အခု လာမယ့်သင်္ကြန်ကာလတွင်း နေရပ်ပြန်မယ့် မြန်မာ၊ လာအိုနဲ့ ကမ္ဘောဒီးယား ၃ နိုင်ငံက ရွှေ့ပြောင်းအလုပ်သမားတွေအနေနဲ့  နယ်စပ်ဖြတ်ကျော်ဂိတ်တွေမှာ အဝင်အထွက်တုံး Re-entry ထုစရာ မလိုတဲ့အပြင် ဂိတ်ကြေးလည်း ဆောင်စရာမလိုဘူးလို့ ထိုင်းအလုပ်သမားဝန်ကြီးဌာနက ထုတ်ပြန်ထားပါတယ်။ 

နှစ်နိုင်ငံကြား ဆက်ဆံရေးပိုမိုကောင်းမွန်စေဖို့၊ သင်္ကြန်ကာလ မိသားစုဝင်တွေနဲ့အတူ ရိုးရာပွဲဝင်နွှဲမယ့် ရွှေ့ပြောင်းအလုပ်သမားတွေအနေနဲ့ အိမ်ပြန် ကုန်ကျစရိတ်သက်သာစေဖို့ ရည်ရွယ်ပြီး မတ်လ ၁၁ ရက် ရွှေ့ပြောင်းအလုပ်သမားများစီမံခန့်ခွဲမှုဆိုင်ရာ အစည်းအဝေးမှာ ခုလို ဆုံးဖြတ်ခဲ့တယ်လို့  ထိုင်းအလုပ်သမားဝန်ကြီး နိုင်းဖိဖတ် ရာ့ချ်ကစ်ပရကန်က ပြောပါတယ်။ 

ဒီလျှော့ပေါ့ပေးမှုဟာ လာမယ့် ဧပြီလ ၁ ရက်မှ  မေလ ၁၅ ရက်အတွင်းသာ အကျုံးဝင်မှာဖြစ်ပြီး အဲဒီထက်နောက်ကျမှ ပြန်ဝင်လာမယ့် အလုပ်သမားတွေကတော့ အရင်လို ပုံမှန်စည်းကမ်းအတိုင်း တုံးထု၊ ဂိတ်ဝင်ထွက်ကြေး ပေးဆောင်ရမှာဖြစ်တယ်။

အလုပ်သမားတွေအနေနဲ့  သတ်မှတ်ထားတဲ့အချိန်အတိုင်း ပြန်ဝင်လာကြဖို့ တိုက်တွန်းတယ်၊ ဒါမှပဲ အလုပ်အကိုင်မပျက် ဆောင်ရွက်နိုင်မယ်လို့ အလုပ်သမားဝန်ကြီးက ပြောပါတယ်။ 

ထိုင်းမှာ နေထိုင်ခွင့်အထောက်အထားမရှိလို့ name list အမည်စာရင်းတင်သွင်းထားတဲ့ လူသစ်တွေ အနေနဲ့လည်း ဒီမတ်လ ၃၀ ရက်အပြီး အလုပ်သမားမှတ်ပုံတင်ကတ် ပြုလုပ်ထားကြဖို့ အလုပ်သမားဝန်ကြီးဌာနက တိုက်တွန်းနှိုးဆော်ထားပါတယ်။ 

Source: ထိုင်း အလုပ်သမားစီမံခန့်ခွဲရေးဦးစီးဌာန