ထိုင်းနိုင်ငံမှာ ဥပဒေနဲ့ မညီညွတ်တဲ့ နိုင်ငံခြားသားတွေ စစ်ဆေးနှိမ်နင်းနေတာမှာ ၃ ရက်တာ ကာလအတွင်း  ၁၄၅ ယောက် ဖမ်းဆီးရမိတယ်လို့  ဘန်ကောက် နခွန်းဘန်နယ်မြေရဲတပ်ဖွဲ့က ဖေဖော်ဝါရီ ၂၀ ရက်  သတင်းစာရှင်းပွဲမှာ ပြောပါတယ်။ 

နခွန်းဘန်ရဲတပ်ဖွဲ့အနေနဲ့ မိမိတာဝန်ယူထားတဲ့ နယ်မြေ ၁ မှ ၉ အတွင်း နေရာပေါင်း ၁၂၃ နေရာကို ဖေဖော်ဝါရီ ၁၈ မှ ၂၀ ရက်အထိ ၃ ရက်တာ သွားရောက်စစ်ဆေးခဲ့တယ်။ 

စစ်ဆေးချက်အရ ဥပဒေနဲ့မညီညွတ်တဲ့ နိုင်ငံခြားသား စုစုပေါင်း ၁၄၅ ယောက်ဖမ်းဆီးရမိကြောင်း၊  အဲဒီထဲမှာ တရုတ်နိုင်ငံသား ၇၇ ယောက်၊ မြန်မာ ၃၂ ယောက်၊ လာအို ၁၄ ယောက်  တခြားနိုင်ငံသား ၁၃ ယောက် ပါဝင်တယ်။

ဒါ့အပြင် ဥပဒေနဲ့မညီတဲ့ နိုင်ငံခြားသားနဲ့ပတ်သက်တဲ့ ထိုင်းနိုင်ငံသား ၉ ယောက်ပါ ဖမ်းဆီး အရေးယူခဲ့တယ်လို့ နခွန်းဘန်နယ်မြေရဲတပ်ဖွဲ့ ရဲမှူးကြီး ဆယမ်ဘွန်းဆုမ်က သတင်းစာရှင်းပွဲမှာ ပြောပါတယ်။ 

အဲဒီထဲမှာ မူးယစ်မှု ၁ ယောက်၊ လောင်းကစားမှု ၆၇ ယောက် ၊ လဝကဥပဒေနဲ့ မညီညွတ်သူ  ၁၅ ယောက်၊ အလုပ်သမားဥပဒေနဲ့ မညီညွတ်သူ ၆၈ ယောက်၊ အခွန်ဥပဒေချိုးဖောက်သူ ၂၁ ယောက်၊ အတတ်ပညာ ကာကွယ်မြှင့်တင်ရေးဥပဒေနဲ့ မညီညွတ်သူ ၃၃ ယောက်နဲ့ တခြားပြစ်မှု ၉ ယောက်တို့ ပါဝင် ပါတယ်။ 

နခွန်းဘန်းနယ်မြေ အမှတ် ၂  ရှိ နေရာပေါင်း ၅ ခုကနေ စစ်ဆေးချက်အရ ထိုင်းနဲ့ ရွှေ့ပြောင်းအလုပ်သမား ပူးပေါင်းပြီး နိုင်ငံခြားကနေ ဆေးဝါးတွေ တရားမဝင်တင်သွင်းဖြန့်ဖြူးတာ တွေ့ရှိတယ်၊ အဲဒီနေရာကနေ တရားမဝင်ဆေးဝါးပစ္စည်း ၄၁,၅၀၀ ခု၊ ငွေသား ဘတ် ၁၂ သိန်း စုစုပေါင်း ဘတ်သန်းပေါင်း ၁၄၀ သိမ်းဆည်းခဲ့ပါတယ်။ 

နခွန်းဘန်နယ်မြေ ၈ ကနေ  အိုက်စ်မူးယစ်ဆေး အလေးချိန် ၅၀၉ ကီလိုဂရမ်နဲ့ တရားခံ တယောက် ဖမ်းမိတယ်၊ ကမ္ဘောဒီးယားနိုင်ငံ ပွိုင်းပက်မြို့ တိုက်အမှတ် ၂၅ ရှိ အွန်လိုင်းငွေလိမ်ဂိုဏ်းနဲ့ ဆက်စပ်ပြီး ဘန်ကောက်ရာ့ချ်ဒါးဖိဆစ် တန်ဖိုးကြီးအိမ်ရာမှာ နေထိုင်သူ တရုတ်သူဌေး ၂ ယောက်နဲ့ သူတို့ ပိုင်ဆိုင်တဲ့  ဘတ်ငွေ ၁၅ သန်းကို သိမ်းဆည်းခဲ့တယ်လို့ ဆိုပါတယ်။ 

နခွန်းဘန်ရဲဌာနချုပ်အနေနဲ့ ဥပဒေမဲ့နှိမ်နင်းရေးကို ဒီနေရာတင် ရပ်တန့်မှာမဟုတ်ဘဲ ဘန်ကောက်မှာ နေထိုင်တဲ့ နိုင်ငံခြားသားတွေကို ဆက်လက်စစ်တမ်းကောက်ယူပြီး ရာဇဝတ်မှုကျူးလွန်ဖို့ အန္တရာယ်ဖြစ်စေတဲ့  လုပ်ရပ်တွေကို ဖော်ထုတ်ဖို့  နယ်မြေ ရဲစခန်း ၈၈ ခုနဲ့  စုံစမ်းရေးဌာနခွဲ  အမှတ် ၁ မှ ၉ ထိ ဆက်တိုက် ညွှန်ကြားထားကာ ဥပ‌ဒေချိုးဖောက်မှုတွေ ရှာဖွေတွေ့ရှိက ချက်ချင်း အရေးယူဖို့ ညွှန်ကြားထားတယ်လို့  ရဲမှူးကြီး ဆယမ် ဘွန်းဆုမ်က ပြောသွားပါတယ်။ 

Source: POLICE-TV