရုတ်နယ်စပ်၊ ရှမ်းပြည်နယ်မြောက်ပိုင်း၊ မူဆယ်မြို့ဘက်ကို လာရောက် အလုပ်ရှာဖွေ ကြတဲ့ မြန်မာရွှေ့ပြောင်းလုပ်သားတွေ ထောင်နဲ့ချီရှိနေပြီး အဲ့ဒီထဲက အများစုဟာ မူဆယ်မှာရှိတဲ့ နယ်စပ်ဂိတ်တွေကနေ တရားဝင်ဖြတ်သန်းကာ ရွှေလီမြို့ဘက်ကို အလုပ်သွားရှာကြတာတွေ ရှိပါတယ်။ 

တချို့ အထောက်အထား မပြည့်စုံတဲ့သူတွေကတော့ တရားမဝင်မှောင်ခိုလမ်းကြောင်းတွေကနေ မြန်မာငွေကျပ် ၄ သိန်း ကျော်၊  ၅ သိန်းပေးကာ ခိုးဝင်ပြီး အလုပ်အကိုင် ရှာဖွေနေကြရတယ်လို့  ရွှေလီမှာနေထိုင်တဲ့ ဒေသခံတယောက်က ပြောပါတယ်။

တရုတ်ဘက်ကို အလုပ်သွားရှာတဲ့ထဲမှာ မြန်မာပြည်မက အများဆုံးဖြစ်တယ်လို့ ဆိုပါတယ်။ တရုတ်ဘက်က အဖမ်းအဆီးတွေ တင်းကျပ်နေတယ်ဆိုပေမဲ့ ရရာနည်းလမ်းနဲ့ တရုတ်ထဲကို ဝင်ရောက်ပြီး မြန်မာတွေ အလုပ်ရှာနေကြတာပါ။

စစ်တပ်က အာဏာသိမ်းတဲ့ ၄ နှစ်ကျော်အတွင်း လက်ရှိ အဲ့ဒီဒေသတွေမှာ ဖြစ်ပွားနေတဲ့ စစ်ရေးပဋိပက္ခတွေကြောင့် ကုန်ဈေးနှုန်းကြီးမြင့်မှုနဲ့ အလုပ်အကိုင်းရှားပါးမှုတွေကြောင့် မြန်မာပြည်မမှာရှိတဲ့ အလုပ်လုပ်နိုင်တဲ့ အရွယ်တွေဟာ နီးစပ်ရာနိုင်ငံတွေကိုသွားပြီး အလုပ်အကိုင်ရှာဖွေကာ မိသားစုကို ထောက်ပံ့နေရပါတယ်။

တရုတ်ပြည်က စက်ရုံတွေမှာ အလုပ်ဝင်လုပ်မယ်ဆိုတဲ့ ရည်ရွယ်ချက်နဲ့ မူဆယ်မြို့ဘက်ကို တက်လာကြပြီး အထောက်ထားနဲ့ ငွေကြေးမပြည့်စုံမှုကြောင့် တရုတ်ထဲလည်းဝင်မရ၊ အလုပ်ကလည်း ရှာမရဘဲ စးရိတ် ပြတ်ကာ သောင်တင်နေတဲ့သူတွေလည်း ထောင်နဲ့ချီ ရှိနေတယ်လို့ မူဆယ်မြို့ခံတယောက်က ပြောပါတယ်။

စစ်တပ်က စစ်မှုထမ်းဥပဒေကို အသက်သွင်းပြီးနောက် နေ့စဉ် တရုတ်ပြည်ဘက်ကို တရားဝင် လမ်းကြောင်းကနေ ဝင်ထွက်နေသူ ထောင်ချီရှိပါတယ်။

တရုတ်နိုင်ငံထဲကို တရားမဝင်လမ်းကြောင်းကနေ ဝင်ရောက်အလုပ်ရှာ ဖွေသူတွေရှိသလို အိမ်နီးချင်း ထိုင်းနိုင်ငံနဲ့ လာအိုနိုင်ငံဘက်ကိုလည်း တရား မဝင်လမ်းကြောင်းကနေ ဝင်ရောက်ကာ အလုပ်လာရောက်ရှာဖွေသူတွေလည်း နေ့စဉ်ရှိနေပါတယ်။