တအာင်းပြည်အတွင်း ဖေဖော်ဝါရီ ၂၀ ရက်နေ့ကနေ ၂၂ ရက်နေ့အထိ စစ်ကောင်စီရဲ့ လေကြောင်းတိုက်ခိုက်မှုတွေကြောင့် ဒေသခံတွေထိခိုက်သေဆုံးခဲ့ရတယ်လို့ တအာင်းတပ်မတော် TNLA က ဖေဖော်ဝါရီ ၂၂ ရက် ဒီနေ့ ထုတ်ပြန်လိုက်ပါတယ်။
ဖေဖော်ဝါရီ ၂၀ ရက်နေ့ ညအချိန်မှာ တအာင်းပြည်၊ တပ်မဟာ ၃ နယ်မြေ၊ မိုးမိတ်မြို့နယ်၊ ဝဲဘောင်းကျေးရွာကို ဂျက်ဖိုက်တာနဲ့ ပေါင် ၅၀၀ ဗုံး ၂ လုံး ကြဲပြီးတိုက်ခိုက်ခဲ့တာကြောင့် အသက် ၈ နှစ်အရွယ် ကလေးငယ်အပါအဝင် ဒေသခံ ၃ ယောက် သေဆုံးခဲ့သလို ၇ ယောက် ထိခိုက်ဒဏ်ရာ ရရှိခဲ့ပြီး နေအိမ် ၅ လုံးလည်း ထိခိုက်ပျက်စီးသွားခဲ့တယ်လို့ TNLA က ဆိုပါတယ်။
ဖေဖော်ဝါရီ ၂၁ ရက်နေ့မှာတော့ နောင်ချိုမြို့နယ်၊ လောက်ဖန်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၁ ယောက် သေဆုံး၊ ကလေးငယ်အပါအဝင် ဒေသခံ ၄ ယောက် ထိခိုက်ဒဏ်ရာရရှိခဲ့ပြီး နေအိမ် ၆ လုံးလည်း ထိခိုက်ပျက်စီးသွားခဲ့ရပါတယ်။
ဖေဖော်ဝါရီ ၂၂ ရက်နေ့ မနက် ၁ နာရီ ဝန်းကျင်မှာလည်း စစ်ကောင်စီက Y-12 လေယာဉ်နဲ့ နောင်ချိုမြို့နယ်၊ ရွှေမုဋ္ဌောကျေးရွာကို ဗုံး ၅ လုံးနဲ့ တောင်ရှည်ကျေးရွာကို ဗုံး ၂၇ လုံး ကြဲချတိုက်ခိုက်ခဲ့တာကြောင့် ဒေသခံတယောက် သေဆုံးခဲ့ပြီး နေအိမ်အများအပြား ပျက်စီးခဲ့ပါတယ်။
စစ်ကောင်စီဟာ တိုက်ပွဲမရှိဘဲ အရပ်သားပြည်သူတွေကို ပစ်မှတ်ထားတိုက်ခိုက်နေတာကြောင့် ပြည်သူတွေအနေနဲ့ သတိရှိကြဖို့နဲ့ လေကြောင်းရန်ကာကွယ်ရေးဆိုင်ရာ နည်းလမ်းတွေကို လိုက်နာဆောင်ရွက်ကြဖို့ကိုလည်း TNLA က သတိပေးပါတယ်။
စစ်ကောင်စီနဲ့ နှစ်ဖက်တွေ့ဆုံဆွေးနွေးခဲ့တဲ့ ဖေဖော်ဝါရီ ၁၆ ရက်နေ့ကနေ ၂၂ ရက်နေ့အထိ စစ်ကောင်စီဟာ လက်နက်ကြီး၊ လေကြောင်းတို့နဲ့ လာရောက်ပစ်ခတ်တိုက်ခိုက်ခဲ့တာကြောင့် တအောင်းပြည်အတွင်းက ကလေးငယ်တယောက်အပါအဝင် ၆ ယောက်သေဆုံးခဲ့သလို ကလေးငယ်တယောက်အပါအဝင် ၁၅ ယောက် ထိခိုက်ဒဏ်ရာ ရရှိခဲ့တယ်လို့ TNLA က ဆိုပါတယ်။
ပြီးတော့ နောင်ချိုပြည်သူ့ဆေးရုံ၊ ဘုန်းကြီးကျောင်းဆောင်နဲ့ ပြည်သူ့နေအိမ် ၁၁ လုံး ထိမှန် ပျက်စီးသွားခဲ့တယ်လို့လည်း ထုတ်ပြန်ချက်မှာ ပါရှိပါတယ်။
ဆွေးနွေးပွဲမှာ နှစ်ဖက်အပြန်အလှန် တောင်းဆိုမှုတွေလုပ်ခဲ့ကြပြီး TNLA ဘက်ကတော့ နှစ်ဖက်တပ် ရောက်တဲ့နေရာမှာ အပစ်အခတ်ရပ်စဲဖို့၊ နှစ်ဖက်ထိုးစစ်ဆင်တာ၊ ဒရုန်းနဲ့တိုက်ခိုက်တာ၊ လက်နက်ကြီးနဲ့ပစ်ခတ်တာ၊ လေကြောင်းဗုံးကြဲတာ စတဲ့ စစ်ရေးလှုပ်ရှားမှုတွေ ရပ်တန့်ဖို့နဲ့ ထိန်းချုပ်ဒေသထဲကို ဆေးနဲ့ လူသုံးကုန်တွေပို့ခွင့်ရဖို့တောင်းဆိုပြီး ဆွေးနွေးရခက်ခဲတာကြောင့် ၂ ရက်ကြာ ဆွေးနွေးအပြီး ရပ်ဆိုင်းခဲ့ကြပါတယ်။
