ဧရာဝတီတိုင်း၊ ညောင်တုန်းမြို့အနီးကို ဗဟိုပြုပြီး အင်အားရစ်ချ်တာစကေး ၅ ဒသမ ၁ အဆင့်ရှိ အင်အားအသင့်အတင့်ရှိတဲ့ မြေငလျင်တခု မတ် ၅ ရက် ဒီမနက်အစောပိုင်းက လှုပ်ခတ်သွားတယ်လို့ မိုးဇလ ဌာနက သတင်းထုတ်ပါတယ်။
ဒီနေ့မနက် မြန်မာစံတော်ချိန် မနက် ၄ နာရီ၊ ၃၆ မိနစ်၊ ၄၇ စက္ကန့်က ကမ္ဘာအေးမြေငလျင်စခန်းမှ အနောက်-အနောက်မြောက်ဘက် ၃၃ မိုင်ခန့်ကွာဝေးတဲ့ မြန်မာနိုင်ငံ ပြည်တွင်း ညောင်တုန်းမြို့ရဲ့ အရှေ့တောင်ဘက် ၆ မိုင်ခန့်အကွာ မြောက်လတ္တီတွဒ် ၁၆ ဒသမ ၉၆ ဒီဂရီ၊ အရှေ့လောင်ဂျီတွဒ် ၉၅ ဒသမ ၆၆ ဒီဂရီ၊ အနက် ၁၀ ကီလိုမီတာကို ဗဟိုပြုပြီး မြေငလျင် လှုပ်ရှားသွားတာလို့ ဆိုပါတယ်။
ငလျင်လှုပ်ခတ်မှုကို ညောင်တုန်းဒေသခံတွေသာမက ရန်ကုန်မြို့နေ ပြည်သူတွေပါ သိရှိ ခံစားလိုက်ရပြီး ငလျင်ဒဏ်ကြောင့် ထိခိုက်ပျက်စီးမှု သတင်းတွေကတော့ မရရှိသေးပါဘူး။
မတ် ၃ ရက်မနက်ကလည်း ရန်ကုန်တိုင်း၊ တိုက်ကြီးမြို့အနီး ဗဟိုပြုပြီး အင်အားရစ်ချ်တာ စကေး ၄ ဒသမ ၅ အဆင့်ရှိ အင်အားအနည်းငယ်ရှိတဲ့ မြေငလျင်တခု လှုပ်ခတ်သွားပါတယ်။
ဒါ့အပြင် မတ် ၁ ရက် ညနေကလည်း မန္တလေးတိုင်း၊ ညောင်ဦးမြေငလျင်စခန်းရဲ့ တောင်ဘက် ၆၁ မိုင်ခန့်ကွာဝေးတဲ့ မင်းဘူးမြို့ရဲ့ မြောက်-အရှေ့မြောက်ဘက် ၁၀ မိုင်ခန့်အကွာက မြေပြင်အနက် ၁၂၃ ကီလိုမီတာကို ဗဟိုပြုပြီး အင်အားရစ်ချ်တာစကေး ၃ ဒသမ ၈ အဆင့်ရှိ ငလျင်တခု လှုပ်ခတ်သွားပါသေးတယ်။
