မြန်မာအလုပ်သမားနဲ့ ပြည်သူလူထုအပေါ် စစ်ကောင်စီရဲ့ ဖိနှိပ်မှုတွေအတွက် အရေးယူပေးဖို့ တောင်းဆိုတဲ့အနေနဲ့   ရန်ကုန်မြို့ လူစည်ကားရာနေရာတွေမှာ သပိတ်အင်အားစုတွေက ILO A33 MYANMAR 2025 စာသားပါ တီရှပ်အနီရောင်ဝတ်ဆင်ပြီး ကမ်ပိန်းပြုလုပ်ခဲ့တယ်လို့ မြန်မာနိုင်ငံအလုပ်သမားတပ်ပေါင်းစု (MLA)ကနေ သိရပါတယ်။

မတ် ၁၀ ရက် မနက်ပိုင်းက ကမ်ပိန်းကို ရန်ကုန်တော်လှန်ညီနောင် ၄ ဖွဲ့နဲ့အတူ ရန်ကုန်မြေပြင်သပိတ်အင်အားစုတွေက ပူးပေါင်းလုပ်ဆောင်ခဲ့တာလို့ ဆိုပါတယ်။

MLA ခေါင်းဆောင် Nsing Gyi က “စစ်ကောင်စီက ILO အလုံးစုံ စီးပွားရေး ပိတ်ဆို့မှု လုပ်ဖို့ ကမ်ပိန်းလုပ်ပြီး တောင်းဆိုနေတာ။ အကြမ်းဖက် စစ်တပ်ဆီကို ဒေါ်လာ မရောက်အောင် ဖြတ်တောက်နိုင်ဖို့အတွက် လေယာဉ်ဆီ စစ်လက်နက် ဝယ်ယူနေတာ လျော့ကျသွားဖို့ အလုံးစုံ စီးပွားရေးပိတ်ဆို့မှု ILO က ချမှတ်ဖို့အတွက် တောင်းဆိုနေတာဖြစ်တယ်”လို့ ပြောပါတယ်။

ရန်ကုန်တော်လှန် ညီနောင် ၄ ဖွဲ့နဲ့ အတူ ရန်ကုန်သပိတ်အင်အားစုတွေက လူထုလှုပ်ရှားမှုတွေကို ရန်ကုန်မြို့ လူစည်ကားရာနေရာတွေမှာ မကြာခဏ ပြုလုပ်လေ့ရှိပြီး စစ်အာဏာရှင် ကျဆုံးတဲ့အထိ ဆက်လက်လုပ်ဆောင်သွားမယ်လို့ သပိတ်ဦးဆောင်ကော်မတီအဖွဲ့တွေဆီက သိရပါတယ်။