အာရက္ခတပ်တော် (AA)သိမ်းပိုက်ထားတဲ့ မောင်တောမြို့နယ်က စစ်ကောင်စီရဲ့ နယ်ခြားစောင့်ကွပ်ကဲမှု ဌာနချုပ်ဟောင်းကို မတ် ၁ ရက်နေ့ ဒီမနက်အစောပိုင်းမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ AA နဲ့ နီးစပ်သူတွေဆီကနေ သိရပါတယ်။
ကျီးကန်းပြင် နယ်ခြားစောင့်ကွပ်ကဲမှုဌာနချုပ်ဟောင်းကို ဒီမနက် ၁ နာရီလောက်မှာ စစ်ကောင်စီက ဂျက်တိုက်လေယာဉ်နဲ့ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တယ်လို့ AA နဲ့ နီးစပ်သူတယောက်က DVB ကို ပြောပါတယ်။
အဲဒီဗုံးသီးတွေဟာ နခခ ဌာနချုပ်ရဲ့ အဆောက်ဦတချို့အပေါ်ကျရောက်ပေါက်ကွဲပြီး ထိခိုက်ပျက်စီးခဲ့ပေမယ့် ထိခိုက်သေဆုံးသူမရှိခဲ့ဘူးလို့ ဆိုပါတယ်။
နယ်ခြားစောင့်ဌာနချုပ်ကို ပြီးခဲ့တဲ့ ၂၀၂၄ မေ ၂ ရက်နေ့မှာ AA က အပြီးသတ် တိုက်ခိုက်သိမ်းပိုက်ခဲ့တာဖြစ်ပြီး AA တပ်ဖွဲ့ဝင်တွေ တပ်စွဲနေထိုင်တယ်ထင်တာကြောင့် လာရောက်ဗုံးကြဲခဲ့တာဖြစ်မယ် လို့ ပြောပါတယ်။
AA သိမ်းပိုက်ထိန်ချုပ်ထားတဲ့ ပလက်ဝမြို့နယ်၊ ပျဉ်ကျေးရွာကိုလည်း ဖေဖော်ဝါရီ ၂၅ ရက်နေ့မှာ စစ်ကောင်စီဘက်က လေကြောင်းတိုက်ခိုက်ခဲ့လို့ ခရစ်ယာန်ဘုရားကျောင်းတခုနဲ့ နေအိမ်အဆောက်ဦတချို့ ထိခိုက်ပျက်စီခဲ့တယ်လို့ ဒေသခံတွေဆီကနေ သိရပါတယ်။
