Home
မြန်မာသတင်း
နေအိမ်နှင့် ပိုင်ဆိုင်မှုများ ချိပ်ပိတ်ခံရသည့်ပေါ် ခရိုနီသူဌေး ဦးကျောက်တောင် တုံ့ပြန်
DVB
·
March 11, 2025

နေအိမ်နဲ့ ပိုင်ဆိုင်မှုတွေချိပ်ပိတ်ခံရတာ ဖြစ်သင့်ဖြစ်ထိုက်တာဖြစ်လို့ အပြစ်မတင်ဘူးလို့ နေအိမ်ချိပ်ပိတ်ခံလိုက်ရတဲ့  ရခိုင်ခရိုနီ သူဌေးအဖြစ်လူသိများတဲ့ ဦးကျောက်တောင်က ပြန်လည်တုံ့ ပြန်ပြောပါတယ်။

အာရက္ခတပ်တော် (AA) ထိန်းချုပ်ထားတဲ့ ရခိုင်က မြို့နယ်တွေမှာ စစ်ခေါင်းဆောင်မင်းအောင်လှိုင် သားပိုင်ဆိုင်တဲ့ ဟိုတယ်အပါအဝင် စစ်တပ်အသိုက်အဝန်းနဲ့ နီးစပ်တဲ့ ခရိုနီသူဌေးကြီးတွေရဲ့ ဟိုတယ် တွေ၊ နေအိမ်တွေ၊ ပိုင်ဆိုင်မှုတွေကို AA က တရားဝင်စာကပ်ပြီး အခုလထဲမှာပဲ ချိပ်ပိတ်သိမ်းဆည်းလိုက်ပါတယ်။

AA က ချိပ်ပိတ်သိမ်းဆည်းလိုက်တဲ့အထဲမှာ ငပလီမှာရှိတဲ့ စစ်ခေါင်းဆောင်ရဲ့ သားဖြစ်သူ အောင်ပြည့်စုံပိုင်ဆိုင်တဲ့ အဇူရာ ဟိုတယ်တွေနဲ့ စစ်အုပ်စုနဲ့ ဆက်စပ်တဲ့ ဟိုတယ်တွေလည်း ပါဝင်ပါတယ်။

ဒါ့အပြင် ခရိုနီသူဌေးကြီးလို့ လူသိများတဲ့ ဦးကျောက်တောင်ရဲ့ နေအိမ်တွေ၊ ပိုင်ဆိုင်မှုတွေ အပါအဝင် စစ်အုပ်စုနဲ့နီးစပ်တဲ့ သူတွေရဲ့ ပိုင်ဆိုင်မှုတွေ၊ နေအိမ်ရာနဲ့ချီကို အာရက္ခပြည်သူ့အစိုးရပိုင် အဆောက်အဦတွေအဖြစ် သိမ်းပိုက်လိုက်တာဖြစ်ပါတယ်။

အဲဒီထဲက တဦးဖြစ်တဲ့ အသက် ၆၈ နှစ်ရှိပြီဖြစ်တဲ့ ဦးကျောက်တောင်ဟာ သူ့အသက် ၁၈ နှစ်လောက်ကတည်းက ရခိုင်ပြည်နယ်မှာ စီးပွားရေးလုပ်တာလို့ ပြောပါတယ်။

တောင်ကုတ်မြို့မှာရှိတဲ့ နေလသစ္စာကုမ္ပဏီ၊ ထာဝရအောင်မြေကုမ္ပဏီ၊ ဂုဏ်ဓန သင်္ဘောကျင်း၊ ဘင်္ဂလားဒေ့ရှ် ကုန်သွယ်ရေးသင်္ဘောတွေနဲ့ သစ်လုပ်ငန်း အပါအဝင် တခြားစီးပွားရေး လုပ်ငန်းများစွာကိုလည်း ပိုင်ဆိုင်ထားသူတယောက်ဖြစ်ပါတယ်။

ပိတ်သိမ်းခံလိုက်ရတဲ့ နေအိမ်နဲ့ပိုင်ဆိုင်မှု စုစုပေါင်းတန်ဖိုး ဒေါ်လာ ၅ သန်းဖိုးလောက်ရှိနိုင်တယ်လို့ ပြောဆိုပြီး အခုလိုဖြစ်သွားတာဟာ  ဖြစ်သင့်ဖြစ်ထိုက်တဲ့လုပ်ရပ်သာဖြစ်တယ်လို့ ခရိုနီ သူဌေးကြီး ဦးကျောက်တောင်က ပြောပါတယ်။

“လိုင်းပေါ်တက်မှပဲ ကျနော်တို့ပိုင်ဆိုင်မှုတွေကို သိမ်းပိုက်ထားတယ်ဆိုတာပဲ သိတာပါ။ ကျနော်တို့က အစိုးရအသစ်တက်လာသမျှ ဒီလိုကြီးပဲ ခံခဲ့ရတယ်။ ကျနော်က ဘယ်နိုင်ငံရေးနဲ့မှလည်း မပတ်သတ်ဘူး၊ ကျနော်အလုပ်ကိုကျနော်လုပ်တယ်၊ သို့သော် ကျနော်တို့ကို တက်လာတဲ့ အစိုးရတိုင်းက ကျနော်တို့နဲ့ လာပူးပေါင်းတယ်။ ဘာလို့ဆို ကျနော်တို့က ကိုယ့်ဒေသကို ဖွံ့ဖြိုးအောင် ကိုယ့်အိတ်ထဲကစိုက်ပြီး နည်းမျိုးစုံနဲ့ဖွံ့ဖြိုးအောင် လုပ်တဲ့သူသာဖြစ်တာကြောင့် သူတို့က ကျနော်တို့နဲ့ပူးပေါင်းပြီးတော့ ဒေသဖွံ့ဖြိုးအောင်လုပ်စေချင်တယ် ဒါပါပဲ။ အဲ့တော့ ဒီဟာကို စစ်တပ်နဲ့ ပေါင်းတယ်ဆိုပြီးတော့ ကျနော်တို့အကြောင်းကိုမသိတဲ့ အစိုးရ အသစ်တွေကို ကျနော်တို့ကို မကြိုက်တဲ့ သူတွေက သွားပြောတာဖြစ်ပါလိမ့်မယ်၊ ဘယ်သူ့ကိုမှ အပြစ်မတင်ပါဘူး၊ ဖြစ်သင့်ဖြစ်ထိုက်တာ ဖြစ်သွားတယ်လို့ပဲ ယုံကြည်ပါတယ်။”

ဒါ့အပြင် စစ်အုပ်စုပိုင်ဆိုင်မှုတွေနဲ့ဆက်စပ်နေတဲ့ သံတွဲမြို့နဲ့ ငပလီကမ်းခြေက ဟိုတယ်တွေနဲ့ နေအိမ် ၁၀၀ ကျော် ချိပ်ပိတ်ခံထားရသလို တောင်ကုတ်မြို့မှာလည်း နေအိမ် ၃၁ လုံးထက်မနည်း AA က ချိပ်ပိတ်သိမ်းဆည်းထားပါတယ်။

ဘူးသီးတောင်နဲ့ မောင်တောမြို့တွေမှာလည်း ARSA၊ RSO စတဲ့ မွတ်ဆလင်လက်နက်ကိုင် ခေါင်းဆောင်တွေ၊ စစ်ကောင်စီနဲ့ဆက်စပ်တဲ့ နေအိမ်တွေ ၅၀ ထက်မနည်း ချိပ်ပိတ်ခံထားရပါတယ်။

ဒေသတွင်းစစ်ရှောင်ကူညီ‌ပေးနေသူ ဆရာဝေဟင်အောင်က “ဗိုလ်ချုပ်ထွန်းမြတ်နိုင် ပြောသွားတဲ့ စကားတခွန်းရှိပါတယ်။ ရန်သူနဲ့ပေါင်းသွားပြီဆိုလို့ရှိရင် ကိုယ်တို့ဘက်ကလည်း ပြတ်ပြတ်သားသား လုပ်ဆောင်ရမှာပေါ့ဆိုတဲ့ စကားတခွန်းပြောလို့ရှိပါတယ်။ အိမ်တွေကို ချိပ်ပိတ်တယ်ဆိုတာက ရခိုင်တွေ နေတဲ့အိမ်၊ အာရက္ခတပ်တော်ရဲ့‌တော်လှန်ရေးကို အနှောင့်အယှက် မပေးတဲ့အိမ်တွေကို ဘာမှမလုပ်ဘူး။ ရန်သူစစ်ကောင်စီနဲ့ ပေါင်းသွားတဲ့သူတွေ၊ စစ်ကောင်စီရဲ့ အလုပ်ကို လုပ်တဲ့သူတွေကို စစ်ကောင်စီအလိုတော်ရဲ့အိမ်တွေကို ချိပ်ပိတ်တာဖြစ်တဲ့အတွက် ဒါကတော့ အထူးအထွေ ပြောစရာမလိုပါဘူး” လို့ ပြောပါတယ်။

AA ကထုတ်ပြန်ထားတဲ့  ချိပ်ပိတ်စာထဲမှာတော့ "အဲဒီအိမ် (ဒါမှမဟုတ်) အဲဒီအဆောက်အအုံဟာ အာရက္ခ ပြည်သူ့တော်လှန်ရေးအစိုးရကို ဆန့်ကျင်တဲ့ အကြမ်းဖက်အဖွဲ့အစည်း၊ လူပုဂ္ဂိုလ်တွေနဲ့ ပတ်သက်ဆက်စပ်နေတာကြောင့် အစိုးရပိုင်အဖြစ် သိမ်းဆည်းသွားမှာဖြစ်တယ်” လို့ ရေးထား ပါတယ်။

ဒါ့အပြင် ချိပ်ပိတ်တဲ့နေ့ကစပြီး ကျူးကျော်တာ၊ ရောင်းဝယ်တာ၊ နေထိုင်တာတွေ မပြုလုပ်ရ ကြောင်း သတိပေးထားပြီး မလိုက်နာရင် အရေးယူမယ်လို့ ပါရှိပါတယ်။ နေအိမ်တွေ ချိပ်ပိတ်ခံရတဲ့ ကိစ္စနဲ့ပတ်သတ်ပြီး AA ဘက်က တရားဝင်ထုတ်ပြန်ပြောထားတာ မရှိသေးသလို AA ရဲ့ ပြောရေးဆိုခွင့်ရှိသူ ဦးခိုင်သုခကို DVB က မေးမြန်းထားပေမဲ့ ပြန်လည်ဖြေဆိုတာမရှိသေးပါဘူး။

တဖက်မှာလည်း အခုလိုမျိုး AA ရဲ့ နေအိမ်တွေ ချိပ်ပိတ်လုပ်ဆောင်နေမှုအပေါ်မှာ အထူး သတိထားဖို့လိုနေပြီး အကျိုးရှိနိုင်သလို အပြစ်လည်းဖြစ်တတ်တယ်လို့ သုံးသပ်မှုတွေ လည်း ရှိနေပါတယ်။

ရခိုင်ဒီမိုကရေစီအဖွဲ့ချုပ်ပါတီ (ALD) မှ  ဦးမျိုးကျော်က “နိုင်ငံရေးမှာ စစ်ရေးမှာ ဒါမျိုးတွေက ရှိပါတယ်။ ခေတ်အဆက်ဆက်မှာ ရန်သူနဲ့ပေါင်းပြီးနေတဲ့သူတွေ၊ အဖွဲ့အစည်းတွေရှိတယ်ဆိုရင် သူတို့ကိုတော့ အခုလိုအချိန်ကာလမျိုးမှာ တားဆီးဖြတ်တောက်ရတဲ့ သဘော သဘာဝတော့ ရှိပါတယ်။ အဲဒီမှာ တခုရှိတာက တကယ်ကို ရန်သူဘက်မှာရှိလားဆိုတဲ့ ဟာမျိုးကိုတော့ စိစစ်သေချာဖို့ လိုပါတယ်။ အဲလိုမျိုးမဟုတ်ဘူးဆိုရင်တော့ အကျိုးရှိနိုင်သလို အပြစ်လည်းဖြစ် တတ်တယ်။ ဒါကြောင့် ဥပဒေပိုင်းဆိုင်ရာ အရေးယူတဲ့အခါမှာ အထူးသတိထား ဆောင်ရွက်ဖို့ ကျနော့် အနေနဲ့ ပြောလိုတယ်” လို့ အကြံပြုပါတယ်။

ရခိုင်ပြည်နယ်မှာတော့ မြို့နယ်ပေါင်း ၁၇ မြို့နယ်ထဲက ၁၄ မြို့နယ်ကို အာရက္ခတပ်တော် (AA) က သိမ်းပိုက်ထားပြီး ကျန်မြို့နယ်တွေဖြစ်တဲ့ စစ်တွေနဲ့ ကျောက်ဖြူမြို့နယ်မှာလည်း တိုက်ပွဲတွေ ပြင်းထန်နေပါတယ်။

AA ထိန်းချုပ်လိုက်တဲ့ မြို့နယ်တွေမှာတော့ ဖွံ့ဖြိုးရေးလုပ်ငန်းတွေကို စလုပ်နေသလို အခုလို စစ်အုပ်စုနဲ့ ဆက်စပ်ပတ်သက်တဲ့ စီးပွားရေးလုပ်ငန်းတွေကို ချိပ်ပိတ်သိမ်းဆည်းမှုတွေကိုလည်း အခုနှစ်စပိုင်းကစပြီး စတင်လုပ်ဆောင်လာတာပဲဖြစ်ပါတယ်။

ကေခိုင်

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024